Read Vaiphei HEBRAITE 10 Bible Online

HEBRAITE 10 - Vaiphei bible

HEBRAITE 10

¹Dan chu thil pha hung tung dingte lîm bep leh, a tak chu a hilo ziakin, kum si’n ah kithoina a lat zingteu chun a hun naite chu bangtik inle a subukim pua’n.

²Sil thian a la hi taleu chu, gitlo mawchanna nei ah kihe talo ding a hiu in, gitlo kithoinate chule a lat uh ngai ta ding a hem?

³Himaleh, zia kithoinate chu kum si’n ah gitlo hetdaw kitna ahi zawi.

⁴Bawngchalte leh kêlte thisan ah gitlona chul mang thei ahi paw ngal a.

⁵Ziaziakchun, khawvel ah Khrista a hung khan, “Kithoina leh thillatte la dawi pua’n, kei â dingin taksa lei guat piak zaw ta’n;

⁶hâlmang thillat leh gitlo kithoinate ah chun, kipakna him la nei puai.

⁷Ziaphatchun, keima’n, (Lekhabu mun khat ah ka chung thu zik ahi;) Aw Pathian, en in, la doigual hi’ding in ka hung hi, ka ti’n, ti’n a la gen a”.

⁸A chung ah hin, (dan dungzui tak ah bawl hilehle:) “Kithoina leh thillatte, hâlmang thillat leh gitlo thillat chu la dawi pua’n, ziate ah chun kipakna la nei puai,” a ti’n;

⁹ziaphatchun ama’n, “En in, la dawi gual hi’ding in ka hung hi,” a ti’n. A pani’na chu a sukdet theina dingin a masa chu a lamang tai.

¹⁰A dawi gual ah chun, Jesu Khrista taksa khatvei thu ah a kilat zaw tâk ziakin sukthian in I um tau hi.

¹¹Thiampu zosia’n nisi’n leh na sêm in, gitlonate lamang theilo kithoina chu lân in a ding zing ui.

¹²Himaleh, ama’n vang gitlote kithoina chu khatvei thu in, kumtuang â dingin a lân a, Pathian changlam ah khin a hang kichu tai.

¹³Zia nung chun a mêlmate a keng nuai ah a um masangsia chu a ngâk tai.

¹⁴Thillat pakhat mai in sukthianthote chu kumtuang â dingin a hi’bukim tai.

¹⁵Chuleh, Thagau Thiangtho le hiatpitu a hita’n; zia nung ah chun a malam ah a la gensa,

¹⁶“ ‘Zia ni te nung ah amau tawh ka thuthung ding chu zia hi ahi,’ LALPA‘n a tii: ‘A lung sung un ka dante chu koi ing ka tin, a lungthim un zik ing ka’ ” a ti kha.

¹⁷Chuleh, “A gitlonateu leh a bawsiatnateu chu, hezing ta pua’ng ka,” a ti kit hi.

¹⁸Ziaziakchun, zia gual gitlo ngaidamna chun gitlo â ding ah thilpiak a ngâi ta puai.

¹⁹Ziaziakchun, suapite haw, Jesu thisan jal ah Munthiangtho pen ah lut ngamna I nei tau in,

²⁰lampi thak leh hing ei guat piak chu haw in, (zia chu puanjak ah taksa ti’na ahi.)

²¹Pathian In sung ah thiampu lianpen chu I nei ziak un,

²²lungthim dik tak pu’n, ginna kihetchianna bukim chu nei in, I lunggil sia leh pha hetna chu suthiang in, I taksau le tui thiang ah sil in, ama chu nai hitiu.

²³Kilîng lo hial in I kinepnau thugin hi tudet zing hitiu, thutiampa chu a ginum ngal a.

²⁴Hepina leh nasep pha ah kitîlhat in kikhoksak tua chiat hitiu.

²⁵Mi khenkhatte gual in I kikhopnateu haisan lo in, kitîlhat tua chiat hitiu, ni chu a nai tai ti la het ua leh kitîlhat tau in.

²⁶Thutak hetna I nei nung un gilo kitleu hin, gitlona thoina ding um kit ta pua’n tin;

²⁷vaihawmna lau um tak leh a dote kâng ding lungnatna mei chu um zaw ta’n a.

²⁸Mosi dan botsete kha hiatpitu pani a hem pathum a hem thu’n, jangaina bei in a thisek ui.

²⁹Pathian Chapa tawden ah, ama sukthianna thuthung thisan chu bangmalo ah ngai ah, hepina Thagau sunuakte chu, bang gual tak ah gawtna nasa zaw thuak tâk in la ngai awm?

³⁰“Phuba chu keima lâk ding ahi, keima’n thuk ing ka,” kiti leh, “LALPA‘n a mite chu vaihawm piak ding ahi,” ti pa chu I he ngal un.

³¹Pathian hing khut ah pûk chu thil huaisia tak ahi.

³²Ziaziakchun, sukvak ah la um nung ua, sukgentheina nasa tak ziak ah la thoknateu kha hedok kit unla,

³³a châng leh musitnate leh gim umnate thuak in etnop ah siam in la um un, a châng leh zia gual ah thuakte chu la thokpiu hi.

³⁴Kolbutte chu la lainat ua, van ah thil phazaw leh a um zing dingte la nei ui ti kihia’n, la thil uh a lâkpiak lai unle kipak tak in la thuak tau hi.

³⁵Ziaziakchun, la kingaknau chu haisan kiu in; kipakman nasa tak a um ngal a.

³⁶Pathian doigual ah la bawl phat ua leh le, thutep chu la chantheina ding un la thok-hat uh a ngai zing ngal a.

³⁷“Hun chomlokâl ah hung dingpa chu, hung pai ziang ding ahi tangal a, sawt hun dâng ta pua’n a.

³⁸Himaleh la midik chu ginna’n hing in a. A kinungle kitte chung in vang, ka thagau lungdam pua’n a”. A tia.

³⁹Himaleh, ei haw vang mangthai ding ah kinungtawl pawl I hipuau a; hukhinna chang ding ah gingte I hizawu hi.