Read Vaiphei VAIHAWMTE 13 Bible Online

VAIHAWMTE 13 - Vaiphei bible

VAIHAWMTE 13

¹Israelte’n LALPA mit mu ah thil phalo a bawl kha kit tau ah; tichun, LALPA‘n Philistinte khut in kum sawmli sung a pedok kit tai.

²Zorah khua’n Dan Inkuan lak ah mi khat, a min Manoah kiti a um a. A ji chîng ahiziak in cha a nei puau a.

³Chun, LALPA vansawlchâk khat, numei kiang ah hung in, a kiang in, “La chîn ziak ah cha khat le nei lo himaleh chin, gâi in la tin, chapa hun nei ding la hi.

⁴Tu’ kipat hin chingthei tak ah um in, uain leh khamthei thilte him him dawn lo ding leh, a thianglo him him la nêk lo ding ahi;

⁵nau hun vop ah, chapa hing ding la hi’ngâl a. Chuleh, nausen chu a pia’n ah kipat in Pathian â ding ah nazirit hiding ahiziak in, a sam mêt lo ding ahi. Ama chun Israelte chu Philistinte khut ah kipat in hukdok ding ahi,” a tia.

⁶Ziaphatchun, a hung ah a pawsal kiang in, “Pathian mi khat ka kiang in a hung ah, a mêl chu Pathian vansawlchâk a bang in, lau um ma ma khat ahi; khoilam ah hung kipan a hem ti ka dong pua’n, a min le ei gen diak puai;

⁷ahi’n la, ka kiang in, ‘nau vop in la tin, chapa khat hing ding la hi’n. Ziaziakchun, tu’kipat hin uain leh khamthei dawn kin la, a thianglo him himle la nêk lo ding ahi; zia chapang chu a pian ah kipat a thi’tiang in, Pathian â ding ah nazirit hi ding ahi ngâl a,’ a ti hen,” a tia.

⁸Ziaphatchun, Manoah chu LALPA kiang in a pauchap ah, “Aw LALPA, lungsiat tak in Pathian mi ka kiang ah la hun sawl kha ka kiang un hung kit hen la, nausen hung piang ding chu bang law ding ka hiu em ti ei hung hil hen,” ti’n a don ta’n.

⁹Pathian in Manoah dotna chu a ngaitha’n, tichun, a ji chu loulai ah a kichut lai tak in, Pathian vansawlchâk khat a kiang in a hun sawl ah; himaleh, a pawsal Manoah chu vang a kiang in a um puai.

¹⁰Tichun, numei chu kin tak ah tai in a pawsal kiang in, “Khatvei ni’ ka kiang ah hung kilâkpa kha ka kiang in a hung kilâk kit tai,” a hung tia.

¹¹Manoah le a dingdok vak ah, a ji chu a zui ta’n, mipa kiang a hung tun phat un a kiang in, zia numei kiang ah thugenpa kha nang la hi maw? a tia. Ama’nle, “Ka hi,” a tia.

¹²Ziaphatchun, Manoah in a kiang in, “La gen gual ngei chun hung guitung ta leh, naupang chu bang gual in ka enkol un, bang a hun bawl diam?” ti’n a dong ta’n.

¹³LALPA vansawlchâk chun Manoah kiang in, “Numei in a kiang ah ka gen zosia kha pilvâng tak in zui hen.

¹⁴Numei chun, grep ga ah kipat nêkthei him him chu a nêk lo ding ahi. Uain leh khamthei thilte him him a dawn lo ding, a thianglo him himle a nêk lo ding ahi. A kiang ah ka thupiak zosia kha pha tak ah a zui ngei ngei ding ahi,” a tia.

¹⁵Manoah chun LALPA vansawlchâk kiang ah chun, “Chomkhat um ta di inla, kêlno khat hun thâ ing ka,” a tia.

¹⁶LALPA vansawlchâk chun, um ta di mawng lengle la nêk bawl ding chu ne diak pua’ng ka; himaleh, hâlmang thillat la bawl nop leh vang, LALPA kiang ah lân ziang in, a tia. (Manoah in ama chu LALPA vansawlchâk ahi lam a he paw’ngâl a.)

¹⁷Ziaphatchun, Manoah in LALPA vansawlchâk kiang in, “La thugente chu a hung guitun phat leh, ka hun chawihoi theina ding un, la min bang a hem ei hil in?” a tia.

¹⁸Himaleh, LALPA vansawlchâk chun a kiang in, “Bang ding ah ka min ei dong la hem? Ka min chu mak talua ahi ngâl ah,” ti’n a dawnhu a.

¹⁹Tichun, Manoah in kêlno tawh thâi thillat ding chawi in, a kiang ua thilmak bawlpa, LALPA â dingin suangpi chung in a lân tai.

²⁰Mâichâm ah kipat meikuang van lam zuan ah a kuandok phatin, Manoah leh a ji’n a et zing lai un, mâichâm ah kipat meikuang ah chun LALPA vansawlchâk a kal to ta’n; chuleh, a maichang ua lei tual si’n a bawk khup tau a.

²¹LALPA vansawlchâk chu Manoah leh a ji kiang in a kilâk kit ta puai. Ziaphatchun, Manoah in LALPA vansawlchâk ahi ti a hedok bep a.

²²Chun, Manoah in a ji kiang in, “Pathian I mu tâk ziakin, thi ngei ngei ding I hi,” a tia.

²³Himaleh, a ji chun a kiang in, “LALPA‘n tha ei gua hileh, I hâlmang thilpiak leh I thâi thillatte chu I khut ah kipat in ei sân piak pua’n tin; chuleh, zia gual thilte chule ei musak in, I kiang inle zia thilte chu gen ding a hem?” ti’n a dawnhu a.

²⁴Numei chun chapa a hun hing ta’n, a min dingin Samson a sa tai. Naupang chu a khang lian ah, LALPA‘n a maljawl ta’n.

²⁵Zorah leh Eshtaol kikâl ah Mahaneh-dan ah chun LALPA thagau in a hun thuam pan tai.