Read Vaiphei 1 PETER 5 Bible Online

1 PETER 5 - Vaiphei bible

1 PETER 5

¹Chutichun, la lak ua kochuam upate chu, keima la upatpiu, Khrista thoknate he pa, lopina chang dingpa hin, la lak ua upate chu ka hun tîl ahi.

²La khut ua vopsak ah um, Pathian belam hon chu chingtup un; hi’ ding a hiziak bep hilo in, Pathian thu gual ah thanuam tak zaw’n, lawkna hawl ziak le hilo in, lungthim ah dawi tak zaw’n,

³la chanteu chung ah kilalsak lo in, pawlte etton ding ah kisiam zaw’n, kaihuai un.

⁴Tichun, Belampu Lianpen a hung kilat phat leh, lopina lallukhuk chultheilo chu mu’n lau.

⁵Zia gual ma chun, khangdawng nalaite haw, upate nuai ah kitulut un. Ahi, la leng un na kiseptua piak chiat dingin thunuaigolna’n kivan unla: “Pathian in kiletsakte chu a dodâl in, kingaitawmte vang hepina a pesek hi,” ti ahi ngal a.

⁶Ziaziakchun, a hun tak ah a hun chawihoi theina dingin, Pathian khut hât tak nuai in kikoi niam un.

⁷La lungkhamnau zosia ama chung ah septhau in, ama’n la khan khua ding uh a gêl nai.

⁸Pilvâng tak in chingthei un; la mêlmau Diabol chu sakeibaknei kitum gual in a nêk ding hawl in a vâk vêl vêl hi.

⁹La suapiu khawvel ah umte zosia chung ah zia gual thoknate chu a tung hi ti hia’n, gingdet tak ah um in, ama chu do un.

¹⁰Chun, hepina zosia Pathian, a kumtuang lopina chang ding ah Khrista ah hun kopa ngei chun, sawt lo la thok zaw phat ua leh hun tungding in, hun hi’det in, hun hi’hat ding ahi.

¹¹Ama kiang in thilhitheina kumtuang in um ta hen. Amen.

¹²Ka suapi ginum tak ah ka ngainat, Silvana khut in, nang uh tilkhau ah, zia chu Pathian hepina tak tak ahi ti hia’n, chomcha la kiang un ka hun zik hi; zia chun ding det un.

¹³Babulon ah um, la kochuam chanpiteu hin chibai a hun bûk ui; zia gual ma chun ka chapa Marka’n le a hun bûk hi.

¹⁴Hepina kichawp in chibai kibûk un. Khrista ah um tapote kiang in chamna um ta hen.