Read Vaiphei VAIHAWMTE 9 Bible Online

VAIHAWMTE 9 - Vaiphei bible

VAIHAWMTE 9

¹Tu’hin, Jerubbaal chapa Abimelekh chu Shekhem khua a nu chanaute kiang in a chia suk ah, amau leh a nu phung ah mite zosia kiang in,

²“Shekhem khua hotute zosia het in: ‘Jerubbaal chate pawsal sawmsagi’n la chung ua vai a hawm uh tawh, mi khat bep la chung ua vaihawm ah a pan chu khoi zawk pha la sa zawu em?’ Kei hi vang la mi leh sa ma mau ka hi ti hezing un,” ti’n vagen un a tia.

³A nu suapite chun, Shekhem khua hotute het in zia thu chu a va gen tau ah; chuleh, a lungthim tak un Abimelekh zui nopna a nei un, a ziak chu amau in, “Ama chu I suapiu ahi chulam,” a tiu a.

⁴Baal-berith ho’na in thawlawm ah kipat in dangka shekel sawmsagi a pia tau ah; Abimelekh in zia sum chu, mi dukdak lo leh pannabeite a nungzui ding ah gawina’n a mang tai.

⁵A pa In Ophrah lam in a chia ta’n, a suapite, Jerubbaal chapa sawmsagite chu suangpi khat chung in a that a; himaleh, Jerubbaal chapa neu pen Jotham chu a la kisêl mang ziakin, a that kha ta puai.

⁶Ziaphatchun, Shekhem khua leh Beth-millo khua hotute zosia hung khawm in, Shekhem khua gangpi bul ah dawikhuam kiang ah Abimelekh chu Leng ah siam dingin a chia tau a.

⁷Zia thu chu Jotham a hil phat un, ama le a chia ah, Gerizim Tângvûm ah dingin, aw ngai tak in a kiko ah, a kiang un, “Nanghaw Shekhem khua hotute haw, Pathian in a hun ngaithâk theina dingin zia thu hi a la ngai tiam un:

⁸Khatvei chu leng ding têl in, thing zosia a chia khawm tau a. Oliv thingkung kiang in: ‘Ka chung ua vai hung hawm in,’ a tiu a.

⁹Oliv thingkung chun: ‘Thingte chung bep ah vaihawm ah ka hung pan chun, bangti’n pathiante leh mihingte ei doisaknau sathau chu pûtsak thei ta ding ka hem?’ ti’n a dawnhu ta’n.

¹⁰Chun, thingkungte chun theipi kung kiang in, ‘Hung inla, ka chung ua vai hung hawm in,’ a tiu a.

¹¹Himaleh, theipi kung chun, ‘Thingte chung bep ah vaihawm ah ka hung pan chun, bangti’n thum tak leh tui tak in ga’thei ta ding ka hem?’ ti’n a dawnhu ta’n.

¹²Ziaphatchun, thingte chun, grep gui kiang in: ‘Nang hung inla, ka chung ua vai hung hawm in,’ a tiu a.

¹³Himaleh, grep gui chun: ‘Thingte chung bep ah vaihawm ah ka hung pan chun, bangti’n pathiante leh mihingte hi’kipâk pen uain chu, pûtsak thei ta ding ka hem?’ ti’n a dawnhu a.

¹⁴Tichun, thing zosia chun lingvom kiang in, ‘Nang hung inla, ka chung ua vai hung hawm in,’ a tiu a.

¹⁵Chun, lingvom chun thingte kiang in, ‘Gingcha tak ah la chung ua leng hi ding ah sathau lei nu’ guat ua leh, ka buk lim nuai ah hung kisêl un; a chutilo ding leh lingvom ah kipat in, meikuang hung pawt hen la, Lebanon ah sidar thing zosia kâng tum mai ta hen’ ” ti’n a dawnhu tai.

¹⁶Ziaziakchun, tu’hin nang un gingcha tak leh ja tak in Abimelekh hi leng hi ding ah la siam phat ua leh, Jerubbaal in a thil bawlphat tawh kigûn tak ah ama leh a In sung mite chung ah la bawlphat nop uh chun:

¹⁷ka pa’n a hinna pedok hial in la gâl uh Midiante chu a la do in, a khut ua kipat in a hun hukdok ta’n;

¹⁸himaleh, tu’ni hin ka pa In sung mite do in la kipan un, a chapa sawmsagite chu suangpi khat chung in la that un; chuleh, a suaknu chapa Abimelekh chu la suapiu ahiziak in, Shekhem khua hotute chung ah lal hi dingin la siam tau a.

¹⁹Jerubbaal leh a Inkuante gingcha tak leh ja tak ah tu’ni hi bawl la hiu chun, Abimelekh chung in kipak unla, ama le la chung un kipak ta hen;

²⁰achutiloleh chu, Abimelekh ah kipat in mei hung kuangdok hen la, Shekhem leh Beth-millo khua hotute chu kâng tum hen la; chuleh, Shekhem leh Beth-millo khua hotute lak ah kipat in mei hung kuangdok hen la, Abimelekh chu kâng tum ziang ta hen, a hun ti tai.

²¹Ziaphatchun, Jotham chu Beer lam ah tai in, a jam mang ta’n; zia tak ah chun a suapipa Abimelekh a lau ziakin, a hung chêng den tai.

²²Abimelekh in Israelte chung ah kum thum vai a hawm a.

²³Himaleh, Pathian in Abimelekh leh Shekhem khua hotute kikâl in thagau buak a hun sawl ta’n; chuleh, Shekhem khua hotute chu Abimelekh chung ah lepchia tak in a hung tawi tau a.

²⁴Shekhem ah hotute chun, a suapite a tha theina ding ah Abimelekh a la panpi ziak ua, Jerubbaal chapa sawmsagite chung ah a khut a la thâkna ziak ah, a thisan phuba’u chu a chung ah lâk a hitheina ding ah a chung ah zia gual chu hung tung ahi.

²⁵Tichun, ama chung ah a helna ziak un, Shekhem ah hotute chun tângvûm ah te mi a chân-guksak un. Zia lampi hung taphot chu a la suam sek ui ti chu, Abimelekh a hil tau a.

²⁶Ebed chapa Gaal tawh a Inkuante Shekhem ah a hung pêm lut phat un, Shekhem hotute chun a la taksang ma mau a.

²⁷Lou ah kuandok in, grep ga alo ua, a chil ua, nunnop a bawl tau a. Chuleh, a pathian ho’nau ah chia in, a neu ah, a dawn ua, Abimelekh chu a gensia tau a.

²⁸Ebed chapa Gaal chun, “Abimelekh la tiu chu kua a hia, ei haw Shekhem ah umte hi kua I hiu ah a hem a na I sep mai ding uh chu? Jerubbaal chapa leh a khawnbawl Zebul in Shekhem pa Hamor mite na a la sep uh hilo a hem?

²⁹Zia mipite hi ka thunuai ah um hita maileu chu aw! Chuti hileh, Abimelekh hi paitha’ng ka tin, a kiang in, ‘La sepaite hi’pung inla, hung kuandok in,’ ti’ng ka tin,” a tia.

³⁰Ebed chapa Gaal thugen chu khawpi sung ah vaihawmtu khat, Zebul in a la het phat in, a lung a na ma ma a.

³¹Arumah khua um Abimelekh kiang in mi a sawl ah, “Ngaitia, Ebed chapa Gaal chu a Inkuan un Shekhem khuan a hung un, khawpi chu nangma hun do dingin a hung choktho hi.

³²Ziaziakchun, tu’ ma ma hin la kiang ah sepai um zosia hun pui in, a jan jan ah chia in, loulai ah ngâk unla;

³³jingkal matak, nisa suak jul in tho unla, khawpi lam chu del un; ama tawh a kiang ah sepai umte chu nangma do ding ah a hung pawtdok phat ua leh, la theitawp uh sua unla, la nop dan dan un bawlthei ta’n lau,” ti’n a vagen sak a.

³⁴Chutichun, Abimelekh tawh a kiang ah sepai um zosia chu a jan jan in a kipan ua, pawl li ah kisiam in Shekhem khua chu a ûm tau a.

³⁵Ebed chapa Gaal chu a chia ah, khawpi kul kotkhak bul ah a vadin phatin, Abimelekh tawh a kiang ah sepaite chu a kisêlguknau mun ah kipat in a hung pawtdok tau a.

³⁶Chuleh, Gaal in a vak mu phât in, Zebul kiang in, “Entia, tângvûm lam ah kipat in mipi a hung suk ui!” a tia. Ahi’n, Zebul in, “tâng liapna munte khi mihing gual ah la mu ahi chulam e,” a ti piak a.

³⁷Gaal in a gen kit ah, “En in, Tabbur-erez lam ah kipat in mipi a hung suk un, Elon-menonenim lam ah kipat inle hon khat a hung ui,” a tia.

³⁸Ziaphatchun, Zebul in, “Nangma, ‘Abimelekh chu kua a hia a hem a na I sep piak ding uh,’ ti pa; tu’hin la kisuanna kha khoilam tungzo ahi tam? Zia a sepaite khi bangma la ngailote kha hilo maw? Kuan inla, amau haw saw tu’hin vado ta’n la,” a ti piak ta’n.

³⁹Tichun, Gaal chun Shekhem ah hotute chu pui in a chiau a, Abimelekh chu a vado tau a.

⁴⁰Abimelekh in a del ah, ama chu a jam mang ta’n, kul kotkhak bul tiang in, mi tam tak liam in a kithejak tau a.

⁴¹Tichun, Abimelekh chu Arumah khuan a chêngden ta’n; chuleh, Zebul in Gaal leh a Inkuante zosia chu a nawdok ah, tichun, Shekhem khuan a chêng thei ta puau.

⁴²A jing ah chun mipite chu lou in a kuan ua. Zia thu chu Abimelekh a hil phat un,

⁴³a sepaite a puiah, pawl thum in a siam ah, loulai ah chun a kiselsak ah. A et vêl vêl leh khawpi sungah kipat mipi hung pawtdokte chu a mu ta’n, amau chu a hun do ah, a that gam tai.

⁴⁴Abimelekh in a umpite sia chun a ma lam uh del in, khawpi kul kotkhak bul ah chun a la pang tau a; pawl nite chun loulai ah umte chu del in, a that tau a.

⁴⁵Abimelekh in zia ni sung sia chu khawpi do-na’n a mang tum ta’n; tichun, khawpi chu a zo ta’n, a sung ah mihing zosia chule a that gam ta’n; khawpi chu hisia’n, chi a the’khum tai.

⁴⁶Shekhem Insâng ah um hotute’n a het phat un, El-berith ho’na in kul det sung in a jam lut tau a.

⁴⁷Shekhem Insâng sung ah um hotute zosia taikhawmna chu Abimelekh a hil tau a.

⁴⁸Tichun, Abimelekh chu a kiang ah sepai um zosia tawh Zalmon tâng chung lam in a kal to ua. Abimelekh in heicha a pan ah, munphi thing lom khat a lakhawm ah, a liangko in a hun pua’n. Ziaphatchun, a kiang ah sepaite kiang ah chun, “Ka thilbawl la mu tau ah, ka bawl gual gual hin nang unle kin tak in hun bawl un,” a tia.

⁴⁹Tichun, sepai zosia’n thing lom khat chiat hun sâttha’n, Abimelekh chu zui in, kulpi bul ah chun a sia-khawm tau ah; zia kul chu mei in a hâl tau; tichun, Shekhem Insâng ah um zosia chu a thi tau ah; zia um zosia chu numei leh pawsal kigawm in sang khat vêl a hiu a.

⁵⁰Ziaphatchun, Abimelekh chu Thebez lam in a chia ah, Thebez do dingin a kikul tau ah; chuleh, zo ngâl in, a la tau hi.

⁵¹Himaleh, zia khawpi sung ah chun Insâng kul detdo tak khat a la um ah; zia sung ah chun numei, pawsal leh a khawpi sung ah hotute zosia taikhawm in, a kisungkam khum ua, a chung lam in a kal to tau a.

⁵²Abimelekh chu kulsâng lam in a chia ah, a vado ta’n; kul kotkhak mei ah hâl dingin a hun zuan tai.

⁵³Himaleh, numei khat in sumhêk suang a chung lam zawk chu chung lam ah pat in Abimelekh a hun khiak khum ah, a luchang a sep kêk tai.

⁵⁴Kin tak in a gâlvan chawi tangval a ko ah, a kiang in, “La chemjam jutdok inla, ei satlum ziang in; achutiloleh, min, ‘numei thâlup ahi,’ ei ti kha’n au,” a tia. Tichun, tangval chunle a chemjam chun a sun thil ah, a thi tai.

⁵⁵Israelte’n Abimelekh thi chu a mu phât un, a In lam chiat un a chia kit tau a.

⁵⁶Zia gual chun, Pathian in Abimelekh gitlona, a suapi sawmsagite that ah, a pa chung ah a gitlona phuba chu a chung in a tunsak ta’n;

⁵⁷chuleh, Shekhem khua mite gitlona chu Pathian in a chung un a tunsak ah; a chung un Jerubbaal chapa Jotham sapsiatna chu a hung guitung tai.