Read Vaiphei JAKOB 3 Bible Online

JAKOB 3 - Vaiphei bible

JAKOB 3

¹Ka suapite haw, la lak ua mi tam takte hi hotu hi’ kithalawp kiu in, hotute chun vaihawmna khau zaw diak tuak ding I hiu ti la he ngal un.

²Thil tampi I sukhial kha sek ngal un. Kua’n le thugen lam ah a hi’khial lo chun mi bukim leh a taksa thuzaw mi ahi.

³I Thuu a mat theina ding un, sakol chu a kam kaina I bul leh, a taksa pumpiu I thunun thei sek ui.

⁴Longte hile en ma tiam un, a lian ma mau in, hui hât tak in a mut tawl tawl thei hi; himaleh, Lawnghêkte’n a hêk kawina neucha chun a nopna lam lam a zotsak thei hi.

⁵Zia gual ma chun, Lei hile taksa bâk neucha ahi; himaleh, nasa tak in a kisuang sek hi. Meikuang neucha’n gammâng a kâng sia nasa na e!

⁶Lei hi meikuang ahi. Lei hi I taksa bâkte lak ah gitlona bûk ahi’n; taksa zosia a subuak ah, pianken nungchang zosia a kâksak ah, zia ma chu gawtmun mei in a kâng sek hi.

⁷Gamsa leh vacha chitin, ganhing leh tuisuagiat ah ganhing chitin umte chu mite’n a vâkngam sek un,

⁸himaleh, Lei hi kuama’n a vâkngam thei puau hi; nunsia, um hiat hiat theilo, thina gu ah dim ahi.

⁹Zia chun Lalpa leh Pa chu I chawihoi un, zia ma ma chun Pathian mêlpu ah siamte chu hânsia I law sek uh ahi.

¹⁰Kam pakhat ah kipat choihoina leh hânsia a pawt khawm sek hi. Ka suapite haw, chuti ding chu hilo ahi.

¹¹Tuinâk pakhat ah kipat chun tui thum leh tui khâ a pawt khawm thei em?

¹²Suapite haw, theichang kung ah Oliv a hem, grep gui ah theichang a hem a ga ngai em? Chitui inle tui thiang a pawtsak thei diak ta puai.

¹³La lak ua pil leh hethiam a um awm? Umdan pha tak ah la thil hi phatteu chu pilna ah kipat nunnemna tawh etsak un.

¹⁴Ahi’n, la lungthim ua thangsiatna leh nangmau bep kikhualna la nei ua leh, kiletsak in thutak chu zuau chansak kiu in.

¹⁵Zia tawhbang pilna chu chung lam ah kipat hung suk a hipua’n, khawvel leh lei thil, diabol ah kipat ahi zawi.

¹⁶Thangsiatna leh eima makhua bep khualna ah chun buaina leh thilhikhelna chitin a um sek ngal a.

¹⁷Chung lam ah kipat pilna hung suk chu vang, a masa’n a thiangtho ah, kicham a nuam ah, a nunnem ah, a thunung thei ah, hepina leh ga pha’n a dim ah, doichuamna leh dawha him him panglo ahi.

¹⁸Dikna ga luak chu chamna tu’ ahi’n, zia chun chamna a siam hi.