Read Vaiphei THUPUAN 20 Bible Online

THUPUAN 20 - Vaiphei bible

THUPUAN 20

¹Ziazaw chun, vansawlchâk khat, lei kawkhûk tawp nei lo honna chabi leh thîkkhau lopi tak chawi ah hung ka mu’n.

²Dragon, gulpitêk, Diabol leh Setan a tiu chu a man ah, kum sâng khat sung â dingin a kân tawm a.

³Lei kawkhûk tawp nei lo ah chun a pai lut ah, kot a khak khum ah, a châl det tai; tichun, namtin a thep kit lona dingin kum sang khat a tin masia um den dingin a nusia a. Zia zaw chuleh, hun sawt lo cha sung â ding bep ah thâdaw kit hiding ahi.

⁴Chun, lalchutphate leh a chung ah kichute chu ka mu’n, a kiang un vaihawmna piak ahi’n. A khut ua a hem, a chal ua a hem ah tepte ding a la nuamlote, sahângle ho nuam lo ah, a limle ho nuam lo ah, Pathian thu leh Jesu hetpina ziak ah a ngawng uh tan ah a la umte thagau chule ka mu’n; amau chu Khrista tawh um khawm in, vai a hawm khawm un.

⁵(Mithi dangte a hiu leh, kum sang khat a tin masia thokit tadi pua’n au.) Zia chu thawkitna masa chu ahi.

⁶Thawkitna masa pangte chu a thiangtho un, a hamphau hi; amau chung in thi ni’na chun thu a nei ta puai; ahi’n, Pathian leh Khrista thiampute hi’n tiu in, ama tawh kum sang khat vaihawm khawm ta’n au.

⁷Kum sang khat chu a bei phat leh, Setan chu a tânna kipat thâdaw hi’ntin;

⁸lei chung kil li um namte, Gog leh Magog thêm in kido dingin pui khawm in a; a tam dan uh chu tuisuagiat piaunêl jat hi’n a.

⁹Lei vailam dâp suak hial ah kitawl to in, mithiangthote kikulna leh a ngainat khawpi chu a ûm kîmvêl tau ah; himaleh, van ah kipat chun mei ahung ketha a kâng tum tai.

¹⁰Amau thêm zotu Diabol chu, sahâng leh jawlnei lêm a pailutnau mei leh kât ah kang meidil ah chun a pai lut tau a: Zia tak ah chun kumtuang in gim thuak in um ta’n au.

¹¹Lalchutpha vam lopi chung ah kichu chu ka mu’n, a ma-âng ah kipat chun lei leh van a tai mang tau a; amau â dingin mun a um ta puai.

¹²Mithite, a lian a neu, lalchutpha ma-âng ah hung ding chu ka mu’n; ziaphatchun, Lekhabu chu a phêt un; chuleh, lekhabu dang Hinna Lekhabu kiti chu a phêt kit un; mithite zosia chu a thil hi dan uh Lekhabu kizik dungzui in thu a tan piak tau a.

¹³Tuisuagiat chun a sung ah mithite chu a thâdok a; thina leh mithi khua’n le a sung ua mithi um zosia chu a hun thâdok un; mitin chu a nasep dungzui chiat un vai a hawm piak tau hi.

¹⁴Thina leh mithi khuate chu meidil ah a pai tau a. Zia chu thini’na chu ahi tai.

¹⁵Kuale Hinna Lekhabu a min kizik lo tapo chu meidil in a pai tau hi.