Read Vaiphei VAIHAWMTE 10 Bible Online

VAIHAWMTE 10 - Vaiphei bible

VAIHAWMTE 10

¹Abimelekh thi’nung in Israelte hukdok dingin, Ephraim tânggam ah Shamir khua Issakhar phung ah mi, Dodo chapa Puah chapa Tola chu a hung kipan a.

²Ama’n kum sawmni leh thum sung Israelte chung ah vai a hawm nung in a thi ta’n, Shamir khuan a vui tau a.

³Tola thi’nung in Gilead mi, Jair in Israelte chung in kum sawmni leh ni vai a hawm hi.

⁴Ama’n chapa sawmthum a nei in, amau chun sabiltung a nei chiat un; amau chun Gilead gam ah khawpi sawmthum le a nei ua, ziate chu tu’ni tiang hin Havvoth-jair a kiti den tai.

⁵Jair a thi phatin Kamon khuan a vui tau hi.

⁶Israelte chun LALPA doi lo gual tak in thil a bawlkhial kit tau a. Aram mite pathian Baal leh Astartes, chuleh Sidonte pathiante, Moabte pathiante, Ammonte pathiante leh Philistinte pathian haw chu a hosan tau a.

⁷Israelte chung in LALPA a lungna ma ma ta’n, Philistinte leh Ammonte khut in a pia ta’n;

⁸zia kum ah chun Israelte chu tawden in a sugenthei pan tau a. Jordan lui gâl ah Amorte gam sung ah um, Gilead ah chêng Israelte chu, kum sawm leh giat sung a sugenthei tau a.

⁹Ammonte chun Jordan lui gâl kâi in, Judah te leh Benjamin te leh Ephraim te a vado ua; tichun, Israel chu a subuai ma mau a.

¹⁰Tichun, Israelte’n LALPA kiang in, “Ka Pathian uh nusia in Baalte ka la ho tâk mai uh hi, la chung in thil ka la bawlkhial tau ahi,” a tiu a.

¹¹Chun, LALPA‘n Israelte kiang in, “Aiguptate, Ammonte, Amorte, Philistinte,

¹²Sidonte, Amalekte leh Moabte’n hun tawden ah, a hun sukgenthei lai ua, lei ko lai uh khan, amau khut nuai ah kipat in ka hun hukdok pua a hem?

¹³Chuti sapi’nle, lei kiheimangsan tei tei un, pathian dangte lei ho san sek un; ziaziakchun, tu’hin vang hun hukdok talo ding ka hi.

¹⁴Chiau inla, pathian ah la têl zawkteu kiang ah khan vadon tau in; la lungkhamnau ah kipat in hun hukdokleu hiding a paw’m!” a ti piak a.

¹⁵Chun, Israelte’n LALPA kiang in, “Ahi puai, thil ka bawlkhial ma mau hi; pha lasak dan dan in ka chung un bawl mai inla; ahi’n, tu’ni hin ei hukdok in!” a ti tau a.

¹⁶Tichun, a lak ua pathian dangte chu paidok in, LALPA chu a ho tau a; chuleh, ama’nle Israelte genthei tak ah um chu a en zo diak ta puai.

¹⁷Ziaphatchun, Ammonte chu kigâlvan in, Gilead mun ah a kikul tau ah; amau do dingin Israelte le hung khawm in Mizpah mun in a kikul tau a.

¹⁸Gilead mipite lak ah hotute chun, “Ammonte do ah lamkai ding kua I hi diam uh? Zia gual mi chu Gilead ah chêngte zosia luchang ah pansak ding ahi,” ti’n a kikumtua tau a.