Read Vaiphei HEBRAITE 1 Bible Online

HEBRAITE 1 - Vaiphei bible

HEBRAITE 1

¹Masanglai ah khan Pathian in lampi chuam chuam in, I pu leh pateu kiang in jawlneite mang in thu a la gen sek a;

²tu’hun nunung lam ah hin vang a Chapa in I kiang un thu a gen zaw tai; a Chapa chu bangkim golua dingin a têl ah, ama mang in Pathian in khawvel hi a la siam tai.

³Ama chu Pathian lopina vâk kilatna leh Pathian hina mêl taklangpa ahi’n, a thu thilhitheina chun bangkim a tungding ah, ama chun I gitlonateu a sukthian nung in, chungnung pen leh lopi pen chang lam in a hang kichu tai.

⁴Chapa chun vansawlchâkte sâng ah min chungnung zaw ahiziak in, amau sâng ah chungnung zaw siam ahi tai.

⁵Vansawlchâk kua kiang inle, Pathian in zia gual hin a gen kha ngai em, “Nang ka Chapa la hi, tu’ni hin ka hin la hi tai,” ti leh, “Ama â dingin Pa hi’ng ka tin, ama chu kei â dingin Chapa hi’n a,” ti in.

⁶Chuleh, Pathian in zia a chapa masa pen chu khawvel ah a hun sawl lai in, “Pathian vansawlchâkte’n ama chu be tau hen,” a ti kit a.

⁷Himaleh, vansawlchâkte chung thu ah chun, “A vansawlchâkte chu hui a chansak in, a nasemte chu meikuang a chansak hi,” a la ti’n.

⁸Ahi’n, Chapa chung thu ah chun zia gual hin a gen a: Aw Pathian, la lalchutpha chu, kumtuang in a um zing hi; dikna lal tiang chu la lenggam lal tiang ahi.

⁹Dikna chu la ngaina hen, diklona chu la hua ahi; ziaziakchun, Pathian, la Pathian in, “Kipakna sathau chu la gualte sâng ah chungnung zaw’n a hun mu tai,”

¹⁰Chuleh, “Lalpa nang in a tîl in, leilung bulpi chu la guanggal a; vante khi nangma khutsuak ngen ahi;

¹¹ziate chu hung mangthai intiu in, himaleh, nang chu la um zing hi: zia zosia chu puan gual in a la chul intiu in,

¹²puansil gual in jialdok in la tin, ahi, hung kitheng ta’n au; himaleh, nang chu la kibang zing zing ah, la kumte chun tawp ni nei pua’n a,” a ti’n.

¹³Himaleh, vansawlchâk kuapen kiang in zia gual hin a gen ngai em? “La mêlmate la tawden ding ah ka bawl masia, ka changlam ah kichu’n,” ti hi.

¹⁴Vansawlchâkte haw zosia chu, hukdamna chang dingte nasem ding ah sawldaw thagau hilo a hiu em?