Read Vaiphei VAIHAWMTE 3 Bible Online

VAIHAWMTE 3 - Vaiphei bible

VAIHAWMTE 3

¹Kanaan gam ah kido’na a la pang khalo Israelte a patep theina dingin, zia nam dangte hi LALPA‘n a la khêk piak a,

²(Israel khangthakte’n a la hi’nat khak lo teu in kido dan a hun het ua, gâl bawldante a hun hil ua a het chian theina ding un.)

³Nam dangte chu: Philistinte lal panga, Kanaan mite zosia leh Lebanon tâng ah Baal-hermon ah kipat Lebo-hamath tiang ah chêng Sidon mite leh Hiv mite zosia a hiu a.

⁴LALPA‘n Mosi kiang ah a pu leh pateu â ding ah thuthung a la piak chu, a zui nau em zui lo, ti hetna ding ah Israelte patepna ding ah a hoite chu a hiu a.

⁵Chutichun, Israelte chu Kanaan mite, Hit mite, Amor mite, Periz mite, Hiv mite leh Jebus mite lak in a chêng den tau a;

⁶chuleh, a chanuteu chu a ji ding ua la in, amau chanute le a chapateu ji ding ah pia’n, a pathianteu chule a ho tau hi.

⁷Israelte chun LALPA mit mu ah thil phalo a bawl tau ah, LALPA a Pathian uh hemil in, Baalte leh Asherahte chu a ho san tau a.

⁸Israelte chung ah LALPA a lungnat ma ma tâk ziakin, Aram-rishathim te Leng Kushan-rishathaim khut in a pedok ta’n; tichun, Israelte chun Kushan-rishathaim na chu kum giat sung a sêm tau hi.

⁹Himaleh, Israelte chun LALPA ko ah a kâ phat un, Israelte hukdok dingin LALPA‘n mi pakhat a hun tungding ah, ama chu Kaleb naupa, Kenaz chapa Othniel ahi.

¹⁰LALPA thagau a chung in a um ah, Israelte chung in vai a hawm tai; gâl do in a kuandok ah, LALPA chun Aram ah lengpa Kushan-rishathaim chu a khut in a pia tai; chuleh, a khut in Kushan-rishathaim chu a zo tai.

¹¹Tichun, gam chu kum sawmli gâl muang in a um tai. Ziazaw ah chun Kenaz chapa Othniel chu a thi tai.

¹²Israelte’n LALPA mit mu ah thil phalo tak a bawl kît tâk ziak un, LALPA‘n Moab Lengpa Eglon chu Israelte do dingin a hi’hat tai.

¹³Ammonte leh Amalekte tawh pang khawm in Israelte a do ua, a zo tau ah; tichun, tûm thing khawpi chu a la tau hi.

¹⁴Chutichun, Israelte chu Moabte lengpa Eglon nuai ah kum sawm leh giat a um tau hi.

¹⁵Himaleh, Israelte’n LALPA a ko phat un, LALPA‘n amau hukdok ding in Benjamin phung ah mi, Gera chapa Ehud, mi veilong chu a hun tungdok tai. Ama khut ah chun Israelte’n Moab lengpa Eglon kiang in sia a pia tau a.

¹⁶Ehud in chemjam tong khat ah sau a kisiam ah; zia chu a changlam malpi puan nuai in a kânden a.

¹⁷Ziaphatchun, Moab lengpa kiang in a sia lak khawm chu a hang pia ta’n. Eglon chu mi thau tak mai ahi.

¹⁸Ehud in a thil puak chu a piak zaw phatin, zia thilpiak a puaksakte chu a sawl mang ta’n.

¹⁹Gilgal ah suang milim kiang a hung tun phatin a kile’kit vak ah, “Aw lengpa, la kiang ah gen ding thugûk khat ka nei hi,” a tia. Ziaphatchun, lengpa’n, “A la thip un,” ti’n a kiang ah um zosia chu a pawt sak a.

²⁰Nipi lai ah umna ding ah a siam Indan chungnung ah ama ngen ah a la kichu lai chu, Ehud in a hun nai ah, a kiang in, “Pathian ah kipat in thu ka hun puai,” a tia. Tichun, a chutna mun ah kipat chun a hung dingdok a.

²¹Ziaphatchun, Ehud in a veilam khut in a changlam malpi chemjam kikân dên chu a jutdok ah, Eglon tumpi chu a sut piak ta’n;

²²a chemjam chu a chemga tiang in a sun tum ah, a thau in a chemga chu a tât zawl ziakin, a chemjam chu a gilpi kipat in a jukdok kit zo ta pua; tichun a êk a hung pawt tai.

²³Ziaphatchun, Ehud chu hulliap lam in a pawtdok ah, Indan chung lam kot chu khâk in, a kam khum tai.

²⁴A pawtdok zaw phatin, a suakte a hung ua. Indan chung lam kotkhak kikam chu a mu un, “Indan dailîm ah kichawldam hi ding ahi,” ti’n a ngaituau a.

²⁵A lungkham hial chan uh a ngak tau ah. A hun hon tâk lo phât in, chabi a lau ah, a hêk-hong tau a. Tuanglai in a lengpau chu a thisa’n a la kizam tai.

²⁶A ngâk sung ua chun Ehud a la taimang man ta’n, suang milim umna a khêl ah, Seirah lam in a kigel mang tai.

²⁷Ephraim tânggam a tai tung phatin, pengkul a mût ta’n; ama chu Israelte’n tângsâng ah kipat in a hung zui suk tau ah, ama chu a makai un a pang tai.

²⁸Ama’n a kiang un, “Ka nung hun zui un; LALPA‘n la gâl uh Moabte chu la khut un a hun pia ta ngâl ah,” a tia. Tichun, a nung a zui ua, Moab lam ah Jordan lui kaimun tiang chu a la ngal tau ah; kuama a hung gâl kâi ding uh a zanuam ta puau a.

²⁹Zia ni chun, Moabte mihat leh hangsan ngen sîng khat ding vêl a that tau ah; mi pakhat chale a suakcha puau.

³⁰Tichun, zia ni chun, Moabte chu Israelte khut ah zaw in a um tau a. Chuleh, a gam chu kum sawmgiat sung a gâl muang tai.

³¹Ama nung ah chun Anath chapa Shamgar a hung ah, ama chun bawng jepna mol in Philistinte za guk a that ah. Ama’nle Israelte chu a la hukdok ta ahi.