Read Vaiphei JAKOB 5 Bible Online

JAKOB 5 - Vaiphei bible

JAKOB 5

¹Tu’hin, mi hausate haw, la chung ua thokgimna hung tung dingte ziakin kap in mau un.

²La goteu chu a muat ta’n, la puanteu le leikha’n a ne zo tai.

³La sana leh dangkateu chu a tuiêk zo ta’n; a tuiêk chu la diklonau hiatsakna hi’ntin, meikâk gual in la taksau chu hun ne zo in a. Ni nunungte â dingin go la kikhol khawm tau hi.

⁴Ngai un! La lou uh tho ah sum thalawte thaman, dawha la tuktân piakteu chu a kikodok tau hi; bu âtte kiko chule sepai honte Lalpa nakhang in a lût tai.

⁵Lei chung ah buting leh nopsa tak in la khawsau in; gan la tha niu ah chun la lungthim uh la hilim ui.

⁶Midik chu thiamlo chansak in, la that un; ama’n la a hun do pua’n.

⁷Chutichun, suapite haw, Lalpa hung masia thuak-hat tak in um un. Louneitu chun gawtui kia masa leh nunung chu a mu masia, thuak-hat tak in leiga pha tak chu a ngâk sek hi.

⁸Nang uh le thuak-hat tak in um un. La lung uh hi’det un, Lalpa hungna ding a nai tangal a.

⁹Doitakte haw, vaihawm khum ah la um lona ding un, kiphun khum kiu in. En un, vaihawmtu chu kotkhak bul in a ding tai.

¹⁰Doitakte haw, Lalpa min ah thugen jawlneite chu thokna leh thok hatna lam ah chun etton in nei un.

¹¹Ahi, a thuak-hatte chu hampha I ti sek ui. Job thok-hat dan kha la hiau ah, Lalpa thil guanggal dan kha le la muu hi; Lalpa chu hepina leh jangaina dim ahi dan le la he tau hi.

¹²Zia zosia chung ah chun, ka suapite haw, van a hem, lei a hem leh thil dang him him sal in kihaksial kiu in. “Ahi,” la tiu chu ahi hi mai hen la, “Hilo,” la tiu chu hilo hi mai hen; thiamlo la chanlona ding un.

¹³La lak un haksatna thuak a um awm? Pauchap uh hen. A kipak a um awm? Pâkna La te sau hen.

¹⁴La lak ua damlo a um awm? Kochuam upate kosak uh hen la, Lalpa min ah sathaunu’ in pauchap khum uh hen.

¹⁵Ginna pauchapna chun damlo chu hukdam intin, LALPA‘n amau chu kaitho in a; chun, gitlo a la bawl taphot le ngaidam piak hi’n au.

¹⁶Chutichun, sukdam ah la umtheina ding un, la gitlonateu thupha kichawi tuau in la, kipauchaptua piak un. Midik pauchapna chun thil ahi’thei ah, a phachuam hi.

¹⁷Elijah kha eimau gual tho ah mihing ahi’n, ama chun guazuk lona dingin phatchuamngai tak in a pauchap a; tichun, kum thum leh thaguk sung lei chung ah gua a zu ta puai.

¹⁸A pauchap kit leh, van in gua a zuksak ah, lei in a gate a piansak ta ahi.

¹⁹Ka suapite haw, la lak ua mi kuale thutak ah kipat pêt mang ta chu, kua a hem in pui kik taleh,

²⁰migilo a vâkmanna ah kipat pui kit taphot chun, migilo chu thina kipat a thagau hukhing intin, gitlo tam tak le liakhu in ah, ti he tau in.