Read Vaiphei JOSHUA 9 Bible Online

JOSHUA 9 - Vaiphei bible

JOSHUA 9

¹Tu’hin, Jordan gâl langkhat lam ah tâng gam leh phâi, Tuipi Lian gei jul jul ah kipat Lebanon tiang ah leng um zosia: Hit mite, Kanaan mite, Periz mite, Hiv mite leh Jebus mite chun a chanchin uh a la het phat un,

²Joshua leh Israelte chu, kithutuak tak ah do khawm dingin a pungkhawm tau a.

³Himaleh, Gibeon khua chêngte’n, Joshua’n Jeriko khua leh Âi khua a bawldan a la het phat un,

⁴dawha thiam tak in a pang tau ah; a sabiltung vanpuakna ding un dip lui tak tak a mang un, uain thawl lui leh a sesa kiphaw tawh ankhing tak tak te pua’n,

⁵kengtawdap lui leh kiphaw nem num but ah, puan setak tak ah kithuam in a chiau ah; chuleh, a vaithum puakteu chule keu gep gup leh ap khek khukte ngen ahi tai.

⁶Gilgal ah a giamun ua chun Joshua kiang in a hung ua, ama leh Israelte kiang ah chun, “Gamla tak ah kipat hung ka hiu ah; ziaziakchun, ka kiang un kichamna thuthung siam un,” a hung tiu a.

⁷Himaleh, Israelte chun, Hiv mite kiang ah chun, “Ka lak ua chêng khatto hi’n lau e! Zia gual chu hileh bangti’n kichamna thuthung siam thei ding ka hiu em?” ti’n a dawnhuu a.

⁸Amau chun Joshua kiang in, “La suakte ka hiu,” ti’n a dawnhuu a. Chuleh, Joshua’n a kiang un, “Kua la hiu em? Khoi ah kipat hung la hiu em?” ti’n a dong a.

⁹Amau chun a kiang in, “LALPA la Pathian min ziakin, la suakte hi gamla tak ah kipat hung ka hiu; la minthan dan leh Aigupta gam ah la thilbawl zosia leh,

¹⁰Jordan lui gâl lam ah Amorte Leng pani Heshbon gam ah Leng Sihon leh Bashan gam ah Leng, Ashtaroth khua chêng Og te ni chung ah la thilbawl zosia kha ka la he ta’ngâl un.

¹¹Chutichun, ka upateu leh ka gam ua chêng zosiate chun ka kiang un, ‘La zinnau ah la nêk malam ding uh puau inla, amau tawh kimutua dingin vachiau inla, a kiang un: “La suakte ka hiu; hung un la kichamna thuthung ei bawlpi un,” vatiu in,’ ei tiu a.

¹²Ka vaithum puakteu hile en un; lam kâl ah ka nêk malam ding ua a salum ah ka hun puakdok uh ahi; ahi’n, tu’hin en tiam un, a keugawp zo ta’n, a ap khek khuk ziang ta hilam;

¹³zia ka uain thawlteu hile a thak ah ka hun puakdok uh a hia; tu’hin, en him him tiam un, a vang chet chut ziang tai; chuleh, ka hungnau a gamlat bêk ziakin ka puanteu leh ka kengtawdapteu hile a chul zo ta hilam,” a tiu a.

¹⁴Tichun, upate chun a nêkthei puakteu chu a nêkpi tau ah, LALPA ah kipat thuhilna vang a don puau a.

¹⁵Chutichun, Joshua’n amau tawh kicham in, kichamna thuthung siam in amau chu that lo dingin a tiam ah; chuleh, mipi puitute chu le a kiang un a kihaksial tau a.

¹⁶Himaleh, a kiang ua thuthung a siam zawu ah ni thum a ti’n nung in, amau chu a khua kiang ua chêng leh a lak ma mau ah chêng zing a hiu ti a hun he tau a.

¹⁷Tichun, Israelte chu a kuan ua, a ni thum ni chun a chênnau khawpite chu a vatung tau ah; a khawpiteu chu Gibeon, Kaphirah, Beeroth leh Kiriath-jearim te hi a hiu a.

¹⁸Himaleh, mipi palaite’n LALPA, Israelte Pathian min ah thutiam a la bawl tâk ziak un, Israelte’n amau chu a vado ta puau a. Ziaphatchun, mipite chu a hotuteu chung in a phun sau sau tau a.

¹⁹Ahi’n, hotute zosia chun mipite kiang ah chun, “LALPA, Israelte Pathian min ah ka la kitiampiu ahi tak ziak un, amau chu I khoikhâk uh thiang talo ahi.

²⁰A chung un zia gual hin I bawl mai diu ahi: A kiang ua a la kitiam ta I hiziak un; amau hi hawi mai hitiu; I chung ua lungnatna a hung tunlona dingin,” a tiu a.

²¹Hotute chun mipite kiang in, “Hawi in um mai tau hen, mipite thingpua leh tuikhai in pang mai tau hen” tia a guat dungzui un a pansak tau a.

²²Joshua’n amau chu a ko khawm ah, a kiang un, “Bang ding ah ka kiang ua chêng zing hi’napi ah, ‘Gamla tak ah chêng ka hiu,’ ti ah ei hung thêm la hiu em?

²³Ziaziakchun, tu’hin hânsiadong la hitau ah, la lak ua khenkhatte chu ka Pathian In ah thingpua ding leh tuikhai ding, suak ah la um ding uh ahi tai,” ti’n a gen a.

²⁴Amau inle Joshua kiang in, “LALPA la Pathian in, a suak Mosi kiang ah gam zosia hi la khut ah pia in, a gam ah chêng zosia hile la ma-âng ah sumangthai sik sek dingin thu a piai, ti thu la suakte hin ka la hiau ah; chutichun, nangmau ziak ah ka hinnau matsua ding ka lau ziak un, zia gual hin ka la bawl ta mai uh a hi.

²⁵Chuleh, tu’hin la khut ah um ka hitau; pha leh dik la sak dan dan in, la nop dan dan in ka chung un bawl mai ta’n,” a tiu a.

²⁶Zia gual hin a chung un a bawl tai: Israelte khut ah kipat in a hukdok ah; tichun, amau chu a that ta puai.

²⁷Himaleh, zia ni ma ma ah chun, Joshua’n mipite â ding leh, a pha sakna mun phot ah LALPA mâichâm ah matchâk ding thing pua tuikhai dingin a guat ta’n, tu’ni tiang hin a pang den tau a.