Read Vaiphei 1 TIMOTHI 5 Bible Online

1 TIMOTHI 5 - Vaiphei bible

1 TIMOTHI 5

¹Upate chu vau thaw kin la, pa gual in hil zaw’n; tangval zaw te chu suapite gual in;

²numei upa zaw te chu nute gual leh, numei naupang zaw te chu suapite gual ah thiangtho tak in hil in.

³Meithâi hi tak tak, meithâite chu jabawl in.

⁴Meithâi pakhat chun chate a hem, tute a hem a nei chun, ama Insung ah sakhaw lam ah a mawpuakna zil masa hen la, a nu leh pate chung ah phatna thuk hen; zia chu Pathian mit mu ah kipak um ahi ngal a.

⁵Meithâi hi tak tak, ama bep ah um chun, Pathian chung ah kinepna a koi ah, sûn leh jan in don leh pauchap in a um sek hi.

⁶Ahi’n la, meithâi ama nopsakna ding bep ah hing chu, a dam lai ngei ah le a thisa ahi.

⁷Demna bei ah a umtheina ding un, zia thupiakte hile pia ta’n.

⁸Chuleh, kua’nle a chanaute leh a diak ah ama Insung mite nêk ding a ngaitua piak lo chun, ginna chu a phatsan ta’n, ginglo mi sâng ah gilo zaw ahi.

⁹Meithâi ah la ziklut ding chu: Kum sawmguk chung lam, pawsal khatvei bep neisa,

¹⁰a nasep phate hetpi hita, chate vâk lian ta, zin leh lêng bawldan thiam, mithiangthote keng sil piak ta, liangvaite a la somdawl ta leh nasep pha zosia ah kipe zo mi ahi ding ahi.

¹¹Himaleh, meithâi khangdawng nalai deute chu ziklut kin; amau chun Khrista tawh kikãl ah taksa nopna lam ah a kipiak phat ua leh, pawsal nei a nuam kit sek un;

¹²tichun, a kitepna masau chu vopdet lo in, thiamlo a chang sek ui.

¹³Zia lo ah chunle, Intin in a vâk ua, a hung thabei sek un; a thâtbei bep uh hilo in, mi chanchin gen thanuam leh mi kitingzo, a gen lo ding tiang tiang uh gen in a um sek ui.

¹⁴Ziaziakchun, meithâi khangdawng nalai deute chun pawsal nei uh hen la, chate nei uh hen la, a Insung uh pawtûp in, mêlma’n ei demna ding uh lemchâng musak kileu ka dawi hi.

¹⁵Mi khenkhat in Setan nungzui in a pêtmang tau hi.

¹⁶Gingtu numei kua’nle chanau meithâi a nei leh panpi hen; kochuam chung chu giksak ki’hen, meithâi tak takte chu a kaitua theina ding un.

¹⁷Kochuam upa pha tak ah vaihawmte chu a le’ni ah choisa’n tâk ah ngai hiu hen, a diak in thugen leh thuhil ah sêmgimte chu;

¹⁸Pathian Lekhathu’n, “Bawngchal chun bu a chil lai in a mûk kân piak kin,” ti leh, “Nasem mi chu law mu tâk ahi,” a la ti’ngal a.

¹⁹Kochuam upa a hêknau chu hiatpitu pani a hem, pathum a hem a umlo ua leh pom kin.

²⁰Chun, gitlo bawl zingte chu mi zosia ma-âng ah zilgai in, midangte chu a lau theina ding un.

²¹Pathian leh Khrista Jesu leh, vansawlchâk têlte mit mu in ka hun hil la hi: zia thute hi doisak chuam neilo in zui inla, khen chuam nei in bangma bawl kin.

²²Kuama chung in la khut nga pai ziang kin la, midang gitlona ah le pang kin; kikoi thiangtho zing in.

²³Tuisik bep dawn ta kin, la gilpi ziak leh la nat zing ziakin uain tawmcha dawn sek in.

²⁴Mi khenkhat gitlonate chu a kilang pai in, vaihawmna a tung ngal sek in; mi khenkhat gitlona vang vainung in a kilang sek hi.

²⁵Zia gual ma chun thilpha chu a kilang ziang a um in, zia gual hilote chule sêlgûk thei ahi diak puai.