Read Vaiphei HEBRAITE 13 Bible Online

HEBRAITE 13 - Vaiphei bible

HEBRAITE 13

¹Kihepi tua zing un.

²Malzin khawtua ding sumsial kiu in; zia gual a bawlnau ah hin khenkhat in a het lo kâl un vansawlchâkte a la zintun kha sek uh ahi.

³Nanghaw le suangkul ah um gual ah kingai in, suangkul ah tângte chu hezing unla; sukgenthei ah um gual ah kingai in, sukgentheina thuakte chu hezing un.

⁴Mi zosia’n kichenna hi jau hen la, jalkhun le sukbuak hi ki’hen; tasualte leh ângkawmte chu Pathian in vaihawm piak ding ahi.

⁵La hindan uh chu ênna panglo hihen; la nei dan dan un lungawi unla; ama chun, “Hun thâtham pua’ng ka tin, hun nusia ngai pua’ng ka,” a tingal a.

⁶Ziaziakchun, ei un hangsan tak in, “Lalpa chu ei panpipa ahi, mihing in bangma ei law ding lau pua’ng ka,” I tithei ui.

⁷La hotuteu, Pathian thugente chu hezing un; a hinkhua mat danteu chu ngaituau inla, a ginnau chu enton in zui un.

⁸Jesu Khrista chu jani leh tu’ni leh kumtuang in a ngai ngai ahi zing hi.

⁹Thuhilna zat chuam taphot zui ziang kiu in; nêk leh dawn thu, a zuite â ding ah le phachuam lo haw hi ngaisak kiu in, lungthim hi vang kidoisakna suk-hat ah um sek ahi.

¹⁰Mâichâm I nei ui, a chung ah thillatte chu biakbûk nasêmte’n a nethei puau hi.

¹¹Gancha, a thisan gitlo thoina ding ah thiampu lianpen in a latte luang chu dâi pawlam in a hâl sek ui.

¹²Zia gual chun, Jesu’n le ama thisan ngei ah mite a hithiantho theina dingin kul kotkhak pawlam in a thuak tai.

¹³Ziaziakchun, ama a mu tawmnau chu pua’n, dâi pawlam in chia hitiu.

¹⁴Zia hin khawpi det I nei puau ah, khawpi hung tung ding chu I hawl zawu ahi.

¹⁵Ziaziakchun, ama ziak ah pakchat kithoina chu Pathian kiang in pia zing hitiu, zia chu ama min I puandawnau mûkte ga chu ahi.

¹⁶Ahi’n, thilpha hi leh kipanpitua ding hemil puai tiu, zia chu Pathian pom tâk kithoina chu ahi.

¹⁷La hotuteu thu mang unla, a nuai un kitulut un; amau in la thagau uh hun vêng bit ah, la chanchin uh hil ding ahi ngal un. Zia chu kipak tak leh thatho tak in sêm zawu hen, achutiloleh, nanghaw â dingin khawk zaw ding ahi.

¹⁸Kei â dingin ei pauchap piak un; sia leh pha hetna thiang tak ka nei ui ti ka hechian un, bangkim in dik tak ah um ka guau hi.

¹⁹Pathian in a vaima thei lam ah, la kiang ua ei sawlna dingin ei dot piak zaw diak un.

²⁰Tu’hin, chamna Pathian, Belampu lian, I Lalpau Jesu thina kipat kumtuang thuthung thisan jal ah kaithopa chun,

²¹a mit mu ah a kipakna gual ah Jesu Khrista jal ah nangmau ah sêm in, ama lung lam sêmdok dingin thilpha lam zosia’n hun subukim ta hen; ama kiang ah chun, lopina kumtuang kumtuang in um zing ta hen. Amen.

²²Ahi’n, suapite haw, zia thuhilna hi a la ngaithei hâm dingin ka don la hiu; la kiang ua thu chomcha’n ka hun zik ahi.

²³I suapipau Timothi le a pawt dawsak tau hi, ti a la hiau in; ama a hung vak leh ama tawh hung in nang uh hung mu’ng kau.

²⁴La hotuteu leh mithiangtho zosia chibai ka bûk ui. Itali mite hin le a hun bûk ui.

²⁵La leng ua chung in hepina um ta hen! Amen.