Read Vaiphei 2 JOHAN 1 Bible Online

2 JOHAN 1 - Vaiphei bible

2 JOHAN 1

¹Upa chun, têlchuam ah um Numei leh a chate, thutak jal ah ka ngainat, keima bep hilo ah, thutak he zosiate’n a ngainat uh kiang ah chun:

²Thutak eimau ah um zing leh I kiang ah kumtuang ah um zing ding ziak ah chun,

³Pa Pathian leh Lalpa Jesu Khrista, Pa Chapa ah kipat in, hepina leh jangaina leh chamna chu thutak leh hepina jal in I kiang un um zing ta hen.

⁴Pa ah kipat thupiak I mu gual ua, la chate thutak in a um ui ti ka mu ziakin ka kipak ma ma hi.

⁵Tu’hin vang, numei ja’um, thu piak thak hun pia hilo in, a lim ah kipat I la neisau gual in, kihepitua chiat hitiu ti’n ka hun zik ahi.

⁶Zia hi hepina chu ahi: A thupiak dungzui ah I um uh hi; zia thupiak hi a lim ah kipat la neisau chu ahi, zia ah chun um zing tau in.

⁷Jesu Khrista chu taksa ngei ah hung ahi ti dinpi lo, thêmtu tam tak khawvel ah hin a hung pawt tau a; zia gual mi taphot chu thêmtu leh Khrista dodâl chu a hiu!

⁸I sepna ziak uh chu mansua lo ah, kipakman kim chu la mutheina ding un kivêng phau in.

⁹Kuale Khrista thuhilna ah um zing lo ah, zia chu a belap chun, Pathian a nei puai; kuale zia thuhilna chu a umzing chun Pa leh Chapa a nei gêl gêl hi.

¹⁰Kuale la kiang ua hung ah, zia thuhilna hun paw lo chu, In ah pui lût kiu inla, lop kiu in.

¹¹Zia gual mite a la lop chu a thil phalo hi’nau ah pang ahi ngal ui.

¹²La kiang ah gen ding tam tak ka nei hi; himaleh, lekhapêk leh lekhatui ah zik ka nuam puai; zia sâng ah chun, la kipaknau a bukim theina dingin la kiang ua hung ah, kimaitua ah kiho ka kinem hi.

¹³La suapinu têl chate hin chibai a hun bûk ui.