Read Vaiphei 1 SAMUEL 8 Bible Online

1 SAMUEL 8 - Vaiphei bible

1 SAMUEL 8

¹Samuel a hung têk phatin, a cha pawsalte chu Israelte chung ah vaihawm dingin a guat a.

²A chapa upa pen chu Joel ahi’n, a pani’na chu Abijah ahi; amau hin Beer-sheba ah vai a hawm ui.

³Himaleh, a chate hin ama umchan zui lo in, amau lawkna ding bep a ngaituau ah; golgûkna a lau ah, diklo tak in vai a hawm tau hi.

⁴Ziaphatchun, Israel upate zosia a kikhawm un, Samuel kiang ah Ramah khua’n a hung tau a;

⁵a kiang in, “Nang la têk ta’n, la chate’n la umchan a zui puau in; namdangte gual ah ka chung ua vaihawm ding leng pakhat ei guat piak in,” a hung tiu a.

⁶Himaleh, “Ka chung ua vaihawm ding leng ei pia’n,” a ti ziak un Samuel chu a lungawi ta pua. Samuel chu LALPA kiang in a pauchap a;

⁷LALPA‘n zia gual hin Samuel kiang in a hun gen ah, “La kiang ah mipite gen zosia chu ngaitua piak mai in; nang hun doilo ahi puau in, a chung ua lal ka hi’na ei doilo ahi zawu hi.

⁸Aigupta gam ah ka puidaw lai ah kipat, tu’ni tiang hin ei kilepsan in, pathian dangte na ei sep san uh hi, nang chung ah le bawl a hiu.

⁹Tu’hin vang a thugen uh ngaitha’n la, a chung un leng hung um leh bang gual hung hi ding a hiu em ti vang la hilchian piak ding ahi,” ti’n a hun gen tai.

¹⁰Tichun, Samuel in a kiang ah leng don ah hung mipite kiang ah chun, LALPA thugen zosia chu a hilsawn tai.

¹¹A kiang un, “Leng khat in la chung ua vai a hun hawm phat leh, zia gual hi hung hi ding ahi: La chapateu kilâk intin, a kângtalai leh a sakolchungchuang sepai dingin hun mat piak in tin; chuleh, a sakol kângtalai âng ah tai masa dingte’n mang in tin;

¹²a khenkhatte chu sepai sang khat chung ah hotu dingte, sawmnga chung ah hotu ding bang in mang intin; a lak ua khenkhat chu a lou bawl ding, a bu-ât ding, a gâlvan bawl ding leh a sakol kângtalai siam ding bang in hun gawi ding ahi.

¹³La chanuteu le gimtui siam ah pang dingte, an huan ding leh vaithum siam dingin mang ta’n a.

¹⁴La louteu, la grep huanteu leh la oliv huanteu lak ah a pha deu deute chu hun lâkpiak intin, ama nasêmte pia ding ahi.

¹⁵La buteu leh la grep gateu a sawm ah khat kilâk intin, a nuai ah hotute leh ama nasêmte pia ding ahi.

¹⁶La suak pawsal leh numeite leh la bawng hon leh sabiltung lak ua a pha deu deute chu hun lâkpiak intin, ama nasêm in mang ta’n a.

¹⁷La gancha honteu lak ah a sawm ah khat kilâk intin, nanghaw le a suakte hung hita’n lau.

¹⁸Ziaphat chuleh, nangmau in la kitêl uh la lengpau ziakin hung kap ta’n la tiu in; himaleh, LALPA‘n hun dawnhu ta pua’n ah,” ti’n a gen hi.

¹⁹Himaleh, mipite chun Samuel thugen chu a ngaisak puau ah, a kiang in, “Hilo e! ka chung ua leng ding ka nei ding uh ahi;

²⁰namdangte gual hung hi’ng ka tiu in, ka lengpau chun ka chung un vaihawm intin, ei malat piak in, gâl ei dopi ding ahi,” a tiu a.

²¹Mipite thugen zosia a het zaw phatin, LALPA kiang in a tutsawn kit a.

²²Samuel kiang ah LALPA‘n, “A thugen uh chu ngaithâk piak inla, a chung ua leng ding chule koi piak in,” a hun tia. Samuel inle Israel mipite kiang ah chun, “La In lam chiat un chia kit tau in,” ti’n a sawl tai.