Read Vaiphei PHILEMON 1 Bible Online

PHILEMON 1 - Vaiphei bible

PHILEMON 1

¹Paul, Krista Jesu jal ah suangkul ngak leh, I suapiu Timothi hin, ka doitak uh leh ka sepgimpiu Philemon leh,

²ka doitak uh Apphia tawh ka sepaipiu, Arkippa leh la In ah kochuam kikhawm haw chu:

³I Pau Pathian leh Lalpa Jesu Khrista ah kipat hepina leh chamna la kiang un um ta hen.

⁴Ka pauchapnate ah chun la min lam zing in, ka Pathian kiang ah chun kipak thu ka gen sek hi.

⁵Lalpa Jesu lam leh mithiangtho zosiate lam ah, la hepina leh ginna chu hezing in,

⁶la ginna kikoppi leh Khrista tawh I kizopnau ah kipat I muu maljawlna chu la het zawk diakna dingin ka hun pauchap piak a hi.

⁷Suapi doitak, la hepina hin kipakna lian tak leh lung muanna nasa tak ka nei hi, nangma ziakin mithiang thote chu suk-hal in a um tau ahi.

⁸Ziaziak tak ah chun, la hi’ding ah kilawm chu Khrista jal in hun hil ngam ziang hi maleng,

⁹keima Paul, Khrista Jesu palai leh tu’ ama jal ah suangkul ngâk têk hial ta hin, hepina jal ma ah chun a dot in ka hun dot thaw a hi.

¹⁰Kolbut kawm ah ka hin, ka cha, Onesima â ding ah hin ka hun dot piak ahi.

¹¹Tu’ma khan vang nang â dingin mi phachuam lo a la hi’n; himaleh, tu’hin vang nang leh kei dingin mi phachuam tak a hung hi tai.

¹²Tu’hin ama ngei hi keima lunggil doina tak in la kiang in ka hun sawl kit ahi.

¹³Ama hi chanchinpha ziak ah ka koltânna hin, nangma thasâng ah ka na ei sep piak dingin koiden mai chu ka nuam in:

¹⁴Himaleh, la cham lo ah ei panpi hilo in, nangma nopna ngei a hitheina dingin, nang thu lo in bangma ka hi nuam puai.

¹⁵Chomkhat ama tawh la kikhen uh hi, ama la nei den theina ding hi zaw ding ahi.

¹⁶Tu’hin vang kei â dingin suak gual hi talo in, suak sâng ah chungnung zaw, suapi doi um tak a hizaw tai. Nang â ding vang ah chun taksa lam leh Lalpa lam in a hizaw diakna lawm ding e!

¹⁷Chutichun, la gual pha ah lei ngai leh, keima lei lop ding gual tak in ama hi a la lop in.

¹⁸La chung ah thil a hi’khial a hem, leibat a hem a nei chun, keima bat in a la koi ta’n.

¹⁹Keima Paul in ka khut ngei ah ka hun zik ahi, keima’n dit piak ing ka; keima lam ah nang in la hinna ngei le la bat ahi ti vang ka hi diak puai.

²⁰Ahi, ka suapipa, nangma jal in Lalpa ah chun ei kipaksak in! Ka lungthim hi Khrista ah chun ei hi’hal in.

²¹Zia hi la hi ngei ding gingcha tak in ka hun zik ahi. Ka hun dot sâng ah le phazaw’n hi’ ngei in la ti ka hia’i.

²²Zia bân ah chun, ka tunna ding ei la bawl piak in, la pauchapnateu ziakin la kiang ua hung ngei ka kigingcha ahi.

²³Khrista Jesu ah ka suangkul ngâkpi, Epaphras in chibai a hun bûk hi.

²⁴Ka sepgimpite, Marka, Artistarka, Dema tawh Luka’n le a hun bûk chiat ui.

²⁵Lalpa Jesu Khrista hepina chu la thagau un um zing ta hen. Amen.