Read Vaiphei 2 THESSALONITE 3 Bible Online

2 THESSALONITE 3 - Vaiphei bible

2 THESSALONITE 3

¹A tawp pen ah chun, suapite haw, Lalpa thu chu nangmau lak ah a um gual in, kin tak ah thejak ah a umtheina ding leh,

²mi genhakte leh migilote lak ah ka bittheina ding un ei pauchap piak un; mi zosia’n ginna a nei chiat pawngal un.

³Himaleh, Lalpa chu a ginum ah, ama chun hun hi’det in, migilo lak in hun vêng ding ahi.

⁴Thu ka hun piak taphot kha la sepzawu ah, la sep jel uh chu Lalpa ah chun ka hun muang uh ahi.

⁵Chun, LALPA‘n la lungthim uh chu Pathian hepina leh Khrista detna ah chun hun pui lût ta hen.

⁶Suapite haw, ka kiang ua kipat thugosia a mu gual ua umlo ah, dan lo gual ah um suapite zosia ah kipat kikoikâng dingin I Lalpa Jesu Khrista min in thu ka hun pia la hiu.

⁷Nangmau ngei in lei zui dan ding uh la he ngal un; la lak un dan lo gual in ka tawi ngai puau hi.

⁸Kuama an a thawn in ka ne ngai puau in; kuama puakgik ka hun puaksak lona ding un sûn leh jan in gim leh chawl tak ah sêm in ka ne zawu ahi.

⁹Zia chu thuneina ka neilo ziak uh a hipua’n, nangmau etton dingin ka umdan uh zui ding ka hun pezawu ahi.

¹⁰La kiang ua ka um lai khanle zia thu hi ka hun piau ahi kha: “Kua’nle na a sep nop lo chun, nêkle ne ki’hen,” ti hi.

¹¹La lak ua khenkhat thada tak ah um sekte chungchâng kha la he ngal un; ziate chun na him him sêm lo in, a mawk kisaklâ sek uh ahi.

¹²Ahi’n, zia gual mite chu thip hiau ah na sêm ding leh, amau an kinêk dingin Lalpa Jesu Khrista min in thu pia’n ka tîl uh ahi.

¹³Suapite haw, nanghaw vang thilpha bawl chimchâk kiu in.

¹⁴Chuleh, kua’nle zia ka lekhau ah ka thugenteu hi a zui lo leh, zia mi chu tepteu inla, a jachâk theina ding un kivoppi kiu in.

¹⁵Himaleh, suapi gual in hil zawu inla, mêlma gual in vang bawl kiu in.

¹⁶Chuleh, chamna Lalpa ngei chun bangtik lai inle, bang lam lam inle chamna hun pia ta hen. Lalpa chun la leng un hun umpi chiat ta hen.

¹⁷Kei Paul in, keima khut ngei ah zia chibai bûkna hi ka hun zik ahi. Zia chu ka lekhathot zosia tepte’na ahi; zia hi ka zik sek dan chu ahi.

¹⁸I Lalpau Jesu Khrista hepina chun hun umpi chiat ta hen. Amen.