Read Vaiphei TITA 1 Bible Online

TITA 1 - Vaiphei bible

TITA 1

¹Paul, Pathian suak leh Pathian ngaisakna lam ah thutak hetna leh Pathian mi têl, ginna dungzui ah Jesu Khrista sawlchâk chun,

²khawvel um masang ah Pathian zuau gen ngailo in a tiam, kumtuang hinna kinem ah um,

³himaleh, I Pau Pathian thupiak dungzui ah ka kiang ah piak ah um, a hun tak ah thugen sek pa hin,

⁴ginna ka kikoppi, ka chapa Tita kiang ah chun: Pa Pathian leh Lalpa Khrista Jesu I Hukdampau kiang ah kipat hepina leh jangaina leh chamna um ta hen.

⁵Keima’n ka hun kawkmu gual ah khan, thil hi’tûp ding mabâk um nalaite kha hi’tûp ding leh khawtin ah upate namdet dingin, Kret gam ah khan ka hun nutsia la hi’n;

⁶mi kuale dem kâi lo, ji pakhat nei, a chate ginum, noptatna lam ah dem kâi lo, danlo gual ah talo a hi’nâk ua leh,

⁷kochuam hotu chu Pathian sum enkoltu ahiziak in, dem kâi lo ahi ding a hia; ama thu bep dawi hilo, lungna vak lo, zu dawn chîng lo, khut tha pai ziang lo, diklo tak ah lawkna hawl lo;

⁸mi lopdan thiam, a phalam dawi, ama kithuzaw mi, midik, mithiangtho leh mi kisûmthei;

⁹thugin dik tak mang ah mite thu a hiltheina ding leh, a nialte chu a zaw theina ding ah, hil ah a um gual ah thu gin um tak chu tudet mi a hi ding ahi.

¹⁰Dan khawksa lo leh thu manlo mawk gen gente, mi thêm ah puimangte a tam tangal ua, a diak in zektante lak in a tam diak uh ahi.

¹¹Zia gual mite chun lawkna dik lo ngaitua in, thu hilo lo gen in mi a Inkuan kuan in a susia sek ua, ziate chu a kam uh huk piak ding a hiu.

¹²Amau haw lak ngei ah jawlnei pakhat chun, “Kret mite hi zuauthei chîng zingte, gamsa gilo tawhbang leh mi thabei, an nêk hatte a hiu,” a la ti kha.

¹³Zia a thugen chu a dik him hi. Ziaziakchun, ginna dik tak a neitheina ding un na tak in zilgai in.

¹⁴Thudik ah kipat kaihei thei mihing thupiakte leh, Judate tuanthu mai mai a ngaisak lona ding un.

¹⁵Mithiangtho â dingin bangkim a thiangtho ah; himaleh, mibuakte leh ginglote â dingin vang bangma a thiang a um puai; a lungthim uh leh a sia leh pha hetnau nangawnle a buak tai.

¹⁶Pathian he a kitiu in, himaleh a nasep ua chun ama a kihetlosak ui. Ki’dak um tak leh thu awilo tak in, thilpha hi’na ding lam taphot in a ting zo ta puau hi.