Read Vaiphei JAKOB 2 Bible Online

JAKOB 2 - Vaiphei bible

JAKOB 2

¹Ka suapite haw, mi doichuam nei tak ah um zing kawm in, I Lalpau Jesu Krista lopi tak chu la gingcha tak tak thei nau em?

²La kikhopnau ah mi pakhat, sana khutsebi but leh puan hoi tak sil in hung lut hen la, migenthei, puan nen tak sil pakhat hung lut kit taleh;

³puan hoi sil zawk chu limsak in, “Zia hin hung kichu’n,” ti’n, migenthei kiang ah chun “Zia son dingin,” ahiloleh, “Ka keng bul ah hin kichu’n,” la tiu leh,

⁴la lak ua doichuam nei ah, ngaituana phalo pu ah vaihawm hi talo ding la hiu em?

⁵Ka suapi doitakte haw, ngai un. Pathian in zia khawvel ah gentheite hi ginna ah hausa ding leh, a hepite kiang ah a tiam lenggam chu lua ding ah a têl hilo a hem?

⁶Himaleh, nang un migentheite chu la simmaw tau hi. Nang uh hun nuaisia sekte chu mihausate hilo a hiu em? Vaihawmna ah hun kai lut sekte le amau hilo a hiu em?

⁷Min chungnung la put uh hun demsia sekte chu amau haw chu hilo a hiu em?

⁸Pathian Lekhathu’n, “Nangma la kihepi gual in la Invêngte hepi in,” ti lenggam dan chu la zop ua leh a bawlpha hi’n lau.

⁹Himaleh, khenchuam la nei ua chun la gilo ngal un, dan botsia ti in dan chun thiamlo a hun chan tai.

¹⁰Kua’n le dan chu zui kim maleh, mun khat ah a hi’khial chun a leng in maw in a.

¹¹“Ângkawm kin,” tipa chun, “Tual that kin,” le a tingal a. Tichun, ângkawm lo ma lechin tual la tha leh dan botsia la hi tho tho tai.

¹²Ziaziakchun, la thugen leh thilbawl un, zalenna dan ah vaihawm piak dingte gual in hisek un.

¹³Jangaina neilo chu jangaina bei ma’n vaihawm piak hi’n ah; jangaina chun vaihawmna a zo sek hi.

¹⁴Ka suapite haw, ginna ka nei hi ti’n, nasep la neilo chun bang a phachuam diam? Ginna chun a hun hukdam thei diam?

¹⁵Suapite pakhat ngawnchang in um hen la, nêk ding tasam taleh;

¹⁶la lak ua pakhat chun a kiang in, “Thamuang tak in chia’n la, lum tak leh vâ tak in um ta’n,” ti hen la, a taksa â ding ah mamawte pia diak lo leh bang a phachuam diam?

¹⁷Zia gual ma chun, ginna bep, nasep neilo chu a thisa ahi.

¹⁸Ahi’n, mi pakhat in, “Nang in ginna la nei ah, keima’n nasep ka nei hi,” ti taleh, la ginna chu la nasep panglo in ei etsak in; keima’n ka nasep in ka ginna hun etsak ing ka.

¹⁹Pathian chu pakhat ahi ti la gingcha, la bawl phai. Thithate’n le a gingchau ah, a kithing sek uh ahi.

²⁰Nang mingol, nasep neilo ginna chu bangma ei puai, ti la he nuam em?

²¹I suantu bul uh, Abraham in a chapa Isak mâichâm ah a lat lai khan, a thil hi ziak ah thiamchang hilo a hem?

²²Ginna’n nasep tawh a sêm khawm ah, nasep ziakin ginna chu a bukim ta ahi, ti I mu thei ui.

²³“Abraham in Pathian a ging ah, zia chu ama â dingin dikna ah ngai ahi,” ti Pathian Lekhathu chu sukbukim ahi tai; tichun, ama chu Pathian gualpa sak in a um tai.

²⁴Ginna ziak ngawn hilo in, a nasep ziak zaw’n mi thiam a chang sek hi ti la he tau hi.

²⁵Zia gual ma chun, nawchizuaknu Rahab khan le, enthate a la lop in, lam chuam ah a la chiasak lai khan, a thilbawl ziak ah thiamchang hilo a hem?

²⁶Thagau panglo ah taksa chu a thisa ahi gual in, nasep panglo ah ginna chule a thisa ahi.