Read Vaiphei VAIHAWMTE 7 Bible Online

VAIHAWMTE 7 - Vaiphei bible

VAIHAWMTE 7

¹Ziaphatchun, Jerubbaal (zia chu Gideon ahi) chu a kiang ah sepai um zosia chu tawh, jingkal matak ah tho in, Harod Tuinâk ah chun a kikul tau a; Midiante giabuk chu amau umna kipat mallam pang ah Moreh tâng nuai, phâijawl ah um ahi.

²LALPA‘n Gideon kiang in, “A khut ua Midiante ka piak dingin la kiang ah sepai umte chu a tam ta luau hi. Israelte chun, ‘Ka khut ua kihukdok ka hiu,’ kiti kha’n au.

³Tu’hin, sepaite kiang ah gen in, ‘Kuale a lau leh kithing taphot chu chia kit ziang hen,’ ti’n la,” a tia. Tichun, Gideon in a zendok ah; sepai sîng ni leh sang ni a kile’kit ua, sîng khat a um den tau a.

⁴Ziaphatchun, LALPA‘n Gideon kiang in, “Sepaite chu a tam talua na lai ui; lui ah pui suk inla, hun khendan piak ing ka; ‘Zia hin hun zui hen,’ ka tite chun hun zui uh hen la; ‘Zia hin hun zui ki’hen,’ ka tite chun hun zuidâ ziang uh hen,” a tia.

⁵Tichun, sepaite chu luidung in a pui suk ah; chuleh, LALPA‘n Gideon kiang in, “Uicha tuidawn gual ah liak thaw taphot langkhat lam ah koichuam inla; khupdin ah, a khut ua tui luak ah dawnte cheng chu a langkhat lam ah koichuam kit in,” a hun ti’n.

⁶A khut ah tui luak ah dawnte chu za thum a hiu ah; a dang cheng chu khûpdin ah a chîpthaw ngen a hiu a.

⁷Ziaphatchun, LALPA‘n Gideon kiang in, “A khut ah tui luak ah dawn mi za thum te bep hun khenthâk piak ing ka tin, ziate khut ah chun Midiante chu hun pia ding ka hi. A dang cheng chu kile’kit tau hen,” a tia.

⁸Sepaite khut ah kipat bêl leh pengkulte chu a lâkpiak ah; a dang Israelte sia chu, amau giabuk lam chiat un a chia kit tau ah; mi zathumte bep chu a um den tau hi. Midiante giamun chu a nuai tak ua, phâijawl ah um ahi.

⁹Zia jan ah chun LALPA‘n Gideon kiang in, “Tho inla, a giamun uh va bulu in; la khut ah ka piaksa a hita ngâl a.

¹⁰Nang ngen ah a giamun uh bulu ding chu la lau leh, la suakpa Purah kha tawh chia suk un;

¹¹chutileh, a kihonau hethei in la tin, ziazaw chuleh, a giabuk uh va sim ngam ta dingin la khut hihât in um ta’n ah,” a tia. Tichun, a suakpa Purah chu tawh kiton in, a mêlmateu giamun vêngte lak ah amau hun naipente umna tiang chu a vachia suk tau a.

¹²Midiante leh Amalekte, chuleh Sualam gam ah mite zosia chu zia phâijawl ah chun khaubepi hon gual mai in a dim met mut tau a; chuleh, a sangawngsauteu tamdan chule tuisuagiat pâm ah piaunêl gual mai ah simsên ding gual ahi puau a.

¹³Gideon a tun suk phatin, mi pakhat in a lawipa kiang ah a mang a la gen ah; a kiang ah chun, “Mang khat ka nei in, ka mang ah chun Midiante giabuk ah hin barli bu ah kisiam vaithum tâng khat a hung kilîk lut hen, puanbûkte zosia a delkhum in, a leng un a kilek khup un, a chim suak ta mai in,” a tia.

¹⁴A lawipa chun, “Zia chu bangma dang ahi puai, Israel mi Joash chapa, Gideon chemjam ahi chu; Midiante leh asepaiteu zosia chu Pathian in amau khut ah a piakdaw a hita chu,” ti’n a dawnhu ta’n.

¹⁵Gideon in mang neipa thugen leh a hilchetna a het phat in, Pathian a ho ta’n; Israelte giamun lam in a hung kit ah, a kiang un, “Tho un; LALPA‘n la khut un Midiante sepai haw chu a hun pia tai,” a tia.

¹⁶A sepai zathumte chu pawl thum ah a khen zaw in, a leng un pengkul khat leh, lei bêl hawm sung ah thaumei um a choisak chiat a,

¹⁷a kiang un, “Ei en zing unla, ka bawl gual gual in hun bawl un; a giamun kiang uh ka tun phat leh ka bawl gual gual ah la hun bawl chiat ding uh ahi.

¹⁸Kei tawh ka kiang ah um zosia’n, pengkul ka hun mût phat ua leh, nang unle a giamun tuam zosiau ah chun pengkul hun mût chiat unla, ‘LALPA leh Gideon â ding in!’ ti’n la kiko chiat ding uh ahi,” ti’n a hil a.

¹⁹Tichun, Gideon leh a kitonpi sepai zakhatte chu jankim gâlvêng kithentua hun lai tak in, a giamun kiang uh a hang tung suk tau a; ziaphatchun, a pengkul uh mût in, a lei bêl choiteu a hun khen kek chiat tau a.

²⁰Zia gual ma chun, pawl thum ah kisiamte chun a pengkul uh mût chiat in, a lei bêlteu a hun khên kêk chiat tau ah; a veilam ua meisel choi in, a changlam un a pengkul mût ding uh a choi chiat ua; chuleh, “Chemjam chu LALPA leh Gideon â ding,” ti’n a kiko chiat tau a.

²¹Giabuk kîmvêl ah amau umna mun chiat ah kipat a hung dindaw phat un, giabuk ah um zosia chu a taijak ua; a kiko ua, a tai mang zo tau a.

²²Pengkul za thum chu a hun mût chiat phat un, LALPA‘n giabuk sung ah sepai um zosia chu amau leh amau a kisat tuasak ta’n; sepaite chu Zererah lam ah Beth-shettah leh Tabbath lam ah Abel-meholah tiang in a taijak zo tau a.

²³Chun, Midiante delzui dingin Israelte lak ah pawsal um zosia, Naphtali phung ah kipat leh Asher phung ah kipat leh Manasseh phung ah kipat a kodok tau hi.

²⁴Chuleh, Gideon in Ephraim tânggam zosia’n thangko a sawl ah, a kiang un, “Midiante do dingin hung kuan suk unla, Jordan lui ah Beth-barah mun tiang in a la chângpang un,” a tia. Tichun, Ephraim phung ah pawsal zosia kiko khawm in, Beth-barah leh Jordan lui tiang in a la man tan zo tau a.

²⁵Midiante sepai hotu lian pani Oreb leh Zeeb a la man ua; Oreb chu Oreb Suangpi chung in a that ua, Zeeb chu Zeeb grepga hêkna khûk in a that ua, Midiante chu a delzui pek tau ah. Oreb leh Zeeb luchang chu Jordan lui gâl lam ah Gideon kiang in a hun paw tung tau hi.