Read Vaiphei VAIHAWMTE 12 Bible Online

VAIHAWMTE 12 - Vaiphei bible

VAIHAWMTE 12

¹Ephraim mite chu gâldo ding ah kikokhawm in, Zaphon mun a gâlkâi phat un, Jephthah kiang in, “Ammonte do ding ah la vagâl kâi lai ua khan, a hun zui ding ah bang a tia ei chial lo la hiu em? La In hun hâlkhum mai ding ka hiu,” a tiu a.

²Jephthah chun a kiang un, “Nasa tak ah ei sugenthei Ammonte chu, kei tawh ka mipite’n theitawp sua in ka kidopi tau a. Ei panpi ding ah ka hun chial leh, la nuam puau ah ahi kha lam.

³Nang un ei panpi nuam lo la hiu ti ka hetchian phatin, thi ding le khawksa talo khop in, Ammonte do dingin ka gâl kâi ta’n; chuleh, LALPA‘n amau chu ka khut in ei pia ta ahi. Tu’ni hin bang ding ah ei do ding ah hung kuan ziang la hi tam?” a ti’n.

⁴Ziaphatchun, Jephthah in Gilead mite lak ah pawsal zosia a ko khawm ah, Ephraimte chu a do tau a; chuleh, Gilead mite chun Ephraimte chu a zo tau a; a ziak chu, amau in, “Nanghaw Gileadte hi Ephraimte leh Manassehte lak ah kipat gâljam ngen la hiu,” ti’n, a hosiat ziak uh ahi.

⁵Tichun, Gileadte chun Jordan lui kaimun tiang in Ephraimte chu a zo tau a. Ephraimte lak ah hung kigelmangte chun a kiang ua, “Ei gâl kâi sak in,” a ti phat ua leh Gileadte chun a kiang un, “Ephraim mi la hiu em?” ti’n a la dong jel un. Ama chun, “Ka hi puai,” a ti phat ua leh,

⁶“Aleh, Shib-bo-leth tin,” a tiu ah; ama’n, a dik tak ah a gendaw theilo ziakin, “Sib-bo-leth,” a hun ti sek ah. Ziaphat chuleh, a man ua, Jordan lui kaimun ah chun a that jel tau a. Zia hun sung ah chun Ephraimte chu sîng li leh sang ni hial a that tau hi.

⁷Jephthah in Israelte chung ah kum guk vai a hawm ah. Ziazaw ah chun Gilead mi, Jephthah chu a thi ta’n, Gilead gam ah ama khawpi ma ma ah chun a vui tau hi.

⁸Ama nung ah chun Beth-lehem khua mi Ibzan in Israelte chung ah vai a hawm a.

⁹Ama’n chapa sawmthum a nei ah. Ama chanu sawmthumte chu ama In sung mi hilo, khaw chuam mite ji dingin a pia’n; a chapate ji dingin pawlamte nungak sawmthum a pui lût a. Ama’n Israelte chung ah kum sagi vai a hawm hi.

¹⁰Ziaphatchun, Ibzan a thi ta’n, Beth-lehem khuan a vui tau hi.

¹¹Ama nung in Zebulun mi Elon in Israelte chung ah vai a hawm a; Israelte chung ah a vaihawm sung chu kum sawm ahi.

¹²Ziaphatchun, Zebulun mi Elon chu a thi ta’n, Zebulunte gam ah Aijalon khuan a vui tau hi.

¹³Ama nung ah chun, Pirathon mi Hillel chapa Abdon in Israelte chung ah vai a hawm a.

¹⁴Ama’n chapa sawmli leh tupa sawmthum a nei ah; a chuanna ding uh sabiltung sawmsagi a nei ui; ama’n Israelte chung in kum giat vai a hawm hi.

¹⁵Chun, Pirathon mi, Hillel chapa Abdon chu a thi ta’n; Amalekte tânggam, Ephraim gam sung ah Pirathon khuan a vui tau hi.