Read Vaiphei HEBRAITE 5 Bible Online

HEBRAITE 5 - Vaiphei bible

HEBRAITE 5

¹Thiampu lianpen taphot chu, gitlo kithoina leh thilpiak lân dingin Pathian lam thilte ah, mihingte matchâk dingin têldaw ah namdet a hiu in.

²Ama le hatlo thei tho ahiziak in, bangma helo leh thil hi’khialte chung in lungsiatna a nei thei hi.

³Ziaziakchun, mite â ding ah a lat gual in ama â ding inle gitlo kithoina chu a lat a ngai hi.

⁴Aron gual ah Pathian in a ko ahilo chun, kuama’n zia choihoina hi a kilâk ngai puau hi.

⁵Zia gual ma chun, Khrista le thiampu lianpen hiding in ama a kichawisâng puai: “Nang ka chapa la hi’n, tu’ni hin ka hun hing la hi,” tipa khan a choisa’n ahi zawi.

⁶Mundang a chun hiti hin a gen kit a: “Melkisedek guat dan gual in, kumtuang thiampu la hi,” ti in.

⁷Ama chun taksa a um lai khan thina kipat hukdok theipa kiang in, nasa tak ah kiko leh mitthi pum in pauchapna leh ni’na a lân ah, Pathian ki’châk dan a het ziakin ngaithâk in a um hi.

⁸Chapa hilehle a thoknate ah chun thu awi dan a zil a.

⁹Chutichun, sukbukim ah um in, a thu awi tapote â dingin kumtuang hukdamna siampa,

¹⁰Pathian in a ko, Melkisedek gual ah thiampu lian ding ah guat chu ahi tai.

¹¹Ama chanchin gen ding tampi um maleh, hilchian a hak sai, hetna lam ah la mawl ziak un.

¹²A hun ngaitua in vang zilsakpa hithei ding hialte la hitau hi; himaleh, Pathian thubul pen ah kipat hun hil ding mi la ngai zaw na lai ui; bugum nethei nailo in, nawitui ngai nalai gual la hiu hi.

¹³Nawitui ngansia nalai taphot chu, nausen ahi nâklai ziakin, dikna lam thu ah bangma hiattheina nei nai lo ahi.

¹⁴Bugum ahileh vang pitingte â ding ahi; amau chun sia leh pha hekhen thei dingin a hiattheinau chu sawizoi in a mang thei tau hi.