Read Vaiphei VAIHAWMTE 19 Bible Online

VAIHAWMTE 19 - Vaiphei bible

VAIHAWMTE 19

¹Zia hun ah, Israelte’n leng a nei masang un, Levi mi khat Ephraim tânggam kilkawi khat ah chêng in, Judah gam ah Beth-lehem khua mi khat thâikem in a nei a.

²Himaleh, a thâikêmnu chu a pawsal chung ah lungna’n, a tai mang ah, Judah gam ah Beth-lehem khua a pa kiang in tha li hial a vaum tai.

³A pawsal chun a suakpa tawh, sabiltung pani pui a kamdam tak ah vajawl kit dingin a chia tau a. A sungpa in a tun ah, a sungpa’n a la mu phât in kipak ma ma in a la lawp a.

⁴A sungpa’n ama chu ni thum um dingin a tho ta’n; tichun, a kiang ua ne leh dawn in a châm tau a.

⁵Ni li a ti’n jingkal ma tak in a tho un, chia ziang dingin a kisa tau ah; ahi’n la, a sungpa chun a mâkpapa kiang in, “An nevâ in kihihat phot unla, ziazaw chuleh chiana’n lau,” ti’n a tho a.

⁶Tichun, a paniu ah kitung in, a ne un, a dawn kit tau ah; chuleh, a sungpa’n a kiang in, “Tu’jan giak kit unla, nuam tak in um tau in,” a ti kit a.

⁷Mipa chu chia ding ah a hung kipat phut ziang phatin, a sungpa chun zia jan chu giak kit dingin a tho tun tun ta’n.

⁸A ni nga tin ni jingkal ah ma tak ah chia dingin a hung kipan kit a; ahi’n, a sungpa’n a kiang in, “Kihihal tadi un,” a tia. Tichun, nisa a hung nêm tiang in a kithâdai kit ua, a paniu in a ne un a dawn kit tau a.

⁹Mipa chu a thâikêmnu tawh, a suakpa tawh chia ding ah a kisak phat un, a sungpa chun, “En un, khua thim pai ziang ding ahi tai. Tu’jan giak kit mai un. En un, nisa tum ding ahi tai. Tu’jan chu nuam tak in giak kit phot unla, jing leh vaima tak in tho unla, la In lam uh zuan zaw mai tau in,” a tia.

¹⁰Himaleh, mipa chu zia jan chu a giak nuam ta pua’n; a kipan ah, a chia ngâl ta’n, Jebus (zia chu Jerusalem ahi) khua jawn chu a tung tau a. A sabiltung te’ni tawh, a thâikêmnu a kipui a.

¹¹Jebus khua kiang a tun phat un, ni a niam ta ma ma ah; chuleh, a suakpa’n a pu kiang in, “Hung tia, zia Jebushte khawpi ah sawn lût hitiu in, khua sung ah vagiak hitiu,” a tia.

¹²Himaleh, a pu’n a kiang in, “Zia tak ah mêlhet lote, Israel mi bawn hilote kiang chu zuan talojen hitiu; zia sâng ah chun Gibeah khua zuan zawi tiu,” a tia.

¹³Chuleh, a suakpa kiang in, “Hung tiam un, Gibeah a hem, Ramah khua khat zawk zawk bêk ah giak dingin zuan mai hitiu,” a ti’n.

¹⁴Tichun, a chia theng ua, a chia pek tau a; Benjamin mite khua Gibeah a tun phat un ni a tum ngâl tai.

¹⁵Gibeah khua sung ah chun giak dingin a lût tau a. Khaw sung a lût phat un, lamlian pang in a kichu tau a; kuama’n amau chu a In ah giaksak a nuam puau hi.

¹⁶Têksepu khat, lou kuan nitâk vai hung tung khat a um ah. Ama chu Ephraim tânggam ah kipat Gibeah khua hung pêm lut ahi. (Zia khua chêngte chu Benjamin mite ngen a hiu a.)

¹⁷Têksepu’n, a vak et leh tunna ding neilo malzin, lamlian pâm ah chu mai chu a vak mu ta’n, a kiang in, “Khoilam ah chia gua’, khoilam ah hung kipan la hi em?” ti’n a dong a.

¹⁸Ama’nle a kiang in, “Judah gam ah Beth-lehem khua kipat Ephraim tânggam, ka hung kipatna lam zuan ah chia ka hiu. Judah gam ah Bethlehem khua ka vachia ah; tu’hin, In lam zuan ka hitau. Kuama’n a In ah tung dingin ei pui puau a.

¹⁹Kei uh la suakte hin, sabiltungte nêk ding bupawl leh gancha an; chuleh, kei tawh numei tawh zia tangval nêk ding leh dawn ding kidai le ka nei ui. Bangma ka dawibe puau hi,” ti’n a dawnhu a.

²⁰Têksepu chun a kiang in, “Thamuang tak in um un. La mamaw zosiau hun pena’ng ka; khawlai ah hin vang giakden ziang kiu in,” a tia.

²¹Tichun, amau chu In lam in a pui ta’n, a sabiltungte chu an a pia tai; a keng uh a sil ua, a ne un a dawn tau hi.

²²Chutia, lim leh kipak tak ah a um lai ua chun, khawpi sung ah michavai hon khat hung in, zia In chu hun ûm in, kotkhak chu a chûm tau a. Inneipa têksepu kiang ah chun, “La In ah hung tung pa kha ei hun pedok in, ka kipawlpi nuam ui,” a tiu a.

²³Ziaphatchun, a Inneipa, têksepu chu a va pawtdok ah, a kiang un, “Ahi puai, suapite haw, zia gual thil phalo chu bawl kiu in. Zia pa hi ka malzin ahiziak in, zia gual ah chun thanghuai tak in bawl kiu in.

²⁴Zia hin ka chanu, nungakthiangtho khat tawh, ama thâikêmnu a um ui; amau teni chu hun pedok zaw’ng ka. Amau teni chu la nop nop uh lawu inla, zia mipa hivang thanghuai tak in bawl kiu in,” a tia.

²⁵Himaleh, a thugen chu a ngaisak puau ah. Tichun, a zinpa’n le a thâikêmnu a man ah, a khut un a pedok tai. Amau inle a luppiu ah, jankhawvak ah, jingkal phalvak tiang in kihelna’n a mang tau a. Chun, jingkal phalvak in a chiasak tau hi.

²⁶Jingkal a hung hi’phatin numei chu a chia ah, a pawsal tunna in kotkhak bul ah a chun a kisep pâi ah, nisa suak tiang in a lumden tai.

²⁷Jingkal ah a pawsal hung thodok in, kotkhak vahong ah, a pawtdok guat leh kotbul ah a thâikêmnu, a khutte ni’n kotkhak bul tu’kawm ah a la kijam chu a mu tai.

²⁸Ama’nle, “Tho inla, chia kit tai tiu,” a tia. Himaleh, a hun dawnhu ta pua’n. Ziaphatchun, a sabiltung chung in a pâidok ah, In lam zuan in a kipandok tai.

²⁹In a tun phatin, a chemcha a pan ah, a thâikêmnu luang chu a bat bat ah sawm leh ni sua in a sêm ta’n; a taksa bâkte chu Israel gam pumpi’n a thotjak tai.

³⁰Chuleh, a thotnate kiang in zia gual hin la gen diu ahi: “Aigupta gam ah kipat Israelte a hung pawtdok nung un, zia gual thil him him hi tu’ni tiang ah hin a la um kha’n, la mu kha mawng mawng awm? Ngaitua unla, kidong tua in, hun gendok tiam un,” ti tau in, ti’n a gen a.