Read Vaiphei 1 SAMUEL 17 Bible Online

1 SAMUEL 17 - Vaiphei bible

1 SAMUEL 17

¹Chun, Philistin sepaite chu gâl do dingin a kikokhawm tau ah; Judai gam ah Sokoh mun in a chia khawm ua; chuleh, Sokoh tawh Azekah kikâl ah Ephes-dammim mun ah chun a kikul tau a.

²Saul leh Israelte kikhawm in, Philistinte do ding ah Elah phâijang in, panmun a siam tau hi.

³A kikâl un phâijawl a um ah; a gâl tâng ah Philistinte a pang un, a gâl langkhat lam in Israelte a pang ui.

⁴Chuleh, Philistinte giamun ah kipat in Gath khua mi pakhat, a min Goliath a hung pawt ah; ama chu tong guk leh khâp khat ah sâng a hin;

⁵sum-engthik lukhuk a khuk ah; chuleh, thik puanâk chual in a kithuam ah; a thik puanâk chual chu shekel sawmnga gik ahi.

⁶Sum-eng ah kisiam ngaltuamnale a but ah; sum-eng thalpi pakhat a liang in a bât hi.

⁷A cheicha lung chu tângkhang tia ah lian leh a cheicha ngul chu shekel za guk ah gik ahi. Chuleh, a phaw chawipa chu a ma-âng in a pansak a.

⁸A ding ah, Israelte hetphâk dingin, “Bangatia, gâl do ding ah hung kuan la hiu em? Kei hi Philistin mi ka hi’n, nanghaw Saul suakte hilo la hiu em? La lak ua mi pakhat kei tawh kilang ding hung kitêl un la, ka kiang ah hung suk hen.

⁹Ei zo ah ei tha zaw chun, keihaw la suak un pang ziang ing ka tiu in; ahi’n, ke’n ama chu ka zaw ah, ka thalup zaw chun, nanghaw chu ka suak un um in la tiu in, ka nau la sep mai diu ahi,” ti’n a hun cho a.

¹⁰Chuleh, Philistin mipa chun, “Tu’ni hin Israel sepaite chu ka cho hi! Pawsal pakhat ka kisualpi ding ei hun piau in,” ti’n a gen a.

¹¹Saul tawh Israelte zosia’n Philistin mipa thugen chu a het phat un, a lungdong un, a lau ma ma ziang tau a.

¹²David chu Ephrath ah Beth-lehem khua, Judai gam ah mi Jesse chapa ahi’n. Jesse chun chapa pagiat a nei ah. Saul hun lai ah chun Jesse chu teksia leh thachau lam ahi tai.

¹³Jesse chapa a upa lam pathumte chun Saul nungzui in gâl a do un; a chapa pathum, gâl mun ah kuante min chu: A upa pen Eliab, a bân ah Abinadab leh a pathumna chu Shammah a hiu a.

¹⁴David chu a naupang pen ahi’n; a upa pen pathumte chun Saul nung a zui ui.

¹⁵David chu a kâllak lak ah Saul kiang lam ah chia sek, a kâl leh Beth-lehem lam ah a pa belamte ching ah pang sek ahi.

¹⁶Ni sawmli sung jing leh nitâk in Philistin mipa chu a dinna mun ngai in a hung ding jel sek a.

¹⁷Jesse in a chapa David kiang in, “Zia changpêl kikang min hi Ephah dim khat tawh, vaithum pei sawm hi la u te â dingin pua’n la, a giamun lam un vachia tiam in.

¹⁸Chuleh, zia bawngnawi khal hile sawm khat, sepai sangkhatte chung ah hotupa â dingin puak piak in. La u te chu bang a ti jel nau em le hun kantha’n la, amau ah kipat bang thu a hem khatle hun pawsawn in,” ti’n a sawl a.

¹⁹Zia lai tak ah chun, Saul leh a u te chu, Elah phâijang ah Philistinte do ding ah Israelte zosia tawh a la pang a hiu a.

²⁰David chu jingkal ma tak ah tho in, a belamchinte chu mi pakhat kiang ah pedok in, nêktheite chu pua’n, a pa Jesse thupiak dungzui in a chia tai. Gal do ding ah a kiko veng vung lai tak un, a giamun uh a tung a.

²¹Israelte tawh Philistinte chu sepai pakhat leh pakhat kinawtua dingin a la kitiang tau a.

²²David in a nêkthei puakte chu van enkolpa khut ah nusia in, a u te chibai bûk dingin gâlmun lam ah chun a chia ta’n.

²³A u te tawh a kiho zing lai un, Philistin mi lian, Gath khua mi, a min Goliath chu Philistin sepaite lak ah kipat hung pawtdok in, a thugen ngai ma kha a hung gen kit a. Zia chu David inle a he tai.

²⁴Israelte zosia’n zia mipa chu a mu phât un, lau ma ma in a jamsia tau a.

²⁵Israelte chun, “Zia mipa hung pawt saw la mu em? Israelte cho ding ah hung pawt sek ahi. Ama that thei taphot chu, lengpa Saul In ah hausatna nasa tak tawh, a chanu le pia’n tin, Israelte lak ah a Inkuan un zalenna pia ding ahi,” a tiu a.

²⁶David in a kiang ah dingpa kiang ah chun, “Aleh, zia Philistin mipa, Israelte simmawpa hi that thei mi kiang ah chun, bang bawl piak ahi diam? Zia Pathian hing sepaite chopa hi khoilam zektanlo Philistin mi a hia hem?” ti’n a dong a.

²⁷Mite chunle, “Zia ka gen tâksa gual ua kha bawl piak hiding a hi,” a tiu a.

²⁸Mite tawh a kiho git uh a u Eliab in a het phat in, David chung in Eliab chu a lungna ma ma a. A kiang in, “Bang ding ah hung suk la hem? Gamthip ah kua etkol ding ah belam tawmcha kha la hun nutsia a hem? La vâkchatvai dan leh la lungthim phat lo dan ka he tai; kidona en nuam mai mai ah hung suk la hi’ hi,” ti’n a vau a.

²⁹David in, “Bang ka bawl ah a hem? Thil um dan ka dot mai mai ahi chulam,” ti’n a dawnhu a.

³⁰Ama chu kihei mangsan in, mi dangte lam nga’n a gen ngai ma chu a gen kit ah; mipite chunle a la gen gual tho uh khan a dawnhu kit tau a.

³¹David thugente chu a het phat un, Saul kiang in a vagen tau a; tichun, David chu a ko ta’n.

³²David in Saul kiang ah chun, “Zia mipa ziak hin kuama lungkham kiu in; la suakpa hi chia ing ka tin, zia Philistin mipa hi vado ding ka hi,” ti’n a gen a.

³³Saul in David kiang ah chun, “Zia Philistin mipa do ding ah hin chia thei pua’n la; nang hi la naupang nalai in, ama hi a naupan lai ah kipat gâl do mi a la hi ta’ngâl a,” ti’n a dawnhu a.

³⁴Himaleh, David in Saul kiang ah chun, “La suakpa hin a pa belamte a chin piak sek ah; sakeibaknei a hem, savom a hem khat in gan hon lak ah belam no khat a hem a hun mat phat leh,

³⁵ka delzui ah, ka khênpâi ah, a kam ah kipat belam no chu lâkpiak sek ka hi; kei ei hun pe’guat leh a khagu’n ka man ah, ka supai ah that mai ka hi.

³⁶La suakpa hin sakeibaknei leh savom bang jat a hem that ta ka hi; zia zektanlo Philistin mipa hile, Pathian hing sepaite a cho dan tak hi, ziate gual ah chun bawl ding ka hi,” ti’n a dawnhu a.

³⁷Chuleh, David in, “Sakeibaknei leh savom khut ah kipat ei la hukdokpa LALPA chun, zia Philistin mipa khut ah kipat hinle ei hukdok ding ahi,” a ti nalai a. Tichun, Saul in David kiang in, “Chia in, LALPA‘n hun umpi zing ta hen!” a ti tai.

³⁸Saul in a gâlthuamte chun David a thuam ah; thik lukhuk a khuksak ah, thik puanâk chual a âksak tai.

³⁹David in Saul gâlthuam ah a kivan zaw phatin a chemjam chu a kua ah, zia gual ah chu a la kithuam kha lo ahi ziakin a chia zo ta puai. Ziaphatchun, David in Saul kiang ah chun, “Zia haw hi ka mat ngai lo ziakin, ka kithua thei puai,” a tia. Tichun, David in a sûttha sik sek tai.

⁴⁰Ziaphatchun, a tiangkhut kichawi in, luidung ah suangchang panga a luak malam ah, a belamchinna sakhau ah khum in, vaisuangse chawi in Philistin mipa chu a zuan tai.

⁴¹Philistin mipa chunle a hun zuan ah, David a hun nai ma ma ta’n; a phaw chawipa chu a ma-âng in a hung a.

⁴²Philistin mipa chun David a en ah, khangdawng nalai, mawl bil bel leh mêlpha tak ahi ti a mu phât in a simmaw ma ma ziang a.

⁴³Philistin mipa chun David kiang in, “Uicha ka hia hem tiangkhut mai mai tawh la hung a?” a la tia. Tichun, Philistin mipa chun a pathiante min in David chu hânsia a lawkhum tai.

⁴⁴Philistin mipa chun David kiang in, “Hung in, la phete chu chunglêng vachate leh gamsate pia ding ka hi,” a tia.

⁴⁵Himaleh, David in Philistin mipa kiang ah chun, “Kei ei do ding in nang in chemjam, cheipi tawh phaw chawi in la hung kuan ah; keima ka hileh vang, la hosiat, sepai honte LALPA, Israelte sepai honte Pathian min ah hung kuan ka hi.

⁴⁶Tu’ni ma ma hin, LALPA‘n nang chu ka khut ah ei pedok intin, hun khen pâi ing ka tin, la luchang la ding ka hi; chuleh, tu’ni ma ma ah hin, Philistin sepaite luang chu chunglêng vachate leh lei chung ah gamsate kiang ah pia ding ka hi; tichun, lei chung ah mi zosia’n, Israelte lak ah Pathian a um hi, ti hun he ta’n au;

⁴⁷chuleh, zia tak ah um khawm zosia hin, LALPA‘n chemjam leh cheipi in mi a hukdok puai, ti he ta’n au; chuleh, kidona chu LALPA â a hiziak in, ka khut un nang chu ei pia ding ahi,” a ti tai.

⁴⁸Philistin mipa chu David do ding ah a hung phatin, David chu gâlmun lam ah Philistin mipa do dingin kin tak in a tai a.

⁴⁹David in a sakhau a sawk ah, suangchang pakhat a ladok ah, a vaisuangse ah a vak se leh, Philistin mipa chalki a sepkha’n; suangchang chu a chalki’n a lut ah, a khup lam in tual a baw tai.

⁵⁰Tichun, David in vaisuangse ah suangchang pakhat bep mang in, Philistin mipa chu zo in, a that tai; David in chemjam a chawi puai.

⁵¹Ziaphatchun, David a tai ah Philistin mipa chung in a ding ta’n; a chemjam chu jukdok in, a that ta’n; a gawl a tan piak tai. Philistinte’n a mihat uh a thi tai ti, a mu phât un a jamsia tau a.

⁵²Israel leh Judah sepaite chu kiko kawm in, Gath khua leh Ekron kotpi tiang in Philistinte chu a delzui tau ah; tichun, Shaaraim ah kipat Gath leh Ekron khua tiang in Philistin liamte chu a kizam tek tuk ziang tau a.

⁵³Philistinte delzui Israelte a hung kit phat un, a giamun uh a va buluu a.

⁵⁴David in Philistin mipa luchang chu a hun la’, Jerusalem a hun tut ah; a gâlvante chu vang a puanbûk in a kikoiden tai.

⁵⁵Philistin mipa do ding ah David a kuandaw lai chu Saul in a la mu in, sepai zosia chung ah hotupa Abner kiang ah chun, “Abner, zia tangval hi kua chapa ahi em?” ti’n a dong a. Abner in, “Aw lengpa, la hinna sâl in ka gen ahi, ka he him him puai,” ti’n a dawnhu a.

⁵⁶Lengpa chun, “Zia tangval ting nai lo hi kua chapa ahi vakan chian in,” a tia.

⁵⁷Philistin mipa that zo ah David a hung kit phatin, Abner in David chu Philistin mipa luchang chawi kawm in Saul kiang in a hun pui a.

⁵⁸Saul in a kiang ah chun, “Tangval, kua chapa la hi em?” ti’n a dong a. David in, “La suakpa, Beth-lehem mi Jesse chapa ka hi,” ti’n a dawnhu tai.