Read Vaiphei VAIHAWMTE 1 Bible Online

VAIHAWMTE 1 - Vaiphei bible

VAIHAWMTE 1

¹Tu’hin, Joshua thi’nung in Israel chate’n LALPA kiang in, “Keihaw lak ah Kanaan mite do ding ah kuan to masa ding leh amau vado masa ding chu kuate ka hiu em?” ti’n a dong tau a.

²LALPA‘n a kiang un, “Judah kuan to hen; ngaitia, a gam chu ama khut in ka pia ta ahi,” a tia.

³Chuleh, Judah chun a suapipa Simeon kiang in, “Ka gam chan sung tiang in ei hung zui in, Kanaan mite vado hi tin, zia gual ma chun, ke’nle nang gam channa sung tiang in hun zui ing ka,” a tia. Tichun, Simeon chun a vazui tai.

⁴Judah chu a kuan to ah, LALPA‘n Kanaan mite leh Periz mite chu a khut in a pia ta’n; Bezek ah chun mi sîng khat a vathat tau a.

⁵Bezek mun ah chun Adoni-bezek a kituakpiu ah, chuleh, a kidopiu ah; Kanaan mite leh Periz mite chu a zo tau hi.

⁶Adoni-bezek chu a jam mang ta’n; himaleh a delzui pek ua, a man tau ah; a khutpi leh a kengpite a tan piak tau a.

⁷Ziaphatchun, Adoni-bezek in, “A khutpiu leh a kengpiu kitan, lal sawm sagi in ka dawkan nuai ah sa leh anmal a la luak sek un; amau chung ah ka bawl gual gual in Pathian in keile ei thuk ta a hi,” a tia. Chun, ama chu Jerusalem ah a pui tau ah, zia mun ah chun a thi den tai.

⁸Ziaphatchun, Judah suante’n Jerusalem a do un, a la tau ah. Chutichun, chemjam in a that gam un, a khawpi chu mei in a hâl tum tau hi.

⁹Ziazaw chun, Judah mite chun tâng gam, Negeb leh phâigam ah chêng Kanaan mite do dingin a kuan suk tau a.

¹⁰Hebron mun ah chêng Kanaan mite do dingin Judate chu a kuan tau ah (zia Hebron chu malai in, Kiriath-arba a kiti sek hi.) Zia tak ah um Sheshai, Ahiman leh Talmaite chu a that tau hi.

¹¹Zia tak ah kipat chun Debir khua do dingin a kuan tau ah; zia lai ah chun Debir mun chu Kiriath-sepher a kiti sek a.

¹²Chuleh, Kaleb in, “Kuale Kiriath-sepher vado ah, vala zo a um chun, ka chanu Akhsah hi a ji dingin pia ding ka hi,” a ti’n.

¹³Kaleb suapipa, Kenaz chapa Othniel chun a vazo ta’n; tichun, a chanu Akhsah chu a ji dingin a pia tai.

¹⁴Amanu chu a kiang ah a hung phatin a pa kiang ah lou gam don dingin a tîl ta’n; amanu chu a sabiltung chung ah kipat a hung kum suk phatin, Kaleb in a kiang ah, “Bang a hem la dawi?” ti’n a la dong ta.

¹⁵Amanu chun a kiang in, “Thil khat ei pia’n; nang in Negeb gam ah chêng ding lei ti’ngâl chun, Gulloth-mayim le ei pekhawm ngâl in,” ti’n a don a. Tichun, Kaleb inle Gulloth saknung leh Gulloth thangnung chule a pia tai.

¹⁶Chun, Kent mi Hobab, Mosi sungpa suante leh Judah suante chu tûm thing khawpi, Jeriko lam ah kipat chun Arad mallam ah um, Judah gamthip lam in a chia to tau ah; a gam ah chêng Amalek mite lak ah chun a chêng den tau hi.

¹⁷Chuleh, Judah chu a suapipa Simeon tawh a chiau ah, Zephath khua chêng Kanaan mite chu a do zaw phat un, nasa tak in a suchimit tau a. Chuleh, a khawpiu chu hânsia lawkhum in, a min chule Hormah a sak tau hi.

¹⁸Judah in Gaza leh a gam zosia, Ashkelon leh a gam zosia, Ekron leh a gam zosia chule a la zo tai.

¹⁹Chun, Judah chu LALPA‘n a umpi ah; chutichun, thingtâng gam ah chêngte chu a nawdok ta’n; himaleh, phâijang ah chêngte chu thik kângtalaite a nei ziak un, a nawdok zo puai.

²⁰Mosi’n a la gen gual in, Hebron chu Kaleb a pia tau ah; zia kipat chun ama’n Anak chate pathum chu a nawdok tai.

²¹Ahi’n la, Benjamin chate’n vang, Jerusalem ah chêng Jebus mite chu a nawdok puau ah; ziaziakchun, Jebus mite chu tu’ni tiang ah hin Benjamin suante tawh Jerusalem in a chêng khawm tau hi.

²²Chun, Joseph Inkuante le Bethel do dingin a kuan to un; chuleh, LALPA‘n amau chu a umpi zing a.

²³Joseph Inkuante chun Bethel entha ding a sawl ua (Bethel chu masang lai ah khan Luz a la kiti sek ahi.)

²⁴Enthate chun khawpi ah kipat mi pakhat hung pawtdok a mu tau ah, a kiang in, “Lungsiat tak in khawpi sung lutna ei hil in, kei unle pha tak in hun bawl na’ng kau,” a tiu a.

²⁵A ma’n khawpi sung lutna chu a hil phat in, khawpi chu chemjam ah do in a la tau ah. Ahi’n la, zia mipa leh a Inkuanpite zosia chu a thâdok tau hi.

²⁶Chuleh, zia mipa chu Hitte gam lam in a chia ah, khawpi khat a va siam ta’n, a min in Luz a sak ah; zia min chu tu’ni tiang hin a puzing tai.

²⁷Chun, Manasseh inle Beth-shean leh a khawpel ah chêngte, Taanakh leh a khawpel ah chêngte, Dor leh a khawpel ah chêngte, Ibleam leh a khawpel ah chêngte leh Megiddo leh a khawpel ah chêngte chu a nawdok pua’n; zia Kanaan mite chu gam sung in a chêng zing tau ahi.

²⁸Israelte a hung hat phat un, Kanaan mite chu nasêm in a hun mang tau ah; a nawdok ta puau hi.

²⁹Ephraimte’n le Gezer mun ah chêng Kanaan mite chu a nawdok puau ah; Kanaan mite chu Gezer mun ah a lak un a chêng den tau hi.

³⁰Zebulun mi te’nle Kitron mun ah chêngte leh Nahalol mun ah chêngte chu a nawdok diak puau a; Kanaan mite chu a lak un a chên den sak ua, a nasêm un a pansak tau hi.

³¹Asherte’nle Akko mun ah chêngte, Sidon mun ah chêngte, Ahlab mun ah chêngte, Akhzib mun ah chêngte, Aphik mun ah chêngte leh Rehob mun ah chêngte chu a nawdok diak puau a;

³²ahi’n, Asherte chun Kanaan mite chu a naw daw lo ziak un, a lak un a chêng den tau hi.

³³Naphtalite’nle Beth-shemesh ah chêngte leh Beth-anath ah chêngte chu a nawdaw lo ziak un, Kanaan mite lak chun a chêng den tau a. Tichun, Beth-shemesh leh Beth-anath ah chêngte zosia chu amau thunuai ah um in, a nasêm un a pansak tau hi.

³⁴Chun, Amor mite’n Dan suante chu thingtâng gam in a naw lut kit tau ah; phâicham lam ah a hung suk ding uh a za nuam ta puau hi.

³⁵Amor mite chu Har-heres, Aijalon leh Shaalbim ah in a chêng zing nalai ua; ahi’n la, Joseph Inkuante’n a thunuai ua koi in, a nasêm un a pansak tau hi.

³⁶Amor mite gamgi chu Akkrabim kalto’na kipat leh Sela kipat mallam kâi cheng chu ahi.