Read Vaiphei HEBRAITE 12 Bible Online

HEBRAITE 12 - Vaiphei bible

HEBRAITE 12

¹Chutichun, hiatpitu sûmpi nasa tak ah ûm kîmvêl I hiu ti kihia’n, ei sunokphak leh I chung ua bek gitlonate paitha’i tiu in, I mau ah kitaisiakna lampi ah hin thuak-hat tak in tai hitiu.

²I ginnau siampa leh subukimpa, Jesu lam chu en zing hitiu; ama chun a malam ah kipakna chu thîl in, mualphona chu ngainêp in kros chu a thuak ah, Pathian lalchutpha changlam ah khin a hang kichu tai.

³Lungthim lam ah la tha chawl ua, la basaplona ding un, migilote nialkãlna thuak ham hampa kha ngaitua tiam un.

⁴Gitlona do in thisan pawt khop in la pang kha nai puau hi.

⁵Chate hilna gual ah tîlhânna thu kigente kha la hemil tau hi: “Ka chapa, Lalpa thununna chu ngainêp kin la, a zilgai inle kithada diak kin.

⁶LALPA‘n a hepite chu a thunun sek in, cha a lop tapo chu a vaw sek salo la hem?” ti hi.

⁷Thununna chu la thok ua leh, Pathian in cha etkol ah a hun etkolna ahi; Pa thunun lo cha kua a hem um ngai?

⁸Cha zosia’n a thok uh thununna chu la thok khak lo uh leh vang, cha tak hilo, jawlcha hiding la hiu.

⁹Zia tilo ah chun, ei thunun ding taksa nu leh pate I nei chiat ui; amau chu I ja ma mau a. Zia sâng ah nasa zaw chun, I hinna ding un, thagau lam I pau thu nung zaw diak lo ding I hiu em?

¹⁰Amau chun ni sawt lo sung chu pha a sak gual un ei thunun ngei un; ama’n vang a thianthona chanpite I hi’theina ding un, I phatna ding un ei thunun sek ahi.

¹¹Thununna thok lai him him in kipak um in a kilang ngai pua’n, gimum in a kilang sek hi; himaleh, thok zaw nung leh vang, sawinem ah umte â dingin dikna ga thamuan um tak a sua sek hi.

¹²Ziaziakchun, khut kikhâithate leh khup zawite chu jezang unla,

¹³kengbaite kiloisak lo ah, hi’dam ahi’na ding un, la kengteu â dingin lamzang kisiam un.

¹⁴Mi zosia tawh kichamna leh thianthona chu del un, zia longal ah chun kuama’n Lalpa mu pua’n a.

¹⁵Pathian doisakna chang zo lo ah kuama la hung um lona ding un chingthei tak in um un; la lak ua buaina hun tun thei ding leh, mi tam tak hun subuak thei ding kituak lona zung la lak un ke’dawsak kiu in.

¹⁶Mithanghuai a hem, Esau gual ah Pathian jalo hung um kha’n lau; ama chun a cha upa hi’na chu an khatvei nêk in a khawng a,

¹⁷zia nung ah chun maljawlna chan nuam in, mitthi pum in theitawp in hawl maleh, lung heina lemchâng a mu lo ziakin pai in a um tai, ti la hiau a.

¹⁸Nangmau vang, tâng sukkhak thei ah meikuang, thimna, liapna leh thigawpi,

¹⁹pengkul gitna leh aw gitna mun ah hung la hi puau in; zia git hete chun a het kit tâk lona ding un a la don hial uh ahi kha.

²⁰A thupiak chu thok zaw gual ahi puai, “Ganchate natiang inle tâng chu a sukkhak ua leh, suang ah se’lup ding a hiu in”.

²¹A thil mu diu tizat a um bêk ziakin Mosi’n le, “Ka lau talua hen, ka kithing jak ziang hi,” a ti ahi. Zia mun ah chun nanghaw vang la ding puau a.

²²Himaleh, Zion tâng, Pathian hing khawpi, van Jerusalem, vansawlchâk simsênlote umna;

²³van ah min kikhum masate kikhopna, mi zosia chung ah vaihawmpa Pathian leh midikte thagau sukbukim ah umte kiang;

²⁴chuleh, thuthung thak palai Jesu, Abel thisan sâng ah thu phazaw gen ding ah thisan kithe’na kiang lam ah hung khawmte la hizaw ngal un.

²⁵Zia thugente chu doi lo ah la la um lona ding un chingthei un. Lei ah a kiang ua thugente doilote bawn in gawtna a pumpel lo ua leh, van ah kipat thu hung genpa chu a la kiheimang san leu hin, bangti suachât ding I hiu em!

²⁶A aw chun lei hi a hi’lîng kha ta’n; ahi’n, tu’vang hin, “Lei bep hilo, van tawh le khatvei hi’lîng ding ka hi,” ti’n a kitiam tangal a.

²⁷Zia thumal, “Hi’lîng ding ka hi,” a ti hin, thil kilînglote chu a um den theina dingin, a kilîng thei thilsiamte chu chawn mang hi’n a, ti a hiatsak hi.

²⁸Ziaziakchun, lenggam suklîng theilo chu chang I hi tâk ziak un, kipak thu gen hitiu; tichun, ja tak leh lau kawm in, Pathian ei pom tâk ding ah biakna chu nei thei bep ding I hingal un;

²⁹I Pathian uh hi mi kângtum thei meikuang ahi ngal a.