Read Vaiphei VAIHAWMTE 8 Bible Online

VAIHAWMTE 8 - Vaiphei bible

VAIHAWMTE 8

¹Chun, Ephraim mite chun a kiang in, “Bang ding ah Midiante do ah la kuan lai ua kha ei chial lo la hiu em?” a tiu a. Tichun, thagum sua in a kinakpi tau a.

²Ama’n a kiang un, “Nanghaw bawl tawh te in, kei haw bawl hi bangma kham ahi puai. Nanghaw Ephraim mite bawlsun hile keihaw Abiezarte bawldok zosia sâng in a thupi zaw ma ma hilam!

³Pathian in la khut un Midiante hotu lian pani Oreb tawh Zeeb a hun pia’n; nang uh thilbawl tawh têpi ding bawldok bang ka nei awm?” a ti ta’n. Chutia, a gen phatin, a lungdam tau a.

⁴Chun, Gideon chu Jordan lui lam in a hung kit ah, a lawite mi za thum chu sawlsam ah chau ma ma in a gâlkâipi kit ta’n.

⁵Ziaphatchun, Sukkoth khua mite kiang in, “Midiante lal Zebah leh Zalmunna delzui ah chiana lam un, ka lawite a chawl un, a basam zo tau ah, lungsiat in a nêk ding uh vaithum neukhat ei pe tiam un,” ti’n a don a.

⁶Sukkoth khua hotute chun, “Zebah leh Zalmunna te hun zo ah, la khut ua um ta gual ah, bang ding ah em la sepaite nêk ding ka hun piak ding uh?” a la ti tau a.

⁷Gideon in, “A phai, LALPA chun Zebah leh Zalmunna te hi ka khut ah ei piak phat leh, nangmau taksa le gamthip ah ling leh khau lingneite hun puaitelsak ding ka hi,” ti’n a dawnhu tai.

⁸Zia mun ah kipat chun Penuel lam zuan in a chia to ah; a kiang un zia gual ma chun a don kit a; Penuel ah mite chunle Sukkoth khua mite dawnhu gual ma chun a la dawnhu kit tau hi.

⁹Tichun, Penuel khua mite kiang ah chun, “Gâlzo ah ka hung kile’kit phat leh, zia Insâng hi khen chim malam ding ka hi,” a tia.

¹⁰Zia hun ah chun Zebah leh Zalmunna chu a sepaite, mi sîng khat leh sang nga tawh, sualam gam ah mi, a thibang sunte chu tawh, Karkor mun ah chun a um ua; a lak ua gâlvan chawi ngen mi nuai khat leh sîng ni a la thi zo tau a.

¹¹Tichun, Gideon chu Nobah leh Jogbehah sualam kâi ah thingtâng lampi zui in, a sepaiteu chu a vado tau ah; a sepaiteu chu gâl muang tak ah a um lai tak uh ahi ngâl a.

¹²Zebah leh Zalmunna chu a tai mang tau ah; ama’n a del zui pek ah, tichun Midiante leng pani, Zebah leh Zalmunna chu a hun hingmat ta’n; a sepaiteu zosia a buaisia jak tau hi.

¹³Chun, Joash chapa Gideon chu kidona mun ah kipat in Heres chiangkot lam in a hung a,

¹⁴Sukkoth khua mi tangval pakhat a man ah, thu a dong ah; ama’n Sukkoth khua hotute leh upa sawmsagi leh sagite min chu a zik daw piak a.

¹⁵Ziaphatchun, Sukkoth khua mipite kiang in a hung ah, a kiang un, “En un, Zebah leh Zalmunna te ni hi, nang un, ‘Zebah leh Zalmunna la khut ah umsa gual ah, kei un la sepai sawlsamte nêk ding vaithum bangti hun piak ding ka hiu em?’ lei tiu ah, lei simmaw ten uh kha,” a tia.

¹⁶Tichun, a khawpi sung ah upate chu a man ah, gamlak ling leh khau lingneite chu mang in Sukkoth khua mite chu a gawt ta’n.

¹⁷Penuel ah Insâng chu vawchim malam in, a khua sung ah mipite chu le a that tai.

¹⁸Ziazaw chun, Zebah leh Zalmunna kiang in, “Tabor tâng ah la mi tha’teu kha bang gual mi a hiu em?” ti’n a dong ah. Amau inle, “Nangma gual in, a bawn un leng chapa gual ngen a hiu,” ti’n a dawnhuu a.

¹⁹Ama’n a kiang un, “Amau kha ka suapi, ka nu chapa ngen a hiu; amau kha a la that lo hileu chin, LALPA jal in, nang uh hun that lo ding ka hi,” ti’n a dawnhu a.

²⁰Tichun, a chapa upa pen Jether kiang in, “Chia inla, a paniu hin va that in,” a tia. Himaleh, chapang ahi nâk lai ziakin, chapang chun a chemjam a jukdok ziang ngam ta puai.

²¹Ziaphatchun, Zebah leh Zalmunna chun, “Nang hung inla, ei hung that in, mi piting chu a tha le hat ding a pawm,” a tiu a. Tichun, Gideon in Zebah leh Zalmunna chu that dingin a nai phei a; chuleh, a sangawngsau ngawng aw chu a kilâk tai.

²²Ziaphatchun, Israelte’n Gideon kiang ah chun, “Nang in Midiante khut ah kipat lei hukdok tâk ziakin, nang leh la chapa leh la tu’tiang un ka chung ua vaihawm in pang tau in,” a tiu a.

²³Gideon in a kiang un, “La chung ua vaihawm in pang pua’ng ka tin, ka chapa’n le la chung un vaihawm pua’n ah; LALPA‘n la chung un vaihawm ding ahi,” ti’n a dawnhu tai.

²⁴Ziaphatchun, Gideon in, “La kiang un thil pakhat don ing ka: Gâl lâk la chan uh bilba kha ei pechiat leu chin ka nuam hi,” a tia. (A gâlteu chu Ishmael mite a hiziak un, sana bilba a nei chiat ngâl un.)

²⁵Amau chun, “Ziate chu phal tak in hun piang kau,” ti’n a dawnhu tau ah. Tichun, puan a phau ah, mi tin in gâl lâk ah bilba a lâk chiat uh kha a hun sepkhawm tau a.

²⁶A dotdaw sana bilbate gik dan chu sana shekel sâng leh za sagi bûk ahi (ziate bân ah chun sana khî leh chau, Midian lengte puansil sandup leh sangawngsau ngawng awte chule ahi.)

²⁷Gideon in zia sanate chu Ephod khat siamna’n a mang ta’n; zia chu a khawpi Ophrah in a koi ah; Israelte zia milim lam ah chun a kihei mang khawlaw tau a; tichun, Gideon leh a Inkuanpite a ding ah kipalna thâng a hung hi tai.

²⁸Tichun, Midiante chu thodok kit zo talo ding khop in Israelte’n a tawden tau. Tichun, a gam chu Gideon dam sung, kum sawmli chu gâl muang tak in a um tai.

²⁹Joash chapa Jerubbaal chu ama In ah chêng dingin a chia to tai.

³⁰Zia hun ah chun, Gideon in ji tam tak a nei ziakin, chapa sawmsagi a nei a.

³¹Shekhem khua a thâikêmnu’nle chapa khat a hinpiak ah, a min in Abimelekh a sak hi.

³²Ziaphatchun, Joash chapa Gideon chu, khûp leh khâ kichi chan ah dam in a thi tai; chuleh, Abiezarte gam sung ah Ophrah khuan, a pa Joash thân ma ma in a vui tau hi.

³³Gideon thi’zaw zaw in, Israelte’n Baal ho in, Baal-berith a pathian ua ngai in, a nungtawl gam kit tau hi.

³⁴Israelte’n LALPA a Pathian uh, a kîmvêl ua a melmateu khut ah kipat hukdokpa chu a hemil tau a;

³⁵chuleh, Jerubbaal (zia chu Gideon ahi) in Israelte â ding ah thilpha bang jat a la bawl piak ta maleh, phatna thuk lo in, a In sung mite â dingin a ginum zo ta puau hi.