Read Vaiphei JOSHUA 3 Bible Online

JOSHUA 3 - Vaiphei bible

JOSHUA 3

¹Jingkal matak in Joshua a tho ah, Israelte zosia chu tawh Shittim ah kipat in a kitawldok tau ah. Jordan lui a gâl kâi masang un a giak tau a.

²Ni thum a tin phatin puitute chun mipi lak a vâk vêl tau a,

³mipite chun, “Levi dan ah thiampute’n LALPA la Pathian uh thuthung thingkuang a jawn uh la mu phât ua leh, la giamun chiat ua la kipatdaw diu ahi. Ama chu zui ngâl un,

⁴zia lampi chu zui kha lo lai la hiziak un, la chiana ding uh lampi la hiattheina ding un. Ahi’n la, amau tawh la kikâl uh tong sang ni ah kikâk ahi zing ding ahi; zia sâng ah naizaw ah chun la zui lo diu ahi,” ti’n thu a piau a.

⁵Chuleh, Joshua’n mipite kiang ah chun, “Kisuthiangtho un; jing leh LALPA‘n la lak un thilmak hun bawl ding ahi ngâl a,” a tia.

⁶Joshua’n thiampute kiang in, “Thuthung thingkuang chu jawn unla, mipite malam ah la chia diu ahi,” ti’n a hil a. Tichun, thuthung thingkuang chu a jawn ua, mipite malam ah chun a chia tau a.

⁷LALPA‘n Joshua kiang in, “Mosi ka umpi gual tho ah khan nang le hun umpi ding ka hi ti la hettheina dingin, tu’ni hin Israelte zosia mit mu in hun chawihoi pan ding ka hi tai.

⁸Thuthung thingkuang jawn thiampute chu, Jordan luikam a tun phat ua leh, ‘Jordan lui lai tak ah chun la din ding uh ahi,’ ti’n thu la piak ding ahi,” ti’n a gen a.

⁹Joshua’n Israelte kiang in, “Hung nai unla, LALPA la Pathian uh thugen hung ngai un,” ti’n a gen a.

¹⁰Joshua chun, “Zia gual ah hin Pathian hing chu la lak ua um ngei a hinai ti hethei in lau; matheilo in la masang un Kanaan mite, Hit mite, Hiv mite, Periz mite, Girgash mite, Amor mite leh Jebus mite chu nawdaw piak intin;

¹¹lei chung pumpi ah LALPA thuthung thingkuang chun la mau in Jordan lui gâl a kâi hi.

¹²Ziaziakchun, tu’hin Israel phung tin ah kipat mi pakhat chiat, sawm leh pani têl un.

¹³Lei chung zosia ah LALPA, LALPA thuthung thingkuang jawn thiampute keng in Jordan lui tui a chotkhâk phat phat leh, Jordan lui tui saklam ah kipat hung luang suk chu tan intin, ding den in, kisia vûm ziang ta’n ah,” a tia.

¹⁴Chuleh, mipite chu Jordan lui gâl kâi ding ah a puanbûk chiat ua kipat a kipatdaw lai un, thuthung thingkuang jawn thiampute chu mipite âng in a chiau a.

¹⁵Pawltâk hun hileh Jordan lui chu a kam dim ah tui luang sek a hi. Thuthung thingkuang jawnte chu Jordan lui a hung tun ua, thuthung thingkuang jawn thiampute keng in lui gei ah tui a chot phat un,

¹⁶saklamah kipat tui hung luang suk chu a chawl ta’n, saklam deu tak ah Zarethan kiang ah Adam khawpi kiang ah chun a bêm in a ding ta mai ah; chuleh, Arabah tuipi, Tuipi Thi lam ah luang suk chu a kangtan tai. Tichun, mipite chu Jeriko khua jawn ah chun a gâl kâi tau a.

¹⁷Israel mipi zosia’n lei hul ah chia ah, a leng ua Jordan lui a gâlkâi masang siau chu LALPA thuthung thingkuang jawn thiampute chu Jordan lui lai tak in, lei hul ah chun a ding den tau a.