Read Vaiphei VAIHAWMTE 21 Bible Online

VAIHAWMTE 21 - Vaiphei bible

VAIHAWMTE 21

¹Tichun, Israelte’n Mizpah khua kihaksialna nei in, “I lak ua kuama’n I chanuteu Benjaminte ji ding ah I piak lo ding uh ahi,” ti’n kitiamna a nei tau a.

²Chun, mipite chun Bethel mun ah hung in, nitum in Pathian âng ah kitung in, aw ngai tak ah kiko in a kap tau hi.

³Pathian kiang in, “Aw LALPA, Israelte Pathian, bang ding ah Israelte lak ah phung khat tasam ah hung um ziang ding chu bangti ding ahi tam?” a tiu a.

⁴A jing phatin, mipite chu vaima tak ah tho in, zia mun ah chun mâichâm a siam ua, hâlmang thillat leh kichamna kithoinate a lân tau a.

⁵Chuleh, Israelte’n, “Israelte phung lak ah kuate pen I hiu em LALPA kiang ah mipi kikhopna pang lo?” a tiu a. Mizpah mun ah LALPA kiang ah chia to lak ah pang lo taphot chu thâlup ngei ngei ding ahi, ti ah kihaksial ah thutep a nei ziak uh ahi ngâl a.

⁶Himaleh, Israelte chun, a suapiteu Benjaminte a lainat ma ma ziak un, “Tu’ni Israelte phung lak ah khat a bei tâk mai ding chu a khawk na e!

⁷A hing nalai sunte ji ding bangti’n I ngaitua ta ding awm? ei un la, ‘I chanuteu amau ji ding ah kuama’n I piak lo ding uh ahi,’ ti in LALPA kiang ah kihaksial ah kitiamna I la bawl ta ngâl un,” a tiu a.

⁸Chuleh, amau chun, “Israelte phung zosia lak ah kipat Mizpah mun ah LALPA kiang ah hung pang lo kua I um awm?” ti’n a kidong ua. Jabesh-gilead mite lak ah kipat khat chale mipi kikhopna chia a um puau ti a hun hedok tau a.

⁹Mipite min a lam lai ua chun, Jabesh-gilead khua kipat khat chale a pang umlo a hiu ti a hiau a.

¹⁰Tichun, mipite chun a lak ua mi hangsan chiat sîng khat leh sang ni a sawl tau ah, a kiang un, “Chiau inla, Jabesh-gilead khua chêngte chu numei hileh, chapang hileh, chemjam in vathat sik sek un.

¹¹Chuleh, zia gual ah hin la vabawl ding uh ahi: Pawsal zosia tawh, pawsal tawh kipawl kha numei zosia chu la tha gam sik sek ding uh ahi,” a tiu a.

¹²Chun, Jabesh-gilead ah nungakthiang, pawsal tawh kipawl kha lo ngen za li a man ua, amau chu Kanaan gam ah um, Shiloh ah a kikulnau ah chun a hun pui tau a.

¹³Tichun, mipite chun, Rimmon kawlbûk ah kisêl, Benjaminte kiang in kichamna thu a puang tau a.

¹⁴Ziaphatchun, Benjaminte chule a hung kit tau a; Jabesh-gilead ah numei a hingmatteu chu a ji ding un a piau ah; ahi’n, a kihawm ting nai diak puau a.

¹⁵LALPA‘n Israelte lak ah kikhenna a hun umsak tâk ziakin, mipite chun Benjaminte chu a khawksak ma mau a.

¹⁶Tichun, kikhawmte lak ah upate chun, “Benjaminte lak ah numei a um tâk lo ziakin, tu’ ji nei nai lo te hi bang I law ding uh ahi tam?” a tiu a.

¹⁷Chun, amau chun, “Israelte lak ah phung khat a manthai ziang lona dingin, Benjamin chate lak ah a hing sunte golua ding khat I ngaitua piak tei tei diu ahi.

¹⁸Himaleh, I chanuteu lak ah khat ziang le a ji ding un I pia thei puau a,” a tiu a. Israelte’n, “Benjaminte ji ding petaphot chu hânsiadong in um hen,” ti ah a la kihaksial ziak uh ahi ngâl a.

¹⁹Tichun, amau in, “Ngai un, Bethel mallam, Bethel ah kipat Shekhem zotna lamlian ah kipat sualam kâi ah um, Lebonah simlam kâi ah Shiloh mun ah chun kumsin ah LALPA kiang ah kût kibawl sek ei ve,” a tiu a.

²⁰Chun, Benjamin phung ah mite chu a hil tau ah, a kiang un, “Chia unla, grep huan ah te chun chânggu unla,

²¹a la ngâk zing un; Shiloh khua nungakte chu lâmna mun ah a lâm ding ah a hung pawtdok phat ua leh, grep huante ah kipat hung pawt unla, mi zosia’n Shiloh nungakte chu la ji ding un kimat chiat in, Benjaminte gam lam in kipui mang ziang un.

²²A pateu a hem, a suapiteu a hem in, ka kiang ua hung ah a hung gen phat ua leh a kiang un, ‘Ei lungsiat unla, neisak mai un; mi tin in kido’na kipat a ji ding uh a ting in ka mat piak zo paw’ngâl un. Chuleh, mi tin in a ji ding ua la piak uh a hilo ziakin a maw chang diak pua’n lau,’ ti na’ng kau,” a tiu a.

²³Benjaminte’n zia gual chun a bawl tau ah; a lâmte lak ah a kimat chiat uh chu tawh a kicheng tau a. Tichun, a chiau ah, a gam lam un a kile’kit chiat tau a; chuleh, a khawpiteu chu siamthak in, a sung ah chun a chêng kit tau a.

²⁴Tichun, Israelte chule zia kipat chu, a phung dungzui leh a Inkuan dungzui chiat ua kikhen in, a gam lam chiat un a chia kit tau hi.

²⁵Zia lai ah chun, Israelte gam ah leng a um pua’n; mi tin in pha a sak dan chiat un a um tau hi.