Read Vaiphei JAKOB 1 Bible Online

JAKOB 1 - Vaiphei bible

JAKOB 1

¹Jakob, Pathian leh Lalpa Jesu Khrista suak hin, nam sawm leh ni kithejakte chu chibai ka bûk hi.

²Ka suapite haw, patepna bang gual la tuak unle, kipakna lam bep in ngai un,

³la ginnau patepna chun thok-hatna a siam hi ti la he ngal un.

⁴Bangma tasam lo ah la bukim ua, la bittheina ding un thok-hatna chun sêm bukim ta hen.

⁵La lak ua kua’n le pilna a tâksap chun, mi zosia kiang ah phal tak leh îtcha lo ah pepa Pathian kiang in don un, tichun piak in um in lau.

⁶Himaleh, ginglel lo hial in ginna’n don un; a ginglel mi chu tuisuagiat kinawk, hui in a mut lumlet tawhbang ahi ngal a.

⁷Zia gual mi chun Lalpa ah kipat bangma mu kinem ki’hen;

⁸ama chu lungthim thua nei, a thil hi zosia ah det lo ahi ngal a.

⁹Gingtu, dinmun niam tak ah um chu choisa’n ahi tâk ziakin kipak hen la,

¹⁰mihausa chu hi’niam ah a um ziakin kipak hen; mi hausa chu loulai ah hampa pâk gual ah mangthai ding ahi ngal in.

¹¹Nisa a hung suak ah, a satna’n loulai a hun kâng vuai ah; a pâkte chu a pultha’n, a hoinate chu a bei sek hi. Mihausa chule zia gual tho chun, hinkhua buaina lak ah a um zing lai un vuaitha ding a hiu.

¹²Thepna thuak ham ham mi chu mi hampha ahi. Zia gual mi chun patepna chu a thuakzo ta’n, LALPA‘n ama hepite â ding ah a tiam, hinna lallukhuk chu chang ding ahi.

¹³Kuama’n patepna a tuak lai in, “Pathian in ei thep ka hi,” ti ki’hen; Pathian chu gitlona thep gual a hipua’n, ama’nle kuama a thêm ngai pawngal a.

¹⁴Mi chu ama nopna ah puiman leh hîp ah a um phat leh, zia chun thep in a um sek ahi.

¹⁵Zia nopna chun no a hun pâi in, gitlona a hing sek a; gitlona chu a hung pitin phat leh, thina a tun sek hi.

¹⁶Ka doitakte haw, thep zaw in um kiu in.

¹⁷Thilpiak pha leh thilpiak buting taphot hi chung lam ah kipat, vâkte pa kiang ah kipat ahi’n, ama chu danglam lo leh thimna umlo ahi.

¹⁸A thilsiamte lak ah ga masa I hung hi’theina ding un, ama doi gual sukbutinna’n, thutak ah chun ei hing tai.

¹⁹Ka doitakte haw, zia hi hiau in: Kam chungnun chu’lo leh lungna vak lo in, mitin in a ngaithâk kilawp un.

²⁰Mihing lungnatna’n Pathian dikna a sua pawngal a.

²¹Ziaziakchun, a buak leh umdan phalote chu koimang unla, thu kiphu det, la thagau uh hukdam thei chu thunuaigol tak in pom un.

²²Thu chu ngaitha mai ah nangmau kithêm lo in, thu chu sêmdok zaw tau in.

²³Kuale thu chu ngaitha ngal ah sepdaw neilote chu, mi, lîmet ah ki-en gual bep a hiu in;

²⁴a ki-en ah, a chia mang un, bang gual a hiu a kihemil kit ngal sek gual chu a hiu.

²⁵Himaleh, kuale dan buting, zalenna dan chu pha tak ah en ah, thuak-hat tak ah, a ngaithâk zaw leh hemil kit ziang lo ah sêmdok zaw te chu, zia mite chu a thil hiu ah maljawl in um ding a hiu.

²⁶Kuale sakhua ngaisak ah kingai ngal ah, a leiteu veng lo ah, a lungthim ua kithêm zaw te chu, amau sakhua chu bangmalo mai ahi.

²⁷Pathian leh Pa mit mu ah sakhaw thiangtho leh sukbuak lo chu zia hi ahi: nauchagate leh meithâite a genthei lai ua kanthâk leh khawvel kisukbuak sak lo hi ahi.