Read Vaiphei RUTH 4 Bible Online

RUTH 4 - Vaiphei bible

RUTH 4

¹Boaz chu khawpi kotbul in a chia to pai ziang ah, zia tak ah chun a vakichu ta’n. Chuleh, Boaz in a la gen, a gamngâk dingpa chu a hung phatin, Boaz in a kiang in, “Gualpa, zia hin hung inla, hung kichu tiam in,” a ti’n. Ama le a vachia ah, a kichu ta’n.

²Boaz in a khuau ah upate sawmkhat a ko khawm ah, a kiang un, “Zia hin hung kichu tiam un,” a tia. Amau chule a hung kichu tau hi.

³Ziaphatchun, a chanau kinaipi pen, a gamngâk dingpa kiang ah chun, “Moab gam ah kipat hung kile’kit Naomi in, I suapipau Elimelek gam bek khat a zuak in.

⁴Ke’n la nangma hun hiatsak phot chu thilpha hi ah ka het ziakin, zia gam bek khat ka mipite zia kitungte lak ah upate mit mu ah hin, kitat ding la hem ti ka hun dong chian nuam hi. La kitat ding leh tan ziang inla, la tat lo ding leh vang ei hil in ka he nuam hi; nang tilo zia gam tan ding chu mi dang a um paw’ngal in; nang bân ah tan thei ding chu keima ka hi,” a ti’n. Ama chun, “Tan ing ka,” a hun ti tai.

⁵Ziaphatchun, “Zia gam bek chu la tat phat leh mithi’pa meithâinu, Moab numei Ruth le la chawk khawm ah, mithipa min manlo’na ding ah, golua ding a um jel theina dingin,” a tia.

⁶Ziaphatchun, a gamngâk ding pa chun, “Chuti ahileh vang ke’n tan thei pua’ng ka, keima go le ka enkol zo paw’ngal in. Tattheina chu nang in chang inla, kitat mai ta’n, ke’n tan theilo ding ka hi’ngal in,” a ti tai.

⁷Nidang lai ah Israelte lak ah thiltat leh kithen tua’na chungchâng ah chawndan chu zia gual hi ahi: Mi khat in a kengtawdap a sût ah, a dang khat kiang in a piak ding ahi; zia chu Israelte lak ah namdetna dan kimang chu ahi.

⁸Tichun, a gamngâk dingpa chun Boaz kiang in, “Nangma’n kilâk in,” ti’n a kengtawdap a sût a.

⁹Ziaphatchun, Boaz in upate leh a kiang ah mipite kiang ah chun, “Tu’ni hin keima’n Elimelek nei zosia leh Khilon tawh Mahlon nei zosia chu Naomi khut ah kipat in ka chawdok tai.

¹⁰Zia lo ah chunle, mithi chu a min mang lo ah, a golua ding siam piak ding leh, mithi chu a unaute lak leh a umna mun kul kot bul ah a min a manlo’na ding in, zia Mahlon ji meithâi, Moab numei Ruth hile ka ji dingin ka chaw tai, ti tu’ni hin a hiatpite ngen la hitau hi,” a ti tai.

¹¹Ziaphatchun, kul kot bul ah mipi umte leh upa zosia chun, “Kei uh a hiatpite ka hiu; la Insung ah hung lût numei hi LALPA‘n Israel nam tung dingte ni, Rakhel leh Leah gual in siam ta hen. Nang inle Ephrath ah hin suan leh pâk nei inla, Beth-lehem ah hin min nei tak in um ta’n;

¹²chuleh, nangma In sung le LALPA‘n zia numei thaknu cha leh nau a hun hinsak tak leh, Tamar in Judah a hinpiak Perez In sung gual ah pha thei tak in umsak ta hen,” a tiu a.

¹³Tichun, Boaz in Ruth a kipui ah, a ji a hung hi tai. A hung um khawm phat un LALPA‘n nau a hun vopsak ta’n, chapa khat a hun hing tai.

¹⁴Chuleh, numeite’n Naomi kiang in, “Tu’ni tiang ah gamngâk ding nei ah hun koi LALPA chu chawihoi in um ta hen; Israelte lak in a min chu hung thang ta hen!

¹⁵Ama hi la hinna tungding leh la têk nung ah enkoltu hung hi hen la; la monu, nangma hepitu, chapa sagi sâng ah nang â dingah phachuam zaw chun, chapa a hing ta’ngal in,” a tiu a.

¹⁶Chun, Naomi in nausen chu a la’n, a âng in a pâi ah, naudon in a pang tai.

¹⁷A Invêng numeite chun, “Naomi â dingin chapa pakhat a piang tai,” a tiu ah; a min dingin Obed a sak tau a. Ama chu Jesse pa ahi’n, ama chu David pa ahi.

¹⁸Perez suante chu ziate hi a hiu ah: Perez in Hezron a hing a.

¹⁹Hezron in Ram a hing a; Ram in Amminadab a hing a;

²⁰Amminadab in Nahshon a hing a; Nahshon in Salmon a hing a;

²¹Salmon in Boaz a hing a; Boaz in Obed a hing a;

²²Obed in Jesse a hing a; Jesse in David a hing hi.