Read Vaiphei 1 JOHAN 4 Bible Online

1 JOHAN 4 - Vaiphei bible

1 JOHAN 4

¹Doitakte haw, thagau zosia taksang kiu inla, thagaute chu Pathian ah kipat a hiu em ti enchian zawu in; khawvel ah hin jawlnei lêm tam tak a pawtdok tangal un.

²Zia gual hin Pathian Thagau chu la hethei ui: Jesu Khrista chu taksan a hung hi, ti dinpi thagau zosia chu Pathian ah kipat ahi’n;

³chuleh, Jesu Khrista dinpi lo thagau zosia chu Pathian ah kipat ahi puai. Zia chu Khrista dodâl thagau chu ahi, zia chu hung ding ahi ti la hiatsau ahi’n; tu’hin le khawvel in a um tai.

⁴Naute haw, Pathian ah kipat la hiu a, ziate chu la zo tau hi; nangmau ah um chu khawvel ah um sâng ah chun a hatzaw ngal a.

⁵Amau chu khawvel ah kipat a hiu in; ziaziakchun, a thugen uh chu khawvel ah kipat ahi’n, khawvel in a ngai nuam ui.

⁶Ei uh vang, Pathian ah kipat I hiu hi. Pathian he taphot chun I gen uh a ngai un, Pathian ah kipat hilote chun I gen uh a ngai nuam puau hi. Zia hin Thagau dik leh thagau dik lo chu I hekhen thei ui.

⁷Doitakte haw, kihepi tua chiat hitiu; hepina hi Pathian ah kipat a hingal a; kuale hepina nei chu Pathian ah piang ahi’n, Pathian chu a hia’i.

⁸Kuale hepina nei lo chun Pathian chu a hepuai; Pathian chu hepina ahi ngal a.

⁹Pathian hepina chu I lak un zia gual hin tâklat ahi tai: Pathian in a Chapa neisun khawvel in a hun sawl ah, ama ah I hintheina ding un.

¹⁰Zia hin hepina chu a um hi, ei un Pathian I hepiu hilo in, ama’n ei hepi ah, I gitloteu thupha choina dingin a Chapa a hun sawl hi.

¹¹Doitakte, Pathian in zia gual lawm ah ei hepi chun, eihaw le I kihepitua chiat diu ahi.

¹²Kuama’n Pathian a mu kha nai puai; I kihepitua chiat ua chun Pathian chu eimau ah um in, a hepina chu eimau ah a hung bukim ahi.

¹³Ama’n a Thagau ei piak tâk ziakin, ei uh ama ah um in, ama le eimau ah a um hi, ti I hethei ui.

¹⁴Pa chun Chapa chu khawvel Hukdampa hiding in a hun sawl hi, ti ka muu ah, ka hiatsak uh ahi.

¹⁵Jesu chu Pathian chapa ahi, ti dinpite kiang in Pathian a um a, amau le Pathian ah a um ui.

¹⁶Tichun, Pathian in ei hepina chu I hiau ah, I gingcha tau hi. Pathian chu hepina ahi’n, kuale hepina ah um chu Pathian ah um ahi’n, amau ah le Pathian a um hi.

¹⁷Zia hin hepina chu eimau ah a bukim tai: vaihawmna ni ah I hân san theina ding un, ama gual ah khawvel ah I um ziak un.

¹⁸Hepina ah chun launa a um puai, hepina bukim chun launa a nawdok zawi; launa hi gawtna ziak ahi’n, kuale launa nei chun hepina bukim a nei puai.

¹⁹Ama’n ei hepi masak ziakin I hepiu ahi.

²⁰Kuale, “Pathian ka hepi hi,” ti ah, a suapiteu hua chu juauthei a hiu; a muzing a suapiu bawn hepilote chun, a mu lo uh Pathian chu a hepi thei puau hi.

²¹Ama ah kipat zia thupiak hi I nei uh ahi: Pathian hepi taphot in a suapiteu le a hepi diu ahi, ti hi.