Read Vaiphei THUPUAN 22 Bible Online

THUPUAN 22 - Vaiphei bible

THUPUAN 22

¹Vansawlchâk chun, Pathian leh Belamno lalchutpha kipat luangdok hinna lui tui thiang tak, krustal suang gual ah thiang chu ei etsak a.

²Khawpi khawlai vêl leh zia luigâl langtua gêl ah chun, hinna thing a kiphu ah, ga chi sawm leh ni in tha si’n in a ga ah; a duate chu nam tinte damna ding ahi.

³Hânsia um ta pua’n tin, Pathian leh Belamno lalchutpha chu zia chun um intin; a nasemte chun a na sep piak in au.

⁴Tichun, a mêl chu mu’n tiu in, a min chu a chalkiu in um in a.

⁵Jan um ta pua’n tin; thaumei vâk leh nisa vâk le ngai ta pua’n tin; Lalpa Pathian in amau chu salvâk ta’n tin; kumtuang in vaihawm ta’n au.

⁶Chun, ama chun ka kiang in, “Zia thu kigente hi a ginum in a dik ahi; jawlnei thiangthote Lalpa Pathian chun, thil um pai ta dingte chu etsak dingin a vansawlchâk a hun sawl ahi.

⁷Ngai in, hung ziang ding ka hi tai; zia lekhabu thu genlawk gual ah umte chu a hamphau hi,” a tia.

⁸Zia thilte hi keima Johan ngei in ka mu leh ka hiatte chu ahi. Ziate hi ka mu leh ka het phat in, ei etsakpa vansawlchâk kengbul ah chun ama biak ding gua’n ka bokkhup a.

⁹Himaleh, ama’n ka kiang in, “Zia gual chun hi’ kin; keima le la suak chanpi, la suapi leh jawlneite nasemtu pakhat leh, zia lekhabu thu kigente a la zuitu pakhat ka hi. Pathian chu la biak ding ahi,” a tia.

¹⁰Ama chun ka kiang in, zia lekhabu thu kigente hi koithip ziang kin, a hun a nai tangal a.

¹¹Midik lo chu dik lo in um mai hen la; mibuak chu a buak in um mai hen; chuleh, mifel chu a fel in um hen la; mithiangtho chu a thiangtho in um ta hen.

¹²Ngai in, hung vak ziang ding ka hi tai; mi zosia a nasep dungzui chiat ua piak dingin ka kipakman ka kiang in a um tai.

¹³Kei Alpha leh Omega, a masa pen leh a nunung pen, a bul leh a tawp chu ka hi.

¹⁴Hinna thing chung ah thu a neitheina ding uh leh, khawpi kul kotkhak ah a lût theina ding un, a pua’n uh sawp thiangte chu a hamphau hi.

¹⁵A pawlam in uichate, dawithiamte, thânghuaite, tualthatte, milim hote leh juau thu dawi leh juau thugen chîngte um in au.

¹⁶Kei Jesu hin, zia thute hi kochuamte hiatsak ding ah ka vansawlchâk chu ka sawl ahi. Keima David suan leh a phung bulpi Jingsol aksi vâk chu ka hi, a tia.

¹⁷Chuleh, Thagau leh mo chun: “Hung in,” a tiu a. A he tapo chun, “Hung in,” tiu hen. Chuleh, a nuam tapo in hinna tui hi, a thawn in hung dawn uh hen.

¹⁸Zia Lekhabu ah thu kigenlawkte hekha zosia kiang in zia hi ka hun hiatsak ahi: Kua’nle zia thute hi a belap chun, zia Lekhabu ah gawtna kizikte hi, Pathian in a chung ah belap in a.

¹⁹Chuleh, kua’nle, zia thu genlawkna Lekhabu kizikte hi a lâk mang chun, zia lekhabu kizik, Hinna Lekhabu kipat leh khawpi thiangtho ah a chan ding chu Pathian in lamang in a.

²⁰Zia thilte hiatsakpa hin, “Hung vak ding ka hi tai,” a tia. Amen, hung ta’n, Lalpa Jesu!

²¹I Lalpa Jesu Khrista hepina chu mithiangthote zosia chung in um ta hen. Amen.