Read Vaiphei JOSHUA 24 Bible Online

JOSHUA 24 - Vaiphei bible

JOSHUA 24

¹Chun, Joshua’n Israel nam zosia Shekhem mun in a ko khawm ah, Israelte lak ah phung tin ah upate, puitute, vaihawmte leh a hotuteu zosia a kosak ah; amau le a leng un Pathian ma-âng ah chun a hung kilâk chiat tau a.

²Chuleh, Joshua’n mipi zosia kiang ah chun, “Israelte Pathian, LALPA‘n zia gual hin thu a gen hi: nidang lai pek ah khan, la pu la pateu, Terah tawh a chapa Abraham leh Nahor tawh, Euphrates luipi gâl lam ah chêng in, pathian dangte na a la sêm un.

³La pau Abraham chu zia Luipi gâl lam ah kipat chun ka la puidok ah, Kanaan gam zosia chuan suak dingin ka pui ah, suan leh pâk tam tak ka pia’n. Ama â dingin Isak ka la piai;

⁴chuleh, Isak ah kipat in Jakob leh Esau ka la pia kit a. Esau luana dingin Seir tânggam ka la pia’n, Jakob leh a chate vang Aigupta gam in a chia suk ui.

⁵Ziaphatchun, Mosi leh Aron ka sawl ah, Aigupta gam ah a lak phat un thilmak bawl in, hipi ka lênsak ta’n; ziazaw phat ah chun, nanghaw hi ka puidaw la hiu.

⁶La pu leh pateu Aigupta gam ah kipat ka la pui daw lai ah khan, Tuisuagiat la hung tung un; la pu leh pateu chu Aigupta mite’n a sakol leh a kângtalaiteu mang in Tuipi San tiang in a hun del zui tau a.

⁷Lungkham tak ah LALPA a hun ko phat un, Aigupta mite tawh la kikâl un thimpi ka ji’nsak ta’n; chuleh, tuisuagiat tuite’n amau chu a chupmang zo ta’n; Aiguptate chung ah ka thilbawl zosia chu la mit un a mu suak kêi ah. Zia nung ah chun, gamthip ah kum sawtpi la hung châm nalai ui.

⁸Chuleh, Jordan lui gâl ah um Amor mite chênna gam in ka hun pui lût ah; amau in a hun do un; ahi’n, amau chu la khut un ka pia’n, a gam uh la lua tau ah; amau chu ka hun hi’mangthai piak ta ahi.

⁹Ziaphatchun, Moab lengpa Zippor chapa Balak, Israelte do ding in a hung kipan ah. Nanghaw hânsia lawkhum dingin Beor chapa Balaam chu chial in, a la ko ta’n;

¹⁰himaleh, Balaam thu chu ka ngaisak pua’n; ziaziakchun, a hun maljawl zaw ta’n; tichun, a khut ah kipat in ka hun hukdok ta la hiu.

¹¹Jordan lui hung gâl kâi ah, Jeriko khua la hung tun phat un, Jeriko khua mite: Amorte, Perizte, Kanaante, Hitte, Girgashte, Hivte leh Jebus mite’n a hun do tau a; ahi’n la, amau chu la khut un ka hun pia ta ahi.

¹²La chemjam leh la thalpiteu ziak hilo in, la ma lam un khuaingal ka sawl ah, ziate chun Amorte leng pani chu la masang un a la del mang tau ahi.

¹³La sepgim lo nau gam leh la siam lo uh khawpite ka hun pia’n, zia te ah chun la chêng tau ahi; la phuu hilo grep huan leh Oliv huan ah a gate chu la neu hi,” a tia.

¹⁴Ziaziakchun, tu’hin LALPA lau dan thiam unla, titakzet leh dik tak in a na sêm un; la pu leh pateu in Luipi gâl lam leh, Aigupta gam ah a na a sep piak uh pathiante kha paitha sik sek unla, LALPA na bep sêm tau in.

¹⁵Tu’hin LALPA nasep ding chu nuam lo la hiu leh, tu’ni ma ma hin kua pen na sêm ding la hiu em, la pu leh pateu in Luipi gâl lam ah pathiante na a la sep piak uh kha ahi em; ahiloleh, la luanau gam ah Amorte pathiante a hizaw diam, ti têl ngâl un. Kei leh ka Inkuante’n vang LALPA na bep sêm ing kau, ti’n a dawnhu a.

¹⁶Ziaphatchun, mipite’n, “LALPA taisan ah pathian dang na sêm lo hial ing kau;

¹⁷ei haw leh I pu leh pateu kha Aigupta gam ah suak leh sal ah tânna lak ah kipat ei puidok ah, tepte’na lopi tak tak bawlpa kha LALPA I Pathian uh hi ahi ngâl ah. Ama’n nam chuam chuam lak I haw lai unle ei vêngbit a;

¹⁸tichun, LALPA‘n I ma lam un nam dang zosia leh a gam ah chêngsa, Amorte zosia a la deldok zo ta’n. Ziaziakchun, LALPA na bep sêm ding ka hiu, ama chu ka Pathian uh ahi ngâl a,” ti’n a dawnhu tau a.

¹⁹Himaleh, Joshua’n mipite kiang in, “LALPA na chu sêm thei pua’n lau, ama chu Pathian thiangtho ahi ngâl a. Ama chu Pathian thikthusia ahi’n, la bawsiatnau leh la gitlonateu chu ngaidam pua’n a.

²⁰LALPA nungngat ah nam dang pathiante na la sepsan uh leh vang, la chung un pha tak ah a bawl zaw nung inle hun nusia intin, la chung un thil phalo hun tunsak in, hun hi’mangthai tho tho ding ahi,” ti’n a gen a.

²¹Chun, mipite’n Joshua kiang in, “Hilo e, LALPA na ahi ka sep ding uh!” ti’n a dawnhu tau a.

²²Ziaphatchun, Joshua’n mipite kiang in, “A na sep gua in LALPA na la têl tau hi ti hiatpite chu nangmau ngei hi la hi tau hi,” a ti ta’n. Chuleh, mipite chun, “Hiatpite ka hitau hi,” ti’n a dawnhu tau a.

²³Ama’n a kiang un, “Chuti ahileh, la lak ua nam dang pathian umte kha paimang unla, la lunggilteu chu LALPA Israelte Pathian lam in awnsak tau in,” ti’n a gen a.

²⁴Mipite’n Joshua kiang in, “LALPA I Pathian uh na bep sêm ing ka tiu in, ama thu le jawm ing kau,” a tiu a.

²⁵Tichun, zia ni ma ma’ chun Joshua’n mipite kiang in thuthung a siam ta’n; chuleh, Shekhem ah dan leh vaihawmna dante a guat piak tai.

²⁶Zia thu chu Pathian dan lekhabu’n Joshua’n a zik lut a; chuleh, suang lianpi a la’n, LALPA mun thiangtho, gangpi bul nuai in a phut tai.

²⁷Joshua’n mipi zosia het in: “En un, zia suang hi ei haw kikâl ah hiatpitu ding chu ahi; LALPA‘n I kiang ua a thugen zosia I he suak ngâl un; ziaziakchun, diklo tak ah la Pathian chung ah thil la bawl uh chun, zia suang hi eihaw ei kãl ding ah hiatpitu hiding ahi,” ti’n a gen a.

²⁸Tichun, Joshua’n mipite chu amau gam channa lam chiat un a sawl kit tai.

²⁹Ziazaw chun, Nun chapa Joshua, LALPA suak chu kum za leh sawmkhat ahi in a thi tai.

³⁰Gaash tâng mallam pang, Ephraim tânggam, ama gam sung Timnath-serah mun in a vui tau a.

³¹Joshua dam sung leh Joshua thi’nung ah dam nalai, Israelte â ding ah LALPA thilbawl a la musa upate dam sung sia’n, Israelte’n LALPA na a sêm zing tau.

³²Chuleh, Israelte’n Aigupta gam ah kipat Joseph guhawm a puak to uh kha Shekhem khua, Shekhem pa Hamor chate lak ah kipat Jakob in dangka za khat ah a chawkna mun ah khan a vui tau ah; zia tak chu Joseph chate gochan in a um den tai.

³³Chun, Aron chapa Eleazar a thi ta’n; Ephraim tâng gam ah a chapa Phinehas â ding ah kipia, Gibeah khua chun a vui tau hi.