Read Vaiphei 1 TIMOTHI 4 Bible Online

1 TIMOTHI 4 - Vaiphei bible

1 TIMOTHI 4

¹Thagau chun, “Hun nunung lam leh mi khenkhatte’n puimanna thagaute leh, thitha lam ah thuhilna ngaisak ziakin, ginna hun haisan in au,” ti kichian tak in a gen hi;

²zia chu mi phalêmte juautheina ziakin ahi, amau chu a sia leh pha hetnau thîk âm ah bî piak gual a hiu in.

³Kichen a khâm un, an nêk kisûm ding a tiu in, zia chu thutak he’ gingchate’n kipak thu gen kawm ah, a nêk ding ua Pathian in a siam hingal in.

⁴Pathian thilsiam zosia hi a pha suak in, kipak thugen kawm ah pom ahi’phot leh bangma doi lo ding a um puai;

⁵Pathian thu leh pauchapna ah hi’thiantho ahi tangal a.

⁶Ziate chu unaute la hiatsak ahi chun, Khrista Jesu ah nasêm pha, ginna thute leh thuhilna pha la zuite ngei ah chu kivâk thahât hiding la hi.

⁷Thu kiphuak kawm polche leh tuanthu manlote ah chun kihi’ nât kin. Pathian ngaisakna lam in kisawizoi in.

⁸Taksa lam ah kisoizoina hin phatchuamna a nei tho hi; himaleh, Pathian ngaisakna chu bang lam lam inle a phachuam hi; tu’ ah hinna leh hinna hung tung ding tiang ah thutep nei ahi.

⁹Zia thu hi a muan um in a pom tâk hi.

¹⁰Zia ziak tak ah chun I sêmgim un, I pang ham ham uh ahi; Pathian hing ah chun I kinepnau a um ah, ama chu mi zosia Hukdampa, a gingte â ding ah hizaw diak ahi.

¹¹Zia thute hi poimaw la sak ah, la zilsak ding ahi.

¹²La khangdawng hi’na kuama’n hun musit ki’hen; himaleh, pau dan leh tawidan, hepina, ginna leh thianthonate ah chun gingtute etton dingin um zaw ta’n.

¹³Ka hung masia mipi âng ah Pathian Thu simdaw leh tilkhona leh thuhilnate a la ngaikhawk in.

¹⁴Upa vaihawmte’n a khut ngat kawm ua thugenlawk dungzui ah thilpiak, nangma ah um chu ngaisak lo in um kin.

¹⁵Mi zosia’n la phatchuamna a mutheina ding un zia thilte chu bawl inla, zia thilte ah chun kipe zo in.

¹⁶Nangma leh la thuhil ah pilvâng tak in um in; zia thilte chu bawl zom zing in, zia gual ah la bawl chun nangma leh la thu ngaithate chu hukdam in um in au.