Read Vaiphei THUPUAN 7 Bible Online

THUPUAN 7 - Vaiphei bible

THUPUAN 7

¹Ziazaw chun, khawmual leh tuisuagiat leh thing chung ah te, hui a hân lona ding in, lei ah hui kot palite chu khak bing dingin vansawlchâk pali ding ka mu.

²Vansawlchâk dang pakhat, Pathian hing tepte’na chawi ah, nisuana na kipat hung kum ka mu; ama chun mualkâng leh tuisuagiat suksiat theina piak ah um vansawlchâk palite kiang ah chun aw ngei tak in:

³“I Pathian suakte chu a chal ua ka tepte suak masangsia, mualkâng leh tuisuagiat leh thingte him him hun susia nai tadi ki’un,” a tia.

⁴Tichun, mi a hun tepte jat chu ka la he; Israel chate, namtin a mi, nuai khat leh sîng li leh sâng li a hun tepte a.

⁵Judah nam ah mi sîng khat leh sang ni a tepte a, Reuben nam ah mi sîng khat leh sang ni a tepte a. Gad nam ah mi sîng khat leh sang ni a tepte kit a.

⁶Asher nam ah mi sîng khat leh sang ni a tepte a. Naphtali nam ah mi sîng khat leh sang ni a tepte a. Manasseh nam ah mi sîng khat leh sang ni a tepte kit a.

⁷Simeon nam ah mi sîng khat leh sang ni a tepte a. Levi nam ah mi sîng khat leh sang ni a tepte a. Issakhar nam ah mi sîng khat leh sang ni a tepte kit a.

⁸Zebulun nam ah mi sîng khat leh sang ni a tepte a. Joseph nam ah mi sîng khat leh sang ni a tepte a. Chuleh, Benjamin nam ah mi sîng khat leh sang ni a tepte kit hi.

⁹Ka et kit leh, mipi tam tak, simsên lo, gamtin ah mite, pautin ah mite puan vâm sil leh a khut ua tûmbâkte chawi in, Belamno leh lalchutpha ma ah chun a hung ding tau a.

¹⁰Ziate chun aw ngai tak in, “Hukdamna chu I Pathian uh lalchutpha kichu leh, Belamno â ahi!” ti’n a kiko ua.

¹¹Chun, vansawlchâk zosia chun, lalchutpha leh upate leh thilhing palite kîmvêl ah ding in, lalchutpha ma ah chun bokkhup in Pathian chu a ho un;

¹²zia gual hin La a sau a: “Amen! Maljawlna, lopina, pilna, choihoina leh kipak thu genna, thilhitheina leh hâtna chu, I Pathian kiang un, kumtuang kumtuang in um zing ta hen! Amen,” a tiu a.

¹³Chuleh, upate lak ah pakhat chun, ka kiang in, “Zia puan vâm silte hi kuate, khoi ah kipat hung a hiu em?” ti’n ei dong a.

¹⁴Kei chun, “He pu, nang bep inla hia’i,” ka tia. Ama’n ka kiang in, “Ziate hi gimna huaisia tak thuak zo ah hung pawt ah, a puanteu Belamno thisan ah sawp vâmte kha a hiu.

¹⁵‘Tu’hin Pathian lalchutpha ma ah um in, a tempul ah sûn leh jan ah nasem in a um tau; lalchutpha chupa chun, a puan In jak khum intin,

¹⁶gilkial kit ta pua’n tiu in, dangchâk kit diak ta pua’n au; nisa’n kâng ta pua’n tin, a satna’n le hi’genthei ta pua’n a;

¹⁷Belamno, lalchutpha lailung ah um chu, amau vêngtu hita’n tin, hinna tuikhukte ah pui intin, Pathian in a mit ua kipat, mitthi zosia thiak-hul ta’n a,” a tia.