Read Vaiphei JOSHUA 23 Bible Online

JOSHUA 23 - Vaiphei bible

JOSHUA 23

¹LALPA‘n Israelte chu a kîmvêl ua a mêlmateu ah kipat gâl muang tak ah kum sawt tak a umsak zaw phatin, Joshua chule a hung upa ta’n, a têk ma ma ta’n;

²tichun, Joshua’n Israel mipi zosia, a upateu leh a Inkuan tin luchangteu, a vaihawmteu leh a hotuteu zosia a ko khawm ah, a kiang un, “Keima ka upa ta’n, têk le ka têk ma ma tai” a ti’n;

³LALPA la Pathian un nangmau â ding ah a hun do piak dungzui in, nanghaw ziak ah LALPA la Pathian un zia gam ah mite chung ah a bawldan zosia le la mu tau a.

⁴Nam tam tak ka la nawdok piaksa ban ah, tu’ ah um nalaite hile, a gam uh Jordan lui ah kipat tumlam ah Tuipi Lian tiang huap hin, nang hawn la phung dungzui chiat ua la lua ding uh, la go chan ding ua ka hun hop piak la hitau hi.

⁵LALPA la Pathian un amau hun naw daw piak intin, la muphâk lo un delmang piak in ah; ziaphat chuleh, LALPA la Pathian un a tiamsa gual in, a gam uh chu chang ta’n lau.

⁶Ziaziakchun, Mosi dan lekhabu ah kizik zosia kha, veilam leh changlam a hem ah pêtsan lo dingin, gunchu tak ah ensui ding leh bawl dingin chingthei tak in um unla;

⁷zia gam ah um nalaite hi tawh kigawm lo ah, a pathian minteu le gen puak lo ding leh, a min ua le kitiam lo ding leh, a nau sêm lo ding leh a âng ua le khiangkho lo ah la umtheina ding un,

⁸tu’ni tiang ah la tûkchak gual un, LALPA la Pathian uh chu tudet zing tau in.

⁹LALPA‘n la mau ah nam lian leh hat takte a hun nawdaw piak ta’ngâl a; tu’ni tiang hin nanghaw hun nang thei khat chale a um ta puau.

¹⁰LALPA la Pathian un a la kitiamsa gual in, nanghaw â dingin gâl hun do piak ding ahi; tichun, mi pakhat in sang khat del mang ta’n lau.

¹¹Ziaziakchun, LALPA la Pathian uh hepi zing dingin chingthei tak in um tau in.

¹²Pilvâng tak ah um lo ah, la kiheimangsan ua, a gam ah um nalai, la lak ua nam dangte hi la kikopvaipiu ah, amau tawh ji leh pawsal ah la kinei tuau ah, amau la kithuapiu a, amau inle nanghaw a hun kikopvaipiu ahileh vang,

¹³LALPA la Pathian un zia namte hi la mit muu in hun del daw piak ta pua’n tin, zia gam pha tak, LALPA la Pathian un a hun piakna mun ah kipat hin la manthai masangsiau, amau chu nang uh â dingin thâng leh pial leh, la nungjang jepna mol leh la mit ua ling lut gual hung hi ding a hiu ti kichian tak in he tau in.

¹⁴Chuleh, tu’hin lei chung pumpi dan in chia ding ka hi tai; LALPA la Pathian un la chung ua tung ding ah thilpha a la tiamsa zosia kha, pakhatle a thawn puai ti la lungthim leh ngaituana zosiau in la hechian ngâl ui.

¹⁵LALPA la Pathian un, thilpha la chung ua tung ding ah a la tiamsa gual ah, a guitunsak zaw tâk ziak hin, zia gam pha, LALPA la Pathian un a hun piakna mun ah kipat hin la manthai suak masiau, LALPA‘n la chung un thil phalo zosia hun tunsak ding ahi.

¹⁶LALPA la Pathian un la pom ding ua thuthung a hun piak chu, bawtsia ding ah pathian dangte na la sep ua, a âng ua la khiangkho ua leh, LALPA lungnatna la chung un kuangjak intin, gam pha tak a hun piakna kipat hin, mangthai pai ngâl ding la hiu, ti he tau in, ti’n a gen tai.