Read Vaiphei 1 SAMUEL 6 Bible Online

1 SAMUEL 6 - Vaiphei bible

1 SAMUEL 6

¹LALPA thuthung thingkuang chu Philistinte gamah tha sagi sung a um a.

²Ziaphatchun, Philistinte chun a thiamputeu tawh a dawi thiamteu chu a ko ua, a kiang un, “Zia LALPA thuthung thingkuang hi bang I law ta diam uh? A umna lam ah thak kit ding hileu hin bang tawh I thakkhawm diam uh?” ti’n a dong tau a.

³Amau chun, “Israelte Pathian thuthung thingkuang hi thak mang ding la tiu ahileh, ama ngawn in thakdok kiu inla, gitlo thoina ding thillat tawh la thot khawm tei tei diu ahi. Chutileh, ngaidam leh tatdaw hita’n lau; tichun, la chung un a khut chu tha talo mai ding a paw em?” a tiu a.

⁴Mipite chun, “Aleh, gitlo thoina ding ah ka thakkhawm ding un bang pia ding ka hiu em?” ti’n a dong ua. Amau chun, “Philistinte lak ah hausa panga jat tawh kituak in, zia vunnatna lim hi panga tawh, santhîm lim panga ma ma, sana-ah bawl in thotkhawm un; zia hivei chu la lalteu leh mipi vantangte chung inle a tung chiat ngâl a.

⁵Tichun, gam subuai, vunnatna lim leh santhîm lim hi sana in bawl unla; chuleh, Israelte Pathian chu choihoina piau in; chutileh, la chung uh leh la pathianteu leh la gam chung ua a khut thâk hi a lakdaw thei khâk leh.

⁶Bang ding ah Pharaoh leh Aiguptate gual ah kilochalsak la hiu em? Pathian in tawtbawlna a mat zaw nung ah, Israel mipite thâdaw sak in, a pawtsak tho tho hilo maw?

⁷Tu’hin, bawng kângtalai thak pakhat siam unla, bawngpi a no nawichep lai, ngawngkol pua pangkha nailo pani zia kângtalai chu puaksak unla; ahi’n, a noteu chu In lam in hun kai mang un la.

⁸LALPA thuthung thingkuang chu zia kângtalai chung ah chun koi unla; chuleh, gitlo thoina ding ah a kiang ah la piak ding uh sana milim la siamteu kha thuthung thingkuang ah khum in, LALPA thuthung thingkuang pang ah chun koi un la. Ziazaw chuleh, kai mang sak leu chin a mun lam zuanah chia mai ding ahi.

⁹Chuleh, en zui un; Beth-shemesh lam a zot chun a gam lam uh zuan hi ding a hiu; ziaphat chuleh, zia gual ah natna hun tut hi ama ziak ahi ti kichian ta’nah; achutiloleh vang, ei gawt hi ama khut hilo ahi ti hetthei hin tin, a tung ding mawng ahi ti kihechian ta’nah,” ti in.

¹⁰Mite chun zia gual chun a bawl tau a; bawngpi no nei pani chu kângtalai puaksak in, a noteu chu In ah a kulkhup tau a.

¹¹LALPA thuthung thingkuang tawh, santhîm leh vunnatna lim sana kisiamte a koinau thingkuang chu kângtalai a puaksak tau a.

¹²Bawngpite ni chu ham kawm kawm in, Beth-shemesh lam zuan in zang tak in a chia tau a; vei leh chang ah pêtlo in a chia pek un, Philistin hausate chun a gamgiu Beth-shemesh chan a vazui tau hi.

¹³Zia lai takah chun, Beth-shemesh khua mite chun phâijangah gehu bu a la ât lai tak uh a hia. A dakdawu leh thuthung thingkuang a vak gâl mu tauah a lamtua dingin kipak tak in a chia tau hi.

¹⁴Kângtalai chu Beth-shemesh khua mi khat, Joshua loulai a tun in a kichawl tai. Suangpi lian tak khat zia tak ah chun a umah; kângtalai thingte chu eknêl in, bawngpite ni chu hâlmang thillat in a mang tau a.

¹⁵Levi thiampute chun LALPA thuthung thingkuang tawh a kiang ah sana milim koina thuthung thingkuangte chu a hung lau ah, suangpi chung ah chun a koi un. Ziaphatchun, Beth-shemesh khua mite chun, LALPA kiang ah kithoina zia ni ma ma chun a bawl ua.

¹⁶Philistin hausa pangate chun zia chu a mu phât un, zia ni ma ma chun Ekron lam in a kile’kit tau a.

¹⁷LALPA kiang ah gitlo thoina ding ah lat ding Philistinte’n vunnatna lim sana a siamteu chu: Ashdod â ding ah pakhat, Gaza â dingah pakhat, Ashkelon â dingah pakhat, Gath â ding ah pakhat leh Ekron â dingah pakhat;

¹⁸chuleh, santhîm limah sana’ a siam uh pangate chu, Philistinte hausa pangate tawh kituakah siam in, a khawpiu kulpi nei leh thingtâng khawneute min ah bawl a hiu a; Beth-shemesh ah Joshua lou mun ah LALPA thuthung thingkuang a ngaknau mun ah suangpi chu, tu’ni tiang hin hiatpitu ah pang ahi tai.

¹⁹Beth-shemesh khua mite chun LALPA thuthung thingkuang lamtua ding ah lim takah a um lai un, Jekoniah chate chu vang a kipak him him puauah; a lak ua mi sawmsagi a thatlum ta’n. LALPA‘n mipite lakah tam tak a thalup ziakin mipite chun a sûn tau a.

²⁰Ziaphatchun, Beth-shemesh khua mite chun, “Zia Pathian thiangtho, LALPA âng ah hin kua a hem ding thei ding? ei nutsia theina dingin kua kiang ah sawlmang ta ding I hiu em?” a tiu a.

²¹Tichun, Kiriath-jearim lam in thangko a sawl un, “Philistinte’n LALPA thuthung thingkuang a hung thak kit tau hi. Hung suk unla, hung kilâk un,” ti’n a vagen tau hi.