Read Vaiphei THUPUAN 17 Bible Online

THUPUAN 17 - Vaiphei bible

THUPUAN 17

¹Belbu pasagi chawi vansawlchâk pasagite lak ah pakhat chu a hung ah, ei hung ho a: “Zia lam hin hung in, tui tam tak chung ah kichu, numei kizuaknu chung ah vaihawmna lopi chu etsak ing ka;

²lei chung ah lalte chu ama tawh a thânghuai un, chuleh a thanhuaina uain chun lei ah lalte vâk kham in a um un,” ti in.

³Tichun, thagau chun gamthip lam in ei paw mang ta’n; Pathian gensiatna dim luchang pasagi leh kî sawm nei sahâng sandup chung ah chuang numei pakhat ka mu’n.

⁴Zia nu chun puan sandup leh sandâng a sil ah, sana leh suangmantam leh tuikep suang in a kijem ah, sana no, thil ki’dak um leh thanhuaina thilbuak ah dim a chawi a.

⁵A chal in, “Babulon khawpi thugûk, lei chung ah nawchizuakte leh thânghuaite nu,” ti a kizik a.

⁶Zia numei chu mithiangthote thisan leh Jesu ziak ah martarte thisan dawn kham in ka mu’n; ama ka mu in mak ka sa ma ma a.

⁷Vansawlchâk chun ka kiang in, Bangatia maksa la hem? Zia numeinu chuanna sahâng luchang sagi leh kî sawm nei leh a zia nu thugûk chu hun hil ding ka hi.

⁸Zia sahâng la mu kha a la umsa um lo kit, lei kawkhûk tawp nei lo ah kipat hung pawt kit ding leh manthaina lut kit ding chu ahi. Um zet ta ah, um lo kit sahâng chu a hung pawt kit lei ah mite, khawvel kisiam tîl ah kipat Hinna Lekhabu min kikhumlote chun a hun mu kit tak ua leh mak sa ma ma in au.

⁹Zia hin lungthim pilna nei a kul hi. Zia a luchang sagite chu zia nu chutna tâng sagite chu a hiu.

¹⁰Chuleh, lal sagite le a hiu ah, a lak ua pangate chu a pûk tau a, pakhat chu a um lai tak ahi’n, pakhat chu a hung nai puai; ama chu a hung phat leh hun chomcha sung um ding ahi.

¹¹Chuleh, zia sahâng um ta zet ah, um lo kit kha a pagiatna’n hung pang intin; ama chu sagite lak ah mi ma kha ahi’n, manthaina lut kit ding ahi.

¹²Chuleh, a kî sawm la mute kha lal sawmte a hiu; tu’hin vang lenggam a nei nai puau hi; ahi’n la, hun dan kâl khat sung vêl chu sahâng tawh lalte gual in thunei tak in um in au.

¹³Ziate chun thiltup kibang a nei un, a thil hitheinau leh a hâtnau chu sahâng kiang ah chun pia’n au.

¹⁴Amau chun Belamno chu do intiu in; himaleh, Belamno chun amau chu zo in a; lalte Lal leh hotute Hotu ahi ngal a; tichun, a ko te leh a têl te leh ginumte chu a kiang ah chun um ta’n au, a tia.

¹⁵Chun, ama chun ka kiang in, “Nawchizuaknu chutna tui la mute chu mitinte, chitinte, namtinte leh pautinte chu a hiu a.

¹⁶Chuleh, a kî sawm la mute leh sahâng chun nawchizuaknu chu hun muda intiu in; bangma nei lo leh ngawnchang in koi intiu in; a sa ne’n, mei ah hâl tum ta’n au.

¹⁷Pathian thute sukbukim ahi masang, ama doilam a bawl ua, lungthim khat a nei ua, a lenggam uh sahâng kiang ah a piakna ding un, Pathian in amau ah chun ngaituana a koi tangal a.

¹⁸Zia numei la mu hi khawpi lopi, lei ah lalte chung ah vaihawm chu ahi,” a ti’n.