Read Vaiphei RUTH 2 Bible Online

RUTH 2 - Vaiphei bible

RUTH 2

¹Naomi pawsal Elimelek chanau kinaipi, mi hausa challang tak khat a um ah, a min chu Boaz ahi.

²Chun, Moab numei Ruth chun Naomi kiang in, “Lou ah ei vakuan sak inla, kua hitaleh ei lungsiat thei pen pen lou ah bulêp vahawl ing ka,” a tia. Ziaphatchun, Naomi inle, “Chia in, ka chanu,” a ti tai.

³Tichun, a kuan ta ngei a. Bu-âtte nung lam ah bulêpte chu a la khawm ta’n. Elimelek chanau kinaipi, Boaz lou lam in a hung vâk lut kha tai.

⁴Zia lai tak ah chun, Beth-lehem khua kipat in Boaz a hung tung ah. A bu-âtte kiang in, “LALPA‘n hun umpi zing hen,” a hun tia. A mau inle, “LALPA‘n hun maljawl hen,” ti’n a dawnhuu a.

⁵Ziaphatchun, Boaz in bu-âtte enkol ding ah a pansak, a suakpa kiang ah chun, “Zia nungak hi kua a hem?” ti’n a dong a.

⁶Bu-âtte enkolpa chun, “Zia hi Moab numei Naomi in Moab gam ah kipat a hun pui kha ahi.

⁷A ma hin, ‘Lungsiat tak in bu âtte nung ah bulêp ei lâk khawmsak in,’ a ti’n; jingkal ah kipat tu’tiang hin a lakhawm in, chomkhat le kichawl kha nai lo ahi,” a tia.

⁸Ziaphatchun, Boaz in Ruth kiang in, “Ka chanu, bulêp hawl in lou dang ah chia kin la, zia kipat hi pawt lo in, ka bu ât nungakte kiang hin um zing in.

⁹Amau bu âtna lam en zing inla, a nung uh zui zing ziang in. Tangvalte le a hun sukbuai lo’na ding un thu ka piak ahi tai. La dang a châk leh tangvalte tui khaisa tuibêlte zuan inla, dawn ziang in,” a tia.

¹⁰Ziaphatchun, a mai ah tual si hial ah bokkhup in chibai a bûk ah, a kiang in, “Bangtidan ah, keima nam chuam mi hi lei hiti hetthiam ah, la mit mu ah doisakna chang thei ka hem?” a tia.

¹¹Boaz in a kiang in, “La pawsal a thi ah kipat la talpinu la bawl dante, la nu leh la pa nusia ah, la het khâk lo mite lak ah la hung ziang dante hi min ei hil tau hi.

¹²La nasep ga chu LALPA‘n hun dit hen la, a thalîm nuai la hun bêl Israel Pathian chun kipak man bukim hun pia ta hen,” a tia.

¹³Ziaphatchun, Ruth in, “Ka LALPA, la suakte lak ah mi hilo maleng le, la suaknu kiang ah kam dam tak ah thu la gen ziak hin lei thamuan ta ahi; la doisakna chu ei musak zing ta’n,” ti’n a dawnhu tai.

¹⁴An nêk hun in, Boaz in a kiang in, “Hung inla, vaithum hung ne’n la, grep tui thûk tawh hung me in,” a tia. Tichun, bu-âtte kiang ah chun a hung kitung ah, Boaz in an a âng in a siavûm piak hial ta’n. A nêk zaw nung inle a vâl a um nalai hi.

¹⁵Bu lakhawm ding ah a hung dindaw kit phatin, Boaz in a tangvalte kiang in, “Zia nu hi buphal lak natiangle chom khawmsak un la, zada kiu in.

¹⁶Chuleh, buphal lom lak ah pat in, ama â ding khut dim dim in nusiau inla, ama’n a hun kidawl khawm dingin; zia chu, zada kiu in,” ti’n a hil a.

¹⁷Tichun, nitâk tiang in bulêp a chom khawm ah. A chom khawm zosia chu a vawtha’n, barli bu te’na Ephah dim khat vêl a nga zo a.

¹⁸Zia chu kipuak in khawpi lam a zuan ta’n; a talpinu’n a hun lakkhawm tam dan chu a la mu ta’n. Chuleh, a sûn an nêkvâl chule a hun ladok ah, a talpinu a pia’n.

¹⁹A talpinu’n a kiang in, “Tu’ni khoi tak ah la va chomkhawm a hem? Khoi tak ah la vasep a hem? Nangma hethiampa chu maljawl in um ta hen,” a ti’n. Tichun, Ruth in a talpinu kiang ah chun na a vasepnapa chanchin chu a hil ah, a kiang in, “Tu’ni na ka vasepnapa min chu Boaz ahi,” ti a hil tai.

²⁰Ziaphatchun, Naomi’n a monu kiang in, “LALPA, mithi leh mihing chung ah ja’ngaina danglam lo pa min chu chawihoi in um ta hen!” a ti’n. Naomi ma ma chun, “Zia pa chu I chanau kinaipi pen uh ahi,” a ti’n.

²¹Chuleh, Moab numei Ruth chun, “Ama chun, Ka tangvalte’n ka bu a ât zaw masangsiau a lak un hung pang zing in, ei ti nalai hi,” a ti’n.

²²Ziaphatchun, Naomi in Ruth kiang in, “Ka chanu, lou dang ah la chia ah, midang in a hun sukbuai sâng un, a suak nungakte la zui sek chu nang â dingin a phazaw ma ma hi,” a ti’n.

²³Tichun, barli bu leh gehu bu ât zaw masia bulêp luak in Boaz suak nungakte lak ah pang in, bulêp chu a hawl sek ah; tichun, a talpinu chu tawh a chêng zing tau hi.