Read Vaiphei THUPUAN 2 Bible Online

THUPUAN 2 - Vaiphei bible

THUPUAN 2

¹Ephesa khua kochuam vansawlchâk kiang ah chun zia gual hin zik in: A khut changlam ah aksi pasagi chawi ah, sana thaumei koina pasagi lak ah vâk lumlet khan zia thu hi a gen hi:

²La nasep dante, la sepgim dante, la thok gunchu dante, migilo haw la la ngai theilo dante kha ka hia’i. Sawlchâk hilo pi ah ka hi kitite la la patep ah, juauthei a hiu ti la he tai.

³Thok le la thuak ta’n, himaleh, la thuak zo jel hi; ka min ziakin la sêmgim ta’n; himaleh, la chau diak puai.

⁴Himaleh, demna khat ka hun nei hi, la hepina masa kha la nusia tai.

⁵Ziaziakchun, khoi ah kipat a la pûk la hi em kingaitua inla, la lung hun hei kit inla, la thil hi’masate kha hun pan kit ta’n; la lung la heilo chun hung ing ka tin, la thaumei koina chu hung chawn mang ding ka hi.

⁶Ahi’n, Nikolaitante thilbawl la huat hi vang, keima’nle ka hua a hi; zia chu la phatna khat ahi.

⁷Thagau in kochuamte kiang ah thu a gen hi, nakhang nei taphot chun he tau hen. A zo tapo chu Pathian paradis ah a nêk dingin hinna thingga pia ding ka hi, a tii, ti in.

⁸Smurna khua kochuam vansawlchâk kiang ah chun, zia gual hin zik in: A masa pen leh a nunung pen, thi ta hung hing kit ta chun zia thu hi a gen hi:

⁹La thil hi dante, la genthei dante leh la vaichâk dante (ahi’n la, la hausa nai) ka hun hia’i; Juda mi hilo ah ka hi hung kitite, Setan kikhopna In hizaw te hun gensiatna chule ka hia’i.

¹⁰La thil hun thok dingte hi lau kin; ngaitia, patep ah la umtheina dingin diabol in la lak ua khenkhat suangkul ah hun khum intin; ni sawm sung genthei thuak in lau. Himaleh, thi tiang in ginum in hung um ta’n; tichun, hinna lallukhuk hun pia ding ka hi.

¹¹Thagau in kochuamte kiang ah thu a gen hi, nakhang nei taphot chun he tau hen. Kuale a zo tapo chu thinina chun bangma law ta pua’n ah, atii, ti in.

¹²Pergamum khua kochuam vansawlchâk kiang ah chun, zia gual hin zik in: Chemjam hiamtua hiam tak neipa khan, zia thu hi a gen hi:

¹³La thil hi zosia leh la chênna munte, chuleh, Setan chutpha umna natiang ka hia’i; ka min chu det tak in la vop zing a, Antipas hun lai ah ka palai ginum, Setan chênna la lak ua a tha lai khan le, keima lei ginna chu la haisan diak puai.

¹⁴Himaleh, demna neukhat ka nei hi; la lak ua Balaam thuhilna mang ah, Balak chu Israel chate kipalpâina ding ah milim hona sate ne ding ah, chuleh, thanghuai ding ah zilsakna kha zui la um ui.

¹⁵Chuleh, Nikolaitan haw lawi zilsakna thu zuite lawi kha nangmau lak in la pansak ui.

¹⁶Ziaziakchun, la lung hun hei in; achutilochun, hung vak ing ka tin, ka kam ah chemjam ah hin amau chu hun do ding ka hi.

¹⁷Thagau in kochuamte kiang ah thu a gen hi, nakhang nei taphot chun he tau hen. Kuale a zo tapo chu manna sêlgûk chu pia’ng ka tin, suang val le pia ding ka hi; zia suang chung ah chun min thak, a chang dingte bep longal in a het lo diu chu a kizik hi, a tii, ti in.

¹⁸Thuatira khua kochuam vansawlchâk kiang ah chun zia gual hin zik in: Pathian Chapa, meikuang gual mit nei ah, a keng sum-eng gual ah val khan zia thu hi a gen hi:

¹⁹La thil hi’dante, la hepina nei dante, la nasepte, la ginnate, la thok gunchu dante leh la thil hi nunungpente chu a tîl ah sâng in a nasa zawi ti le ka hia’i.

²⁰Himaleh, demna neukhat ka nei hi: Jawlnei kiti Jezebel kha la ngai thei ziakin. Ama chun ka suakte chu thanghuai ding leh, milim hona kithoina sate ne dingin a thêm sek a.

²¹A lungheina dingin hun chomkhat ka pia’n; himaleh, a thanhuaina kipat chun a lung a hei diak him him puai.

²²Ngai in, ama chu jalkhun chung ah hun paitha ding ka hi; chuleh, ama thanhuaipite chun le a lung uh a heilo ua leh dâ-umna huaisia tak ah chun pai lut ding ka hi;

²³chuleh, a chate chule that ding ka hi. Kochuam zosia chun keima hi ngaituana leh lungthim zosia enchianpa ka hi ti hun he ta’n au; tichun, la nasep dungzui un hun thuk ta’ng ka.

²⁴Himaleh, nanghaw Thuatira khua umte lak ah, zia zilsakna pom lo leh, mi khenkhat in, “Setan Thugil,” a titeu zil lo te kiang in zia hi ka gen hi: Puakgik dang hun guanbe ta pua’ng ka;

²⁵ka hung kit masia la neisa kha a la vop pha zing ta’n.

²⁶A zotu leh a tawp tiang ah ka nâte sêmpha zingte kiang ah chun: Namte chung ah thuneina pia’ng ka tin,

²⁷ama chun a chung un thîk tiang in vai hun hawm intin; belvêlpa’n belte nêl dim diam ah a khetbuang gual hi’n a.

²⁸Ka pa ah kipat thuneina ka mu tâk gual in, a zo te chu jingsol aksi chu pia’ng ka.

²⁹Thagau in kochuamte kiang ah thu a gen hi, nakhang nei taphot chun he tau hen, a tii, ti in.