Read Vaiphei 2 TIMOTHI 4 Bible Online

2 TIMOTHI 4 - Vaiphei bible

2 TIMOTHI 4

¹Pathian mit mu leh Khrista Jesu, a thite leh a hingte vaihawm piak ding pa mit mu leh, a hung kilâkna ding leh a lenggam chu minsial in, ka hun tîl la hi:

²Thu chu gen in; a hun ah le, a hun lo ah le gunchu zingin; a thiamlo ziau hiatsak inla, zilgai inla, tilkhau inla, daw zo takin thu hil in.

³Mite’n thuhilna dik a ngaithâk peilo hun uh hung tung ding ahi ngal a; a nakhangteu a zat ziakin amau nopna tawh kituakte gen dingin, thuhil dingte kichom khawm ding a hiu;

⁴thutak chu ngaitha lo ding ah nusia in, tuanthute lam ah pêtmang in au.

⁵Nang vang chingthei tak in umzing in, haksatnate thuak inla, chanchinpha gen in pang zing inla, la nasepna chu mualsua ta’n.

⁶Kei vang tu’hin le latdaw ah um zing ka hita’n; ka chia hun a hung tung tai.

⁷Kidona pha chu ka do zo ta’n, kitaisiakna chu ka mualsua ta’n, ginna chu ka vopdet zo tai.

⁸Tu’hin dikna lallukhuk chu kei â ding ah koisa’n a um ta’n, zia chu Lalpa, vaihawmpa dik tak chun zia ni chuleh ei pia ding ahi; kei kiang bep ah hilo in, a kilâkna ngâkte zosia kiang inle.

⁹Theitawp sua in ka kiang ah hung kin in,

¹⁰Dema chun tu’lai khawvel a ngainat ziakin ei nusia in, Thessalonika khua’n a chia tai; Kresen chu Galatia gam ah, Tita le Dalmatia gam lam in a chia tau hi.

¹¹Luka bep ka kiang in a um hi. Marka kha hun chial inla, hun pui in, ama chu ka nasepna hin a phachuam ngal a.

¹²Tukika chu Ephesa khua’n ka sawl tai.

¹³La hung phat leh Troas khua, Karpas kiang ah puanâk chual ka nutsia kha ei hun puak piak in; chuleh, lekhabute kha tawh, a diak in savun lekha kha tawh.

¹⁴Sumsungpa Aleksander khan ei subuai ma ma ziang a; LALPA‘n a thilhi dungzui in thuk in a.

¹⁵A kiang ah khan nang le kivêng in, I thugen uh hi a dodâl ma ma ziang hi.

¹⁶Ka thiamna thu ka gen masak chung ah khan, kuama’n ei panpi lo in, ei nusia sik sek tau hi. Amau chung in thiamlona chu ki’hen!

¹⁷Himaleh LALPA‘n ei dinpi in, ei hi’hat a; chutia, keima ziak ah chanchinpha gen kim ah um ding leh, Jentelte zosia’n a hettheina ding un. Tichun, sakeibaknei kam ah kipat hukdaw in ka um tai.

¹⁸Lalpa chun thil phalo ei dote zosia lak ah ei hukdok intin, a van-gam chu bit tak in ei tun in a. Ama kiang ah chun lopina kumtuang in um ta hen. Amen.

¹⁹Priska leh Akuila tawh Onesiphora Inkuanpite kha chibai ei la bûk piak in.

²⁰Erastas chu Korinth ah a um den tai, Trophimas chu Mileta ah damlo in ka nusia tai.

²¹Phalbi ma ngei ah hung dingin theitawp hun sua in. Eubul, Puden, Linas, Klaudia leh suapi zosia’n chibai a hun bûk ui.

²²LALPA‘n la thagau umpi ta hen. Hepina’n hun umpi ta hen. Amen.