Read Varisi Matiu 10 Bible Online

Matiu 10 - Varisi bible

Matiu 10

¹Gonae Jesu i koru qira manoga karua disipoloro ia tarina lamae de ikoego. Mana i tekene qira karaputa go tarina kakale qira manuru sakata ro, mana va velaka qira basoero i pala qira go soso mokoso ro mana ria i pela go tokama qira go.

²Iato dena vitoṉo qira, manoga karua disipoloro ne, ke kenaqa, Saimon iri vitoṉo ze Pita, mana kaena ia Aduru, Jemisi mana Jon, karua sale ia Zebedi.

³Pilipi mana Batolomeu, Tomasi mana Matiu valeke palapala takisi ne, Jemisi sale ia Alepiasi, mana Tadio,

⁴Saimon ia i tavisi ne qira ria iri soko go kakale na qavuna na Rom, mana Jiudas Iskariot, valeke i vabesa ne Jesu go.

⁵Ria manoga karua dena, Jesu i turine qira mana i tekene qira sekoro dena, “Muniki zae komala ba kena ria vano iriki Jiu go kaega, ba komala ria vano Samaria go.

⁶Do muna zae de iri koego basoero na Izirel iri gere go sipi ni rore go.

⁷Mana ṉalu qamu za go, muna tarama ne, Too ikoego vari miasoka ia Batu ne i lama garogaro to.

⁸Muna vatavoisi qira vano iri mokoso go, vatoo ule qira vano iri le go, va velaka qira basoero i pala qira go mokoso voremake mana kale vakuziki ne qira manuru sakata ro i siqana qira go basoero ne go. Karaputa ro dena, era qa teke volomo ne qamu so, iago muna tavisi ne qira basoero, muniki pene qirae voli go.

⁹Muniki pala zaza ne kesa ro ramu,

¹⁰kurama ba makebotu, mana moki sisikolu go, do muna pala so kameka roku ṉalu qamu zaza go, tanego basoe zazu ne, i tora basoero nae tarina tavisi ne mana miasoka iago.

¹¹Ṉalu qamu za dokae kaki komala za taqia kaki basoe go i mazala miasoka velaka qamu, go tamuna za mia go. Muna zakoe de i koe go ia, go tina doka ṉalu tamuna kasi ne komala igogo ne.

¹²Ṉalu qamu keba za pade igogo ne, muna seko velaka qira basoero iri koego pade nae.

¹³Ṉalu basoero iri koego pade nae iri seko velaka qamu, kula ramu mara koe pade nae. Do ṉalu iriki seko velaka qamu kaega, muna pala vaule seko velaka ro qamu nanao qirae go.

¹⁴Do ṉalu kaki pade ba komala ki va gado velaka qamu go kaega ba iriki gata kaega pataro qamu sine muna kasi ne pade ba komala nae, ṉalu qamu zaza, tavore loduna na makeqamu.

¹⁵Masine ne qamu pata ogoto, ṉalu na musaqara varitanae ia God, kimata tarina pala go basoero na komala nae tina sivala ne kimata ria vano na komala Sodom mana Qomora.”

¹⁶Gonae Jesu i sine ne qira, “Muna gata, era qa turi vazao qamue ramu de iri koego basoero iri gere go sika piru ro, iago muna vazazua tarove ramu, mana muna ko padapada loborona ko ramu go.

¹⁷Muna miasoka qira basoero ne, ria tarina pala qamu mana vazao qamue varitanae ne, mana tarina za sima qamue loborona pade lotu ria go,

¹⁸tanego i sauqu era, tarina raqasa vazao qamue de iri koego qavuna ro mana batubatu ro ria go. Do pasi nae ramu muna sine ne qira Tarama Velaka ne, de iri koego vano iriki Jiu go kaega mana batubatu ro ria go.

¹⁹Ṉalu tarina pala vazao qamue go varitanae ne, muniki nanao vokara ne avana tamuna sine go, ba kade tamuna vane go sine na go. Tanego ṉalu nae God tinara vatarove qamue pataro tamuna seko ne go.

²⁰Tanego sekoro tamuna sine go, tiniki reqe me kaega de qamu koego tanuqamu, do Spirit tabo tina valame go Tamaqamu ikoego rani ne, tina vatarove qamue go pataro tamuna sine go, tina va goe ze sokoro ia de qamu koego ramu.

²¹Kakiaro basoero tarina vabesa ne qira togaqira ba kaeqira go tarina vae vale qira, mana gere napu qira so tamaqira salero tariniki soko qira kaega salero ria go. Salero tariniki soko qira kaega vanovano ria. Tarina vazao qirae vanovano ria de iri koego baturo, go tarina vae vale qira.

²²Basoero ne tariniki soko qamu kaega tanego i sauqu era. Do ka basoe i degere vanadu ne vaogoto ia deqa koego era, go tina za doka go valupolupo na, God tina vakavele ia.

²³Ṉalu iri vasasakata qamue kaki komala, katikili kasi ne, mana za napue kaki komala go. Masine ne qamu pata ogoto, tamuniki valupo kaega zazu ramu loborona ro komakomala na ro Izirel do era Tuna basoe tuna za ule me.

²⁴Basoe sikulu iki sivala ne kaega basoe i vatatana go, igerena napu so basoe zazu iki sivala ne kaega batu ia.

²⁵I tora basoe sikulu mara gere basoe vari vatatana ia mana basoe zazu mara gere batu iago. Ṉalu go iri vitoṉo ze batu na ko tatamana ia Belzebul, nogotona tatamana ro tarina koru napu qirae vitoṉo i lete sakata sivala go.”

²⁶Gonae Jesu i sine ne qira, ‘Iago muniki sareki ne qira basoero. Pataro iri pika go basoero ne tinara sadaka me mana pataro iri vari sine pika nego, tinara rove topu na basoero go.

²⁷Pataro qa sine ne qamu go era ṉalu ni rodoko go, muna sine patu napua ṉalu ni musaqara go. Pataro qata vari sine miki neso tanuqita ne, muna sine vasadaka ne qira basoero go.

²⁸Muniki sareki ne qira basoero, iri mazala go vae vale na tokama qamu, do i makuru qira tarina vae vale go madau qamu. Do muna sareki ne God, tanego i mazala vae vale qamu, mana vazao ze madau qamu loborona nako iki rove go kaega le.

²⁹Qamu rove, karua tunana kurukuru iri mazala voli ze karua senti. Patavolomo nae, ṉalu God tariki vamao go kaega, i makuru tarina le go karua pale de.

³⁰Ramu ne, osina to uguru i podoe go kuzuku qamu ne, God i rove lupo bana so topuna.

³¹Iago, kasi sareki, tanego ramu qamu lete sivala ne qira pale ro dena.”

³²Gonae Jesu i sine ne qira, “Ṉalu kaki basoe i sine vasadaka ze de iri koego basoero ne, igo, ‘Tanuna i lulu ara era,’ era tuna sine vasadaka napu ze ia de ikoego Mamae tepa rani ne, basoe nae i ke rera go.

³³Do ka basoe i sine vasadaka qira basoero ne igo, ‘Iki soko ava kaega,’ era do na sine napu ne Mamae, qaki soko kaega basoe nae.”

³⁴Jesu i sine napu ne qira, “Muniki nanao era qa lama go tuna va kameka ne qira basoero na kolabana pua ne, Kaega! Era qaki lama ne kaega vari vabule, do qa lama ne vota qira basoero ne.

³⁵Era qa lama, go sale valeke ro tarina pera tamaqira ro, sale qolero tarina pera qira sinaqira ro mana tamaravana qole tiruna vari perae go.

³⁶Iago loborona ko tatamana nae tanuqira so tarina vari vasasakatae go.

³⁷Ka basoe i lete mamaligara ne qiru tamana mana sinana, sivala ne mamaligara ia de qa koego era, basoe nae iki tora kaega na luluava era. Mana ka basoe i lete mamaligara ne sale valeke ba sale qole ia, sivala ne mamaligara ia de qa koego era. Basoe nae iki tora napua kaega tina luluava era go.

³⁸Mana ka basoe iki toqe ne kaega vagore na koluse ia mana luluava era gogo ne, iki tora kaega na luluava era.

³⁹Ka basoe i soko vakavele na too ia tanuna tiniki pala kaega too ogoto. Do ka basoe i teke lupo ne too ia sauqu era, ia tinara za pala too kulakula ogoto ṉalu muzi.”

⁴⁰Jesu i sine napua igo, “Ka basoe i va kapo velaka ne qamu go, i vakapo velaka napu nava era go, mana basoe i vakapo velaka nava era, i vakapo velaka napu ne Mamae ni turi nava go.

⁴¹Mana ka basoe i va kapo velaka ne kaki propeta, tanego i mia rove i propeta, God tina teke ne ia volina, gere so volina propeta nae. Mana ka basoe i vakapo velaka ne basoe velaka, tanego i rove basoe nae i totoloṉoe tarakenaqana God, God tina teke ne ia volina, gere so volina basoe velaka nae.

⁴²Ṉalu kaki basoe i teke ne besi lolomu kaki basoe volomo so, tanego i mia rove basoe nae i lulu ava era, ma sine ne qamu pata ogoto, God tina volia basoe nae.”