Read Vaiphei VAIHAWMTE 15 Bible Online

VAIHAWMTE 15 - Vaiphei bible

VAIHAWMTE 15

¹Chomkhat nung, gehu bu ât hun in, Samson in kêlno khat kai in a ji a vave ah. A pa kiang in, “Ka ji pindan ah lût ding ka hi,” a tia. Himaleh, a pa chun a lût ding a zanuam ta pua.

²A ji pa chun a kiang in, “Keima’n la ji chu la dawi tâk lo mawng mawng in ka koi ah; ziaziakchun, la lawipa kha ka la kichenpi sak mai ahi tai. A naunu hi ama sâng ah mêl phazaw hinalo maw? A nau hi kipui ziang ta’n,” ti’n a dawnhu a.

³Samson in a kiang un, “Tu’chung ah hin vang, Philistinte hi bang law ziang lengle a maw chu paw lo him him ding ka hi,” a ti ta’n.

⁴Tichun, Samson a chia ah, si-al za thum a man khawm ah, pani jel in a mei uh a khittua ah, a mei uh a khitua’na chun meisel khat chiat a khitden a.

⁵Meiselte chu hâlkuang in, Philistinte bu lak ah chun a naw lut ah, buphalte leh bukungte chu a kâng tum ah, grep huante leh oliv thingte chule a kâng tum zo tai.

⁶Ziaphatchun, Philistinte’n, “Zia hi kua bawl ahi tam?” ti’n a kanvêl tau a. Tichun, mite’n a kiang un, “Timnah ah um, Samson sungpa’n a ji lak piak ah, a lawipa a kichenpisak ziak ah Samson in a bawl ahi,” ti’n a hil tau ah. Tichun, Philistinte chu kuan to in, Samson ji tawh a talpupa Inkuan chu a vahâl tum tau a.

⁷Samson in a kiang un, “Zia gual ah hi la bawl ziak un, la chung un phuba la nalai ding ka hi; ziazaw chuleh hâi bep ding ka hi,” a tia.

⁸Mi tam tak a khên lum ta’n; chuleh, a chia suk ah, Etam kawlbûk in a vaum tai.

⁹Ziaphatchun, Philistinte a hung kuan to ua, Judah gam ah kikul in, Lehi chu a bulu tau a.

¹⁰Judah gam ah mite chun, “Bang ding ah keihaw do ding ah hung kuan to ziang la hiu em?” a tiu ah. Amau inle a kiang un, “Samson kântom ding ah hung kuan to ka hiu, ama’n ei bawl gual gual ah kei unle ama ka bawl thuk ding uh ahi,” a tiu a.

¹¹Ziaphatchun, Judah tangval sang thum chu Etham suang kawlbûk ah chun a vachia suk ua, Samson kiang in, “Philistinte hi I chung ua vaihawm a hiu ti helo la hem? Ka chung ua la thilbawl hi bang ahi tam?” a vatiu a. Ama’nle, “Ka chung ah a bawl gual gual ua ke’nle ka bawl ahi,” ti’n a dawnhu tai.

¹²Amau chun a kiang in, “Philistinte khut ah ka hun piakdok theina ding un nangma kântom ding ah hung kuan suk ka hiu,” a tiu a. Samson in, “Nang un ei that lo dingin kitiam phot un,” a tia.

¹³Amau inle a kiang in, “That lo e, hun kântom ing ka tiu in, a khut un hun pedok ding ka hiu; kei un hun that pua’ng kau,” a tiu a. Tichun, khauhual thak pani’n a kântom tau ah, kawlbûk ah kipat chun a paw to tau a.

¹⁴Chun, Lehi khua a hung tun phat un, Philistinte chu kipak ma ma ah kiko in, amau dawn dingin a hung kuan tau a; chuleh, LALPA thagau in a hun thuam ah, a khut a kânnau khauhualte chu mei in a kâk tan gual mai in a jetan tan; a khut ah thikkhaute chule a tuitha zo ta mai a.

¹⁵Chuleh, ama’nle sabiltung khagu thak deu khat a mu chu a la’n, zia khagu mang chun mi sang khat a that a.

¹⁶Chun, Samson in: “Sabiltung khagu ngei mang in a thua thua ah kisia in, sabiltung khagu mang in, mi sang khat ka that hi,” ti’n a gen a.

¹⁷Zia thu a gen zaw phat ah chun, a sabiltung khagu chawi lai chu a pai mang ta’n; chuleh, zia mun chu Ramath-lehi sak ahi tai.

¹⁸Ziaphatchun, Samson chu a dangchâk ta ma ma ah, LALPA a ko ta’n, “Nang in, la suak khut in zia gual ah zaw’na hi lei pia ta’n. Tu’hin dangchâk ah thi in, zektanlote khut ah pûk mai ding ka hi em?” a tia.

¹⁹Tichun, Pathian in Lehi mun ah chun leikuak a hun umsak ah, zia kipat chun tui a hung luangdok ta’n. Tui chu a dawn zaw phatin a hung hal thak kit tai. Ziaziakchun, zia mun chu, En-hakkore sak in a um ta’n; zia chu tu’ni tiang ah hin Lehi mun ah chun a um nalai hi.

²⁰Chun, Philistinte hun ah chun kum sawmni sung vaihawm in a pang tai.