Read Vaiphei THUPUAN 9 Bible Online

THUPUAN 9 - Vaiphei bible

THUPUAN 9

¹Vansawlchâk pangana chun a pengkul a mût leh, aksi pakhat van ah kipat lei ah ketha ka mu, ama chu leikawkhuk tawp neilo honna chabi chu piak a hia;

²ama chun, leikawkhuk tawp neilo chu a hon leh, a khûk hawm ah kipat chun meikhu, haltuina mei nasa tak khû gual in a khudok luai luai a; meikhu ziak ah chun van leh nisa chu a hung thim tai.

³Meikhu lak ah kipat chun khaubepi lei chung lam in a hung pawt ua; lei ah ainuvette thilhitheina gual piak a hiu a.

⁴A chal ua, Pathian tepte’na neilote longal chu lei ah hampate leh thai thilhingte leh thingte le bangma law lo ding ah thupiak a hiu.

⁵Chuleh, mihingte chu that lo ah tha nga sung sukgenthei ding ah thupiak a hiu ah; a hi’genthei dan uh chu ainuvet in mi a pe gual hi ahi.

⁶Zia sung ah chun mite’n thina hawl intin uh, himaleh mu pua’n au; thi nuam maleu thina chun nusia ta’n a.

⁷Zia khaubepite piandan chu sakol galdo ding ah siamtupsa gual a hiu ah; a luchung un sana lallukhuk tawhbang a khuk un, a mai uh chu mihing mai gual ahi.

⁸Numei sam tawhbang sam a nei un, a hâu chu sakeibaknei hâ gual ahi.

⁹Thîk awmphaw gual âwmphaw a nei un; a thajap git uh chu kidona sakol kângtalaite tai git gual ahi.

¹⁰Chuleh, ainuvette mei gual mei a nei un, a mei un mi suknat theina a um hi; a mi suknatnau chu tha nga sung nat theina ahi.

¹¹Lei kawkhûk tawp nei lo vansawlchâk chu lal in a nei un; Hebrai pau in a min chu Abaddon ; Grik pau in Apollion ahi.

¹²Chunggikna masa chu a kichai ta’n; chunggikna panina chun hun zui ding ahi.

¹³Chun, vansawlchâk pagukna chun a pengkul a mût leh, Pathian ma-âng ah sana mâichâm kî palite ah kipat in aw ka hia’n,

¹⁴zia chun pengkul chawi vansawlchâk pagukna kiang ah chun, “Euphrates luipi ah vansawlchâk pali kân ah umte kha thâdok in,” a hun tia.

¹⁵Mihing mun thum ah khen mun khat that ding ah, a ni, a tha, a kum a guat piak sau vansawlchâk palite chu a hun thâdok tau a.

¹⁶Zia sakol sepaite tam dan chu a simnau ka la het dan in, a sîng mun sîng ni a hiu a;

¹⁷ka la mudan ah chun, sakol leh a chung ah chuangte chu zia gual hi a hiu: A chung ah chuangte awmphawteu chu meiâm gual in a âm ah, suanghat gual ah tâk leh kât gual ah hat a hia; a sakollu teu chu sakeibaknei luchang gual a hia; a kam ua pat chun mei leh meikhu leh kât a pawt hi.

¹⁸A kam ua kipat pawt, mei leh meikhu leh kâtte chun mihing mun thum ah khen mun khat a that tai.

¹⁹A thil hi’theinau chu a kam leh a mei un a um ah, a mei uh chu gûl gual ahi’n, zia chun lu a nei ah, mi a suknatnau chu ahi.

²⁰Zia gawtna thi lo sunte chun a khut nasepteu, thithate, sana milimte, dangka milimte, sum-eng milimte, thing milimte, khua mu theilo, hethei lo leh chia theilote chu ho lo dingin a lung uh a hei diak puau a.

²¹A tualthanau leh a dawi thil matteu, a tatsualnau leh a gukchaknateu le a haisan diak puau hi.