Read Vaiphei HEBRAITE 3 Bible Online

HEBRAITE 3 - Vaiphei bible

HEBRAITE 3

¹Ziaziakchun, suapi thiangtho, van kona chanpite haw, I thugin ua sawlchâk leh thiampu lianpen Jesu chu ngaitua tiam un.

²Pathian Insung zosia ah Mosi a gin um pen gual in, ama le ama guatpa lam in a ginum hi.

³Insapa chu a In sak sâng ah a lopi zawk gual in, Jesu hi Mosi sâng ah lopina chang tâk zaw ahi.

⁴(In zosia hi a satu a um chiat ah, bangkim Siampa bo chu Pathian a hi.)

⁵A vainung ah gen ding ah hiatsakna dingin Mosi chu Pathian Insung zosia ah nasem ahi’na ah chun a ginum pen hi.

⁶Himaleh, Khrista chu vang ama Insung in Chapa hi’ in a ginum hi; ama I muan ngamnau leh ama ah I kinepnau ah kipakna chu I tukdet zing ua leh ama Insung mite chu I hiu.

⁷Ziaziakchun, Thagau Thiangtho in; “Tu’ni hin a aw la het ua leh,

⁸gamthip ah patepna ni ah suklungnat gual uh khan, la lung uh tâksak kiu in.

⁹Kum sawmli sung ka thilbawl a la mu zing lai unle, la pu leh pateu khan ei la patep un;

¹⁰ziaziakchun, zia mite chung ah khan ka lung a dam pua’n, ziaziakchun, ‘A lungthim uh a chiakhial zing ah, ka lampi le a hepuau hi,’ ka la ti ahi,” ti in.

¹¹“Ka cholna chun lut pua’n au, ti’n lungna tak in sia ka sam ta ahi”. Ti’n a gen a.

¹²Suapite haw, chingthei tau in; chutilochun, Pathian hing chu kiheisan dingin la lak un kua chung inle ginlona lungthim gilo tak hung um kha’n a.

¹³La lak ua kuale gitlo thepthâk ah lung tâk la um lona ding un, “Tu’ni,” kiti hun chu a um sung in, nisi’n in kitîlhat zing tau in.

¹⁴A tîl ah kipat I ginnau kingakna kha a tawp tiang ah I tûkdet ua chun, Khrista kikoppite chu I hitau hi.

¹⁵“Tu’ni hin a aw la het ua leh, a phengphel lai gual uh khan, la lung uh tâksak kiu in,” a ti sung ah hin.

¹⁶Ahileh kua a hiu em, a aw he ngal ah hel nalaite chu? Aigupta ah kipat Mosi’n a hun puidawte kha hilo a hiu em?

¹⁷Kuate chung ah a hem kum sawmli lungdamlo ah a um kha? A lak ua gilote gamthip ah a luang uh lumte kha hilo a hiu em?

¹⁸A thu manglote chung ah a hilo ngal leh, kua dang kiang ah, a cholna lut lo dingin thu a la tiam ah a hem?

¹⁹Tichun, a gin lo ziak un a lut thei ta puau hi, ti I mu tau hi.