Read Vaiphei THUPUAN 19 Bible Online

THUPUAN 19 - Vaiphei bible

THUPUAN 19

¹Ziazaw chun, mipi tam tak aw gi van ah kipat in ka he: “Halleluijah, hukdamnate, lopinate, choihoinate, leh thilhitheinate chu I Pathian â ahi.

²A vaihawmna chu a fel in, a dik ahi; ama chun nawchizuaknu lopi tak, a thanhuaina lei chung hi’buaknu chung ah chun vai a hawm a, a suakte phuba chu ama khut ngei in a la tai,” a tiu ka he.

³Chuleh, “Halleluijah! Amanu kihâlna meikhu chu, kumtuang kumtuang dai dingin a khu to tai,” a ti nawn kit sek ua.

⁴Chun, upa sawmni leh pali leh thilhing palite chu a bokkhup ua, “Amen, Halleluijah,” ti’n Pathian lal chutpha kichu chu a ho tau a.

⁵Chun, lalchutpha ah kipat chun aw a hung pawt a, “Nanghaw a suakte leh ama lau milian leh mineute haw, I Pathian uh hi pâk ta un,” a hun tia.

⁶Mipi tam tak aw tawhbang, tui tampi git tawhbang, van nasa tak git tawhbang hial in: “Halleluijah, Lalpa Pathian Bangkim hi’thei chun vai a hawm tai.

⁷Lim leh kipak tak in ama chu chawihoi hitiu. Belamno mo nei hun a tung ta’n, a mo dingle a kisa zo tai,

⁸A monu ding chu puan malngat thiang leh, vâm tak silsak a hi’n, zia puan malngat chu, a mi thiangthote dikna nasep ahi”. A tiu a.

⁹Ama chun ka kiang in, “Belamno moneina luaithe’na ûm ding ah chialte chu a hamphau hi, ti hi zik in,” ei tia. “Ziate hi Pathian ngei in a gen ahi,” a tia.

¹⁰Ziaphatchun, a kengbul ah bok khup ah biak ding gua’n ka nai leh ama’n, “Hi’kin, keima le Jesu hiatsakna thu nei ah, la suapi leh la suak chanpi ka hi; Pathian bep chu bia’n; Jesu thu hiatsak chu thagau ah thugen hi ahiziak in,” a tia.

¹¹Chun, van a hung kihong ah, sakol kâng khat hung pawt ka mu; a chung ah chuang chu Ginum leh Dik a hia; ama chun dik tak in vai a hawm ah, gâl le a do sek hi.

¹²A mitte chu meikuang gual a hiu ah, a luchang chun lallukhuk tam tak a khuk ah, kuama het lo, ama bep in a het min kizikna lallukhuk ahi.

¹³Chuleh, thisan ah kidia puan in a kithuam ah, a min chu, “Pathian Thu,” ahi.

¹⁴Van sepaite chun puan malngat thiang leh vâm sil in, sakol kâng chung ah chuang chiat in ama chu a zui ua.

¹⁵A kam in chemjam hiam, namtin a sukchimitna ding chu a pawt a; thîk tiang in vai hawm intin; Pathian Bangkim Hi’thei lungnatna uain sûkna khûk ah chun chil in a.

¹⁶A puan chung leh a malpi chung in min a kizik a, “LALTE LAL LEH HOTUTE HOTU,” ti in.

¹⁷Chun, nisa chung ah vansawlchâk khat ding ka mu’n; ama chun aw ngai tak in, vanlaijawl ah lêng vachate kiang ah chun, “Pathian lopi tak luaithe’na chun hung kikhawm un:

¹⁸Lalte, sepaihotute, milopite, sakol leh a chung ah chuangte, mihingte, suak leh suaklote, milian leh mineute sate chu ne dingin hung khawm un,” a tia.

¹⁹Sahâng leh lei ah lalte leh a sepaiteu chu, sakol chung ah chuang leh a sepaite tawh kido ding ah hung khawm ka mu.

²⁰Sahâng chu a man ua, jawlnei lêm a ma-âng ah thilmak bawl sek leh, sahâng tepte’na nei ding ah mi thêm zo sek kha, a paniu in mei leh kât ah kâng meidil ah chun a hing in a pai lut tau a.

²¹A dangte chu sakol chung ah chuangpa kam ah chemjam pawt ah chun thâgam in a um tau a; chunglêng vachate chu a sa’u in a kivâk vâ tau hi.