Read Vaiphei 1 SAMUEL 14 Bible Online

1 SAMUEL 14 - Vaiphei bible

1 SAMUEL 14

¹Ni khat chu Saul chapa Jonathan in a gâlvan chawipa, tangval khat kiang in zia gual hin a gen ah, “Hung inla, gâlkhat lam ah Philistin sepaite giamun lam ah vachia hi ti,” ti’n a gen a. Himaleh, zia thu chu a pa a hil puai.

²Saul chu Gibeah khawpâm lam ah, Migron kiti mun ah theibufai bul nuai in a um ah; a kiang ah sepai um chu za guk vêl a hiu a;

³a lak un Shiloh ah LALPA thiampu puanâk Ephod âk Eli chapa Phinehas chapa, Ikabod suapipa Ahitub chapa Ahijah le a um a. Mipite lak ah kuama Jonathan pawt daw lam he a um puau hi.

⁴Jonathan in Philistin sepaite giamun a zot guatna lam ah chiangkot lang tuak ah chun suangpi khikêk a um gêl ah, zia suangpi khikêk pakhat min chu Bozez ahi’n, pakhat min chu Seneh ahi.

⁵Suangpi khikêk pakhat chu mallam ah Mikmash lam nga ahi’n, khat zaw chun simlam ah Geba lam nga ahi.

⁶Jonathan in a gâlvan chawi tangval kiang ah chun, “Hung tia, zia zektanlote sepai umna lam ah sawn vachia hi ti, LALPA‘n ei hun panpi mawlo ding ahi; LALPA‘n ei panpi leh kuama’n dâl thei pua’n tin, LALPA‘n ei hukdawna ding chu a mi tam leh tawm thu ah kinga khel khel lo ding ei ve,” ti’n a gen a.

⁷A gâlvan chawipa chun a kiang in, “La ngaitua dan tak chun bawl in. Ka hun umpi zing hi; la ngaitua dan dan chu ka ngaitua dan a hi mai hi,” ti’n a dawnhu a.

⁸Ziaphatchun Jonathan in, “Aleh, tu’hin a khêl lam un chia hi tin, amau kimusak hi ti.

⁹Amau in, ‘Ka hung masiau ei la ngâk un,’ a hun ti phat ua leh, I panmun ahin ding zing hi tin, I zot lo ding ahi.

¹⁰Himaleh, amau in, ‘Ei hung zuan un,’ a hun tiu leh, LALPA‘n I khut ah ei piaksa ahi tâk ding ziakin zuan to hiti. Zia chu ei uh â ding ah tepte’na hi’ngâl ding ahi,” ti’n a gen a.

¹¹Tichun, Philistin sepaite chu a paniu in a vakimu sak tau ah; zia phat ah chun Philistinte chun, “En tiam u, Hebraite kawhawm ah a kisêlnau ah kipat in a hung pawtdok ui,” a tiu a.

¹²Sepaite chun Jonathan tawh a gâlvan chawipa chu a hun ko un, “Ka kiang un hungto tiam un, bang a hem khat hun etsak ing kau,” ti’n a gâl ko tau a. Jonathan in a gâlvan chawipa kiang in, “Hung inla ei zui in; LALPA‘n amau chu Israelte khut in ei pia ta ahi,” a tia.

¹³Tichun, Jonathan chu a khut leh a keng mang ah kal to in, a gâlvan chawipa chun a nung a zui pek ah. Philistinte chu Jonathan in a sawn pâi malam pek ah, a nung ah a gâlvan chawipa chun a that malam pek tai.

¹⁴Jonathan tawh a gâlvan chawipa chun hun khat thu’n, changkuang khat sung tia bep ah hin mi sawmni hial a that pai ziang tau a.

¹⁵Sepaite giamun, loulai leh sepai zosia lak ah chun patauna a hung um ta’n; sepai honte leh gâlgûk bawl pawlte nasan lau in a kithing ziang tau a; lîn nasa tak in a kilîng ah; patauna huaisia tak a hung um tai.

¹⁶Benjamin gam ah Gibeah ah kipat entha ding ah Saul in a koite chun, mipi kinawktua lumlette chu a vak gâl mu tau a.

¹⁷Saul in a kiang ah sepai umte kiang ah chun, min vak lam tiam un, kua a hem I lak ua um lo, a tia. Min a lam phat un, Jonathan tawh a gâlvan chawipa a la um ta puau.

¹⁸Saul in Ahijah kiang in, Pathian thuthung thingkuang kha hun la tiam un, a tia. Zia hun ah chun Pathian thuthung thingkuang chun Israelte kitonpi zing ahi.

¹⁹Saul in thiampute kiang ah thu a gen zing lai ah chun, Philistin sepaite giamun lam ah husa chu a khawk deu deu ah; ziaphat ah chun Saul in thiampu kiang in, a la khawngai mai tiam in, a tia.

²⁰Tichun, Saul tawh a kiang ah sepai um zosia chu chia kawm in kido’na pang dingin a kuan tau ah; a lak ua buaina huaisia tak a tun tâk ziak in, amau leh amau a chemjam un a kisattua sau sau ziang tau hi.

²¹Philistinte lak ah Hebrai mi a la umsa, gâldo ding ah hung kuante chu, Israelte lam ah hung lêpan in, Saul tawh Jonathan leh a lawiteu lam in a hung pang tau a.

²²Zia gual ma chun, Ephraim tânggam ah a la kisêlmangte khanle, Philistinte a jamsia tau hi ti a het phat un, kido’na chun theitawp sua in a hung pang tau ahi.

²³Tichun, zia ni chun Israelte kiang in zaw’na LALPA‘n a pia tai. Beth-aven khêl lam tiang in gâl a sat tau ah; chuleh, Saul lam ah pang sepaite chule sîng khat lam a hung ting tau hi. Kido’na thawmgi chu Ephraim tânggam tiang in a kithang tai.

²⁴Zia ni chun Saul in thil khawk tak khat a la bawl kha molmaw ta’n. A sepaite kiang in kitiamna a la bawl ah, “Ka mêlmate chung ah phuba ka lâk zaw masang sia, tu’ni nitâk lam masia an ne taphot chu hânsia dong in um hen,” a la tia. Ziaziakchun, sepaite lak ah khat inle an ane ngam ta puau a.

²⁵Sepaite chu khuaiphâng lak a hung tung un, leitual ah chun khuaizu a um gei gui ta mai a.

²⁶Sepaite chu khuaiphâng lak a hung tun un, khuaizu a vatha zut zut ziang a muu ah; himaleh, kitiamna thu a lau ziak un, a liak ngam ziang le a um puau a.

²⁷Himaleh, Jonathan in sepaite kiang ah a pa thupiak lam chu a la he’kha pua’n; tichun, a mol choi chun khuaiphâng a dawt ah, a mong langkhat chu a khutdaw in a kam tawh a situa ah; tichun, a mit a hung hat deu tai.

²⁸Ziaphatchun, sepaite lak ah pakhat in a kiang in, “La pa’n sepaite hi thupiak khau tak a la pia’n, ‘Tu’ni an ne pen pen chu hânsia dong in um hen,’ a ti ahi. Ziaziakchun, sepaite hi sawlsam zo a hitau hilam,” a tia.

²⁹Jonathan in, “Ka pa hin gam a subuai ngei; en tau chu khuaizu neucha ka vak nêk leh ka mit hâ nuam deu mai ei ve.

³⁰Mêlmate thil I lâkpiak uh haw hi sepaite’n a nop a ning un tu’ni hin ne zaw maileu chu bang gual bep in a phazaw ta diam; tu’hin lah Philistinte I that tam nai puau in,” a ti tai.

³¹Zia ni chun Philistinte chu Mikmash ah kipat Aijalon tiang in a that gam tau ah; ahi’n, sepaite chu a sawlsam zo tau a;

³²tichun, sepaite chun gâlte van haw chu a baw in a baw thaw ziang tau ah; belamte, bawngchalte leh bawngnote chu kilâk in, tual lai ah that in, a thisan tawh a ne’ khawm ziang tau a.

³³Ziaphatchun, Saul kiang in, “En tia, sepaite’n a thisan pum ah sa a nêk ziang tâk ziak un, LALPA chung in thil a sukhial tau hi,” a vatiu a. Ama chun, “La bawlkhial na lawm lawm uh e! Zia tak ah hin ka âng ah suang lian tak khat hun lîk phei tiam un,” a tia.

³⁴Saul in a kiang un, “Sepaite lak ah tai vêl unla, a kiang un, ‘La bawngchalteu leh la belamteu hun kaikhawm unla, that un; chuleh, ne tau in; a thisan ne’ khawm in LALPA chung ah thil sual bawl kiu in,’ vatiu in,” ti’n a sawl a. Tichun, sepai zosia’n zia jan ma ma chun a bawngchalteu hun kai in, zia tak ah chun a that tau a.

³⁵Chuleh, Saul in LALPA â dingin mâichâm pakhat a siam ah, zia chu LALPA â ding ah a mâichâm bawl masakna penle ahi.

³⁶Ziaphatchun, Saul in a sepaite kiang in, “Jan thim nuai ah hin Philistinte vado hitiu in, khawvak masia that hitiu; pakhatle hawi puai tiu,” a tia. Amau inle, “Pha ding ah la ti dan dan chun bawl hitiu,” ti’n a dawnhuu a. Himaleh, thiampu chun, “Zia mun hin Pathian nai phot tiam hitiu,” a hun tia.

³⁷Tichun, Saul in Pathian a dong ah, “Philistinte hi ka vadel zui nalai diam? Amau hi Israelte khut in la pia diam?” ti in. Himaleh, zia ni chun a hun dawnhu puai.

³⁸Saul in, “Mipite lak ah upate haw hung khawm tiam un; tu’ni hin zia gual ah gitlona hi bang gual ah hung kipan a hem ti hawldok hitiu.

³⁹Israelte a la hukdok sekpa, LALPA min ah kitiam in ka gen ahi, ka chapa Jonathan hiziang leh le a thi ding ahi!” a tia. Himaleh, kuama a dawnhu a um puau a.

⁴⁰Israelte zosia kiang ah chun, “Zia lam ah sawn vaum unla, ka chapa Jonathan tawh kei bep zia lam ah hin um ing kau,” a tia. Mipite chunle Saul kiang in, “Pha la ti dan dan in bawl in,” ti’n a dawnhu tau a.

⁴¹Ziaphatchun, Saul in, “Aw LALPA Israelte Pathian, tu’ni hin bangatia, la suak hi dawnhu lo la hi em? Zia thu ah a maw chu kei ka hi em, ka chapa Jonathan ahi em; aw LALPA Israelte Pathian, Urim ei hun pia’n la; ahi’n la, mipite maw ahileh vang Thumim ei hun pia’n,” ti’n a don a. Ziaphatchun, Jonathan tawh Saul chu mat daw in a um tau ah; mipite chu a suakcha tau hi.

⁴²Ziaphatchun, Saul in, “Kei tawh ka chapa Jonathan hi a kua zaw ka hiu em âisân hitiu,” a tia. Tichun, Jonathan chu matdaw a hung hi tai.

⁴³Ziaphatchun, Saul in Jonathan kiang in, “Bang a la bawl la hi em ti ei hil in,” a tia. Jonathan in, “Zia ka tiangkhut mûk ah khuaizu neucha ka la tep ahi; zia hin ka um hi, thi tâk ka hi,” ti’n a hun dawnhu a.

⁴⁴Saul in, “Jonathan, la thi tei tei ding ahi; Pathian in a nop leh a khawk zaw’nle ka chung ah hun bawl mai hen,” a ti ta’n.

⁴⁵Ziaphatchun, mipite chun Saul kiang in, “Zia gual khop ah Israelte hukdawna ding bawldokpa Jonathan chu maw la thalup ding? Thi maijen pua’n ah! LALPA hinna sâl in ka gen ui; tu’ni hin ama Pathian in a kithuapi ziakin a samzang khat ziang le lei tual ah ketha pua’n ah,” ti’n a dawnhu tau a. Tichun, mipite chun Jonathan a hukdok tau ah, thalup a hita puai.

⁴⁶Ziaphatchun, Saul in Philistinte chu a del zui ta pua’n; chuleh, Philistinte chule a gam lam un a chia kit tau hi.

⁴⁷Saul in Israelte chung ah leng hi’na a chan phat ah chun, a lang a lang ah a mêlmateu a do ta’n; ziate chu: Moab, Ammon, Edom, Zobah lengpa leh Philistinte a hiu ah; a kiheina lam lam in a zo pek a.

⁴⁸Hangsan tak in a do ah; tichun, Amalekte le a zo ah; Israelte chu amau suamte khut ah kipat in a hukdok tai.

⁴⁹Saul chapate chu: Jonathan, Ishvi tawh Malkhishua a hiu ah; a chanu panite min chu: a chanu upa zaw chu Merab ahi’n, a naupang zaw chu Mikhal ahi.

⁵⁰Saul ji chu Ahimaaz chanu Ahinoam ahi. Chuleh, a sepai hotu lianpen chu Saul paneu Ner chapa Abner ahi.

⁵¹Kish chu Saul pa ahi’n; Abner pa Ner chu Abiel chapa ahi.

⁵²Saul damsung in Philistinte tawh kidona nasa tak tak a um ah; Saul chun mi hat leh mi hangsan a mu taphot chu a sepkhawmpi ding in a la lut jel hi.