Read Vaiphei HEBRAITE 2 Bible Online

HEBRAITE 2 - Vaiphei bible

HEBRAITE 2

¹Ziaziakchun, nakhang ah I thu hiatteu kha I ngaikhawk zaw diak ding uh ahi; chutilochun, kitawlmang san kha tawl hitiu.

²Vansawlchâkte mang ah thu kigen kha bawn a det ah, bawsiatna leh thu awi lona zosia thukna dik tak a mu têi sek ua leh,

³zia gual lawm ah hukdamna lopi hi ngaisak lo in um leu hin, bangti’n suakcha thei ding I hiu em? Zia chu a tîl in Lalpa kam ah gen ahi tangal ah, a hete chun ei namdet piak uh ahi.

⁴Pathian in tepte’na leh thilmak chi chuam chuam leh, ama’n pha a sak dungzui ah Thagau Thiangtho thilpiakte chu a piakbe nalai a.

⁵Khawvel hung tung ding chung thu I gen uh hi, vansawlchâkte nuai in a koi puai.

⁶Himaleh, mi pakhat in mun khat ah zia gual hin a la gen a: “Mihing hi bang ahia hem, chuti lawm ah la het zing sek? Mihing a thithei mai hile bang ahia hem, chuti lawm ah la kanthâk sek hi?

⁷Amau chu vansawlchâkte sâng ah nuainung zaw deu in la siam tadi in, lopina leh za umna la khuk sak in, a keng nuai ah bangkim la koi a,” ti in.

⁸Tichun, a keng nuai ah bangkim a koi ziakin, a nuai ah koi lo bangma a khek ta puai. Himaleh, tu’ ziang ah hin chu bangkim a nuai ah um in I mu nai puau hi;

⁹himaleh, Jesu chu vansawlchâkte sâng ah niam zaw koi ah um tadi chu, Pathian hepina ah mitin â ding ah thina chu a tepna dingin, thina chu a hung thuak ah, choihoina leh za umna hung chang ta chu I la mu tau hi.

¹⁰Ama ah thil bangkim um leh, thil bangkim ama ah umpa â ding ah chun, cha tam tak lopina a puilût ah, hukdamna mapuipa kha thoknate ziak ah a siam bukim chu a kilawm him ahi.

¹¹Hi’thiangthopa leh a hi’thianthote chu Pa pakhat ah kipat pawt ahi ngal un. Ziaziakchun, Jesu chun amau chu suapite a ti’ ding a zakcha puai.

¹²Zia gual hin a la gen a: “Ka suapite lak in la min chu, taklang ing ka tin, a kikhawmte lak ah chun La sa’n pâk ing ka,” ti in.

¹³Chuleh, “Ama ah chun ka ginna nga’ng ka,” a ti’n. Zia lo ah chun, “Entia, kei leh Pathian in ei piak naupangte hi,” a ti kit ngen a.

¹⁴Naupangte chu taksa leh thisan changte ahiziak un, ama ngei inle zia ma chu a hung chang a; thina ziakin thina chung ah thuneipa Diabol chu a sukmanthai theina ding in.

¹⁵Chuleh, thi lau ziak ah dam sung suak ah umte chu a thâdaw theina ding in.

¹⁶A ngaikhawk ah, a panpi guatte chu vansawlchâkte ahi puau in, Abraham suante ahi zawu hi.

¹⁷Ziaziakchun, mihingte gitlo thupha choina a siam theina dingin, Pathian lam ah thiampu lianpen, jangai thei leh ginum a hi’theina dingin thil bangkim ah a suapite gual ah a hung kisiam chu a kul him ahi.

¹⁸Ama ngei chun patepna a la thok tâk ziakin, patepna tuakte chu a panpi thei hi.