Read Vaiphei VAIHAWMTE 17 Bible Online

VAIHAWMTE 17 - Vaiphei bible

VAIHAWMTE 17

¹Ephraim tâng gam ah chun mi pakhat a um ah, a min chu Mikah ahi.

²Ama’n a nu kiang in, “La dangka shekel sang khat leh za khat, mi gûk ahi la tin, ka hetna ngei ah le hânsia la lawkhumsa kha, zia dangka thîk kha ka kiang in a um hi; keima lâk ahi; himaleh, tu’hin hun pia kit ta’ng ka,” a tia. Chuleh, a nu chun a kiang in, “Ka chapa, LALPA‘n hun maljawl ta hen!” a ti’n.

³Tichun, dangka thik sang khat leh za khat chu a nu kiang ah a piak kit phatin, a nu chun a kiang in, “Zia dangka hi ka chapa’n milim sêkthaw leh sunthaw a bawlna dingin, keima khut ngei in LALPA kiang in ka lândok hi,” a tia.

⁴Tichun, a dangka chu a nu kiang ah a piak kit phatin, shekel za ni a ladok ah, zia chu dangka sekpa a pia’n, milim sêkthaw leh sunthaw a siam piak ta’n; ziate chu Mikah In ah a koi un.

⁵Zia Mikah hin pathian In chuam khat a nei ah, Ephod khat tawh, teraphim lim a koikhawm ah, a chapa khat chu thiampu’n a pansak ta’n.

⁶Zia lai ah chun, Israelte gam ah leng a um pua’n; mi tin in pha a sak dan chiat un a um tau hi.

⁷Chun, Judah gam ah Beth-lehem khua kipat tangval pakhat a um a. Ama chu Levi chi, zia tak ah chu chêng ahi’n.

⁸Zia tangval chun Judah gam ah Beth-lehem khua kipat hung pawt in, umna ding a mu’na mun mun ah chêng mai ding ah um ahi. Chutia, a vâkvêl lai ah chun Ephraim tâng gam ah Mikah in a hung tung ta’n.

⁹Mikah chun a kiang in, “Khoi ah kipat hung la hem?” ti a dot leh ama’nle, “Judah gam ah Beth-lehem khua um, Levi phung ah mi ka hi’n, umna ding hawl ah vâk vêl vêl ka hi,” ti’n a dawnhu ta’n.

¹⁰Ziaphatchun, Mikah chun a kiang in, “Ka kiang ah um inla, ka pa leh ka thiampu hi ding in pang inla, kum khat ah dangka shekel sawm hun pia’ng ka tin, nîk leh puan, nêk leh châkle hun pia’ng ka,” a ti’n.

¹¹Levi mipa chu a kiang ah um den chu a nuam ta’n; tichun, tangval chu a chate lak ah pakhat gual in a um tai.

¹²Tichun, Mikah in Levi mi chu thiampu’n a guat tai; tangval chu thiampu a hung hita’n, Mikah In ah a um den tai.

¹³Ziaphatchun, Mikah chun, “Tu’hin vang LALPA‘n ei maljawl ding ahi ti ka he tai; Levi chi ma ma thiampu’n ka nei ta’ngâl a,” a ti tai.